Read Batak Dairi Lukas 2 Bible Online

Lukas 2 - Batak Dairi bible

Lukas 2

¹Nai roh mo tikannai perèntah Kèsar Agustus, kennah suraten nasa jelma nigemgemmenna.

²Pemmilangen perlebbè mo idi tikan si Krinius gabè gubèrnur nagerri Siria.

³Berkat mo karinana jelma mi lebbuh empungna gennep asa isurati gerarna.

⁴Berkat mo si Josep i Nazaret nai sini Galilea, mi Betlehem i Juda mi kuta si Daud, kerna pemparen si Daud ngo ia.

⁵Pessuratken dirina rebbak si Maria tinandana sienggo mengkandong idi.

⁶Sinderrang i Betlehem kalak idi dapet mo kettikana kettaring si Maria idi.

⁷Itubuhken mo sada anak buka bajuna, iampani mo, janah icoling mi babo gagaten kerna oda lot nèngè permalamen sidèban dapet kalak idi.

⁸Lot ngo permakan i kuta i mermalam i jampalen bernginna i menjaga pinakanna.

⁹Sintèmpu, roh mo malaèkat Tuhan i mendahi kalak idi janah mercuhaya ngo sangap Tuhan i mennerrangi kalak i, gabè mbiar kalohon mo kalak idi.

¹⁰Nina mo, “Ulang kènè mbiar, ai Sukuten Simerandal ngo kubagahken bai ndènè — sukuten sampang atè mbuè bai karina jelma.

¹¹Enggo tubuh Raja Sipaluah berngin èn i kuta si Daud, imo Kristus Tuhan.

¹²Èn mo pertandanna: Anak mbara ngo dapetten ndènè, siniampanen icoling i babo gagaten.”

¹³Sintempu, roh mo rebbakken malaèkat i mbuè denganna malaèkat memoji-moji Dèbata, nina mo:

¹⁴“Kessangapen mo bai Dèbata i bekkas sindatesna! Damè mo i tanoh èn bai jelma kellemmonken Tuhan i!”

¹⁵Laus kessa malaèkat i mi sorga menadingken permakan idi, mengerana mo permakan i samahsa, “Laus mo kita mi Betlehem, sitengen mo simasa èn nibagahken Tuhan i mendahi kita.”

¹⁶Isudu kalak i mo laus, jumpa kalak i mo si Maria dekket si Josep dekket anak mbara idi icoling i babo gagaten.

¹⁷Iidah permakan idi kessa anak mbara idi, ibagahken mo sinikataken malaèkat i terrèngèt anak mbara i.

¹⁸Nai karinana mo kalak i bengap mendengkoh sukuten idi.

¹⁹Tapi ukum si Maria, ijamotken ngo karina kata i janah iradumi ibas ukurna.

²⁰Mulak mo permakan idi ninganna ipoji mo Dèbata, kumarna karinana niidah dekket sinidengkohna idi tuhunna ngo bagè nidokken malaèkat i tabasa.

²¹Enggo kessa ualuh ari umurna, nai isunat mo ia. Ibaing kalak i mo gerarna Jesus, imo gerar sinibakin malaèkat idi sinderrang makdèng sellet Ia.

²²Janah dapet kessa kettikana lako pepantingken mengèkutken hatoren patiin si Musa, iembah si Josep dekket si Maria mo Anak i mi Jerusalem asa isohken mi hadeppen Tuhan i.

²³Kerna tersurat i bukku hatoren Tuhan i bagèen, “Nasa anak buka baju kennah ipesakat mi hadeppen Tuhan i.”

²⁴Laus ngo kalak i mi Jerusalem imo pessohken pèlèen simpasang kèrap barang dua ndarapati bagè sienggo itettahken Hukum Tuhan.

²⁵Lot mo tikannai sada kalak i Jerusalem mergerar si Simeon, sada kalak bennar ngo ia janah merkebiaren mi Dèbata dak memèma-mèma pekiroh Dèbata paluahken bangsa Israel. Idomi Tendi Perbadia mo ia,

²⁶ai enggo kin ngo ibagahken Tendi Perbadia mbangsa, oda dèng matè ia, ukum madèng iidah ia Mesias niperbagah-bagah Dèbata.

²⁷Merkitèken kegegohen Tendi Perbadia roh mo ia mi Bages Dèbata. Nderrang iembah partuana Jesus anak mbara i mengèkutken hatoren sitersurat ibas pati-patiin.

²⁸Iabing si Simeon mo Anak mbara i, ipoji mo Dèbata, nina mo,

²⁹“Bagèndari alè Tuhan, enggo mo ipesaut Kono niperbagah-bagahmi. Enggo mo sennang atèngku matè ibagasen damè.

³⁰Ai enggo mo iidah matangku sendiri kelluahen siroh baMu idi nai.

³¹Siniberrèkenmu taba karina bangsa.

³²Tosè bagè kecihuren lako menerrangi dalan bai bangsa sidèban asa roh mendahi kono, janah mahan kemuliaan taba bangsaMu Israel.”

³³Lengngang kalohon mo partuana mendengkoh nidokken si Simeon idi terrèngèt Anak idi.

³⁴Nai ipasu-pasu si Simeon mo kalak idi, “Sienggo nipilih Dèbata ngo anak ènda, lako mendabuh hukum dekket pekèkèken mbuè kalak Israel. Janah tanda bai Dèbata nai ngo Ia, itonja jelma nterrem ngo Ia,

³⁵janah merkitè bagidi terbettoh mo isi perukuren kalak i. Kinimarsak mo menurah atè-atèmu bagè peddang ntajem.”

³⁶Lot mo isidi sada kalak nabi daberru, enggo mo tua-tua kalohon ia. Si Hana ngo gerarna imo berru si Panuel, marga Asyer. Enggo kessa pitu tahun mendiri,

³⁷mebbalu mo si Hana, janah enggo ualuh puluh empat tahun umurna. Dak tong ngo ia merrian i Bages Dèbata. Suntuk ari suntuk berngin ngo ia mersodip janah merpuasa menguèi Dèbata.

³⁸Tupung tikan bagidi, roh ma mo ia, ipoji mo Dèbata, janah iranaken ngo terrèngèt Anak idi mendahi karina jelma simengketeddohken Jerusalem ipaluah Dèbata.

³⁹Enggo kessa iulaken si Josep dekket si Maria karinana nihatorken Tuhan i, balik mo kalak idi mi kutana Nazaret nagerri Galilea.

⁴⁰Makin mbelgahna janah mergegoh mo anak idi. Bijak kalohoon ngo ia janah idomi masèh atè Dèbata.

⁴¹Gennep tahun dak laus ngo partua Jesus mi Jerusalem lako merpèsta Ari Raya Paskah.

⁴²Enggo kessa merrumur sipuluh dua tahun Jesus, rebbakken mo kalak i mi Jerusalem bagè ncemmalna mi pèsta idi.

⁴³Pul kessa pèsta idi, balik mo kalak i, keppè tading ngo Jesus i Jerusalem siso pemmettohen partuana.

⁴⁴Persangkaan kalak idi enggo rebakken jelma mbellang idi Jesus balik i Jerusalem nai. Enggo kessa idalani kalak i dalanen sidari, itulus mo Ia iantara kadè-kadè dekket kalak nitandanna pè.

⁴⁵Tapi oda lot jupa kalak idi Ia, gabè balik nola mo kalak i mi Jerusalem mennulusi Jesