Read Batak Dairi Lukas 19 Bible Online

Lukas 19 - Batak Dairi bible

Lukas 19

¹Soh mo Jesus mi kuta Jeriko, merdalan mo ia memellus arap kuta idi.

²Lot ngo i kuta idi sada kalak ekuten pertunggu belasting mergerar si Zakheus.

³Sèkel kalohoon ngo ia naing mengidah Jesus, tapi oda terbakinsa kumarna jelma mbellang idi, janah kalak joppok ma ngo ia.

⁴Nai lojang mo ia mengelebbèi jelma nterrem idi, ipenangkih mo sada kayu, asa isidi nai ndorok iidah Jesus, kerna arap terruhna i ngo mentas Jesus sigejjap nai.

⁵Soh kessa Jesus arap bekkas idi, itarè mo mi dates janah idokken mo taba si Zakheus, “O Sakkèus, ndor mo kono susur! Ai naing kiserrang aku mi sapomu ari èn.”

⁶Nai ikettu si Zakheus mo susur, janah lolo kalohoon mo ia menjalo Jesus.

⁷Ngutnguten ngo karina jelma simengidah i, nina mo, “Iah, mertamu ngo keppèken ia mi bages perdosa!”

⁸Roh mo si Zakheus mendokken taba Tuhan i, “O Tuhan, sitengah hartangku kucedekkahken mo bai kalak sincor, janah barang isè nung kalak kukilang, empat kali lempit mo kuulakken tabasa!”

⁹Nai idokken Jesus mo tabasa, “Mertuah ngo pengisi bages ènda sidari èn ibakin Dèbata, kemulihken pemparen si Abraham ngo bang ia pè.

¹⁰Ai roh ngo Anak Jelma lako menulusi janah paluahken kalak simago.”

¹¹Kumarna mbuè ngo simendengkoh rana Jesus i, jadi iranaken mo codiin bai kalak idi, kerna enggo ndessing mi Jerusalem, idokdok kalak idi mo mènter petararen Kerajaen Dèbata.

¹²Kumarna naidi nina Jesus mo, “Lot mo sada kalak berkat mi nagerri ndaoh, lako ipebangkit gabè raja isidi, nai pul kessa i, baru pè asa balik ia.

¹³Sinderrang makdèng berkat, idilo mo sipuluh kalak naposona, ipemberrèken mo taba kalak i gennep tersada riar emmas, janah idokken mo taba kalak idi, ‘Perpokok kènè mo riar ènda, sinderrang oda isèn aku,’ nina.

¹⁴Tapi ceggo ngo atè ginemgem i midahsa, ipasulak kalak idi ngo suruhenna mengayakisa magahken, ‘Oda uè kami rajanna nèngè.’

¹⁵Tapi ipebangkit kessa ia gabè raja, balik mo ia mi kutana. Idilo mo naposona simenjalo riar idi mi hadeppenna, ai naing ibettoh barang sadikè laba ni kalak i gennep.

¹⁶Naposo perlebbè roh mendokken, ‘Tuan ukum labangku, sipuluh riar emmas ngo kemulihken riarmu sada idi.’

¹⁷‘Selloh,’ nina tuan i. ‘Kono naposo mendè janah burju! Kumarna kettoken ngo ko ibas sicituk, jadi jalo mo kuasa lako mengerajai sipuluh kuta.’

¹⁸Roh mo naposo peduaken, nina mo, ‘Tuan, merkitè sada riar emmas niberrèkenmi bangku, dapet aku ma ngo laba lima riar emmas.’

¹⁹Nai idokken tuan i mo mbangsa, ‘Kono pè rajai mo lima kuta.’

²⁰Roh nola ma mo naposo sidèban nina mo, ‘Tuan, èn ngo riar emmasmu idi, ai kubaluti ngo dekket sèkka.

²¹Ai mbiar ngo aku midah Tuan i, ai kubettoh kalak mpihir ngo Tuan i. Ibuat Tuan i ngo siso lahna, janah ipepulung Tuan i ngo siso nisuanna.’

²²Gabè idokken raja i mo mbangsa, ‘Tosè mi pendokkenmi ngo kuhukum kono alè naposo jahat! Ibettoh kono ngo keppèken aku kalak mpihir janah kubuat siso lahku, kupepulung siso nisuanku.

²³Mula bagidi ngo, kasa oda ianakken kono riarku idi dekket anakna.’

²⁴Nai idokken raja i mo taba jelma silotna i sidi, ‘Buat kènè mo riar idi bana nai, berrèken mo bai naposo sidapet bagian sipuluh riar idi.’

