Read Batak Dairi Lukas 18 Bible Online

Lukas 18 - Batak Dairi bible

Lukas 18

¹Enggo kessa idi, isukutken Jesus mo sada codiin bai kalak idi, lako mengajarken asa kennah tetap kalak idi mersodip ulang merkeleja-lejaan.

²Nina mo, “I sada kuta, lot mo sada hakim oda parduli mi Dèbata, janah oda isarihken nè bang jelma pè.

³Lot mo i kuta idi sada kalak simebbalu, pukpuk iempet roh mendahi hakim i asa ibèla perkarana. ‘Urupi mo aku lako mengalo alongku idi,’ nina simebbalu idi.

⁴Tah sadikè dekkahna, oda lot nggèut hakim idi. Tapi gabè merpikir mo hakim idi ibas ukurna, ‘Ah, tukasi pè oda perduli aku taba Dèbata, janah oda kusarihken jelma.

⁵Kumarna dak ièlèk-èlèk simebbalu idi aku, padaan mo kubèla perkarana idi, tah bakunè dak roh pukpuk ia mendahi aku, gabè ijonggala nola aku.’ ”

⁶Nai idokken Jesus mo, “Radumi kènè mo, kadè sinidokken hakim sijahat idi!

⁷Asa mula mengido mengèlèk kènè taba Dèbata mahar bak berngin, otang ibèla ngo perkara sinigemgemNa? Patut nola katèndènè oda iurupi kalak idi?

⁸Kudokken mo bai ndènè: Bakunè pè ndor ngo kalak idi iurupi! Nai bakunè nola mo luas, roh kessa Anak Jelma mi dunia ènda, lot dèng ma ngo idapet kalak sipercaya?”

⁹Nai isukutken Jesus mo codiin taba kalak simendokken dirina ngo kessa bennar, ukum sidèbanna merlèa ngo dok atèna.

¹⁰Nina mo, “Lot mo dua kalak laus mi Bages Perguruun lako mersodip. Sada imo kalak Parisè, janah sada kalak nai pertunggu belasting.

¹¹Cènder mo Parisè idi mersodip ibagasen ukurna bagèen, ‘Alè Dèbata, kudokken melias atè baMu kerna oda dos aku dekket jelma sidèban, pennamun, perjahat, perlangkah julu meddem. Janah oda ma aku bagè pertunggu belasting adoi.

¹²Dak puasa ngo aku dua ari gennep minggu, janah kuberrèken ngo baMu nipersipuluh cinaringku.’

¹³Tapi ukum pertunggu belasting idi, narih ndaoh ngo ia cènder, janah oda pang ia giamken mennarè mi langit. Ninganna itempuk tentenna idokken mo, ‘Ialè Dèbata, masèh mo atèmu midah aku perdosa èn!’ ”

¹⁴“Kudokken mo bai ndènè,” nina Jesus, “Nderrang balik kalak i mi sapona, sodip pertunggu belasting idi ngo ijalo Dèbata, ukum Parisè idi oda ngo ijalo. Kerna barang isè pedatesken dirina, kennah ipeterruh ngo, janah barang isè pecerrepken dirina, ipedates ngo.”

¹⁵Lot mo kalak merrohen merembah dukak-dukakna bai jelma asa ijamah janah ipasu-pasu. Iidah sisinna kessa bagidi, ipincang mo kalak idi.

¹⁶Tapi idilo Jesus mo kalak idi, nina mo, “Belli mo roh anak-anak idi mendahi Aku, ulang gerai kènè, ai kalak sibagidi ngo ginemgem Kerajaen Dèbata.

¹⁷Èngèt kènè mo! Kalak siso uè iperèntah Dèbata bagè anak-anak, oda terbakin ia ginemgem Kerajaen Dèbata.”

¹⁸Lot mo sada kalak pengulu Jahudi mengkuso taba Jesus, nina mo, “O Guru, simendè roka, bakunè ngo kennah bakinenku asa kujalo kenggelluhen amman sumendah?”

¹⁹Ialoi Jesus mo merkitè kuso-kuso, “Kasa idokken kono aku simendè roka? Isè poda permendè roka, laènken Dèbata.

²⁰Ibettoh kènè ngo pati-patiin Dèbata: Ulang merlangkah julu meddem, ulang memmunuh, ulang menangko, ulang merluap, pesangap inangmu dekket bapamu.”

²¹Ialoi pengulu i mo, “Karinana idi enggo kuulaken mulai i kepposoenku nai.”

²²Mendengkoh idi Jesus, idokken mo tabasa, “Sada nai ngo perlu ulankenenmu: Dèaken mo karina silot bamu, berrèken mo tokorna taba kalak sincoor, nai merharta mo kono i sorga. Enggo kessa i, roh mo kono mengèkutken Aku.”

²³Idengkoh kessa bagidi, bonek mo ukurna, kerna kalak sibèak tangas-tangasen ngo ia.

²⁴Ibettoh Jesus ngo bonek idi ia, kerna naidi nina mo, “Soh mo mahalna kalak sibèak mbengket mi kerajaen Dèbata.

²⁵Murahen ngo gajah mbengket mi lubang jarum, asa sibèak mbengket mi Kerajaen Dèbata.”

²⁶Nai mengkuso mo kalak simendengkoh idi, “Mula bagidi, isè mo kessa saut maluah?”

²⁷Ialoi Jesus mo, “Siso terpetupa jelma, terpetupa Dèbata ngo!”

²⁸Nai idokken si Petrus mo, “Ukum kami, enggo mo kutadingken kami karina silot bai nami lako mengèkutken Kono.”

²⁹Ialoi Jesus mo, “Tuhu ngo i!” nina Jesus, “Barang isè menadingken bagesna, sinibagesna, kaka-anggina dekket partuana barang dukak-dukakna kumarna mengèkutken Aku dekket menguèi Dèbata,

³⁰gabè iberrè mo bana merlempit ganda bagèndari, janah seggen pè jalonna mo kenggelluhen amman-sumendah.”

³¹Iarahken Jesus mo sisinNa sisipuluh dua idi, nina mo mbang kalak idi, “Bagèndari laus mo kita mi Jerusalem, janah terjadi mo karina nisuratken nabi-nabi terrèngèt Anak Jelma idi.

³²Ipesakat mo ia mendahi kalak siso menandai Dèbata, irèhè-rèhèi mo ia, ilèai, icèduri.

³³Isiksa mo ia janah ibunuh; tapi balik nggelluh ngo i ari petelluken.”

³⁴Tapi cituk poda iantusi sisiin idi. Oda lot iarti kalak i nidokken Jesus idi. Oda ibettoh tah terrèngèt kadè niranaken Jesus idi.

³⁵Nai soh kessa Jesus mi kuta Jeriko, lot mo isidi sada kalak sipètung mengido-ngido i biding dalan.

³⁶Idengkoh sipètung idi kessa mo lot sora memellus jelma mbuè arap idi, ikuso mo, “Kadè masa?”

³⁷Ibagahken jelma i mo bana, “Jesus kalak Nazaret i ngo memellus.”

³⁸Nai mènter dilo-dilo mo ia, “O Jesus, pemparen si Daud, masèh mo atèmu midah aku!”

³⁹Tapi igerra kalak simentas perlebbè idi mo ia asa sip katèna. Tapi makin ipegang mo sorana mendiloken nola, “Alè pemparen si Daud, masèh mo atèmu midah aku!”

⁴⁰Nai, tendo mo Jesus, ipasulak mo mengalengi sipètung idi. Soh kessa sipètung idi, ikuso Jesus mo ia,

⁴¹“Kadè ipergeddo Kono naing bakinenku bamu?” Ialoi sipètung idi mo, “Merpendidah mo nemmu matangku èn alè Tuhan!”

⁴²Idokken Jesus mo tabasa, “Merpendidah mo kono! Kepercayaenmi ngo pemalumken kono.”

⁴³Nai mènter merpendidah mo tuhu ia, janah ièkutken mo Jesus ninganna memoji-moji Dèbata. Gabè karina jelma nterrem simengidah idi, memoji-moji Dèbata.