²⁵Gabè idokken nisidi mo taba raja i, ‘Tuan, otang enggo lot sipuluh riar emmas bagianna.’

²⁶Ialoi raja i mo, ‘Kudokken mo bai ndènè, berrènken ngo taba kalak simerrusaha asa lot bana. Tapi ukum kalak siso uè merrusaha, tukasi pè cituk silot bana i, buaten ngo bana nai.

²⁷Bagèndari, embah mo ia mi sèn musuhku i siso uè kurajai idi. Bunuh kènè mo kalak idi karina i lebbè-lebbèngku!’ ”

²⁸Enggo kessa iruapken Jesus karinana idi, ilebbèi mo jelma nterrem idi laus mi Jerusalem.

²⁹Soh kessa ia mi gembar Betpage dekket Betania i Uruk Zaitun, ipasulak Jesus mo dua kalak sisinNa laus perlebbè.

³⁰“Laus mo kènè mi kuta ni lebbè ndènè adoi,” nina Jesus taba kalak idi. “Soh kessa kènè nahan mi kuta id, idahèn ndènè mo isidi sada anak kalodè tertambat janah madèng nung ipasang dèba. Talkasi kènè mo kalodè idi, nai embah kènè mo mi sènda.

³¹Mula ikuso dèba kènè, ‘Kasa italkasi kènè kalodè idi i penambaten nai?’ dokken kènè mo tabasa, ‘Perlu ngo idi bai Tuhan i.’ ”

³²Nai laus mo sisiin sidua kalak idi. Idapet mo karinana tuhu bagè nidokken Jesus idi.

³³Tikan mengosari kalodè i kalak i, nina sidasa i mo taba kalak idi, “Kasa iosari kènè kalodè idi?”

³⁴Ialoi kalak idi mo, “Perlu ngo idi bai Tuhan i.”

³⁵Nai iembah kalak idi mo anak kalodè i mendahi Jesus. Jadi ipengalasken kalak idi mo mi babo kalodè i olesna, janah ipekundul mo Jesus mi babona.

³⁶Tikan ibellus Jesus dalan idi merkalodè, ipengalasken jelma nterrem i ngo olesna i babo dalan idi.

³⁷Lako soh mo Jesus mi Jerusalem, imo i rebbèen pispis Uruk Zaitun, karina jelma nterrem simengèra-ngèra Jesus idi mersurak-surak, meroang-oang memoji Dèbata, kemulihken karina tanda kellengangen sienggo niidah kalak idi.

³⁸Kata surak ni kalak idi imo, “Ipasu-pasu mo Jesus siroh merkitè-kitè gerar Tuhan i! Damè mo i sorga janah kemmuliaan bai Dèbata!”

³⁹Nai kalak Parisè sirebbakken jelma nterrem idi mendokken taba Jesus, “O Guru, dokken mo asa sip sisiin simengèkutken Kono i.”

⁴⁰Ialoi Jesus mo, “Kudokken mo bai ndènè, mula sip kalak idi, gabè mersurak-surak mo batu ènda.”

⁴¹Enggo kessa njolmit Jesus mi kuta Jerusalem janah iidah kuta i, itangisi mo kuta i nina mo,

⁴²“Nong ngalè, ukum bagèndari kin mo nemmuken itandai kono sipedamèken kono! Tapi mboni ngo idi ibas penengenmu nai.

⁴³Roh mo seggen musuhmu mengkubu kono janah isessak mo kono i kambirang kamuhunmu nai.

⁴⁴Kerri mo kono ireppuk rebbakken pengisi ni tengah-tengahmu idi, janah oda ibelli dua batu mertindih-tindih i bekkasna kin, kerna oda isarihken kono ndigan pekiroh Dèbata menongkir kono lako paluahenna!”

⁴⁵Nai ibengketti Jesus mo Bages Dèbata janah iusir mo kalak pertiga-tiga nisidi.

⁴⁶Nina mo, “Tersurat ngo ibas Bibèl: Bekkas mersodip ngo ukum BagesKu. Tapi gabè ibakin kènè ngo bekkas pennamun!”

⁴⁷Gennep ari ngo dak mengajari ukum Jesus i Bages Dèbata. Nai imam ekuten, simettoh Patiin dekket pengulu-pengulu Jahudi, mennulusi dalan lako memmunuh Jesus.

⁴⁸Tapi oda dapet kalak idi dalan lako pesautken takina idi, karna karina sinterrem idi merlemmo atè mendengkoh peddah Jesus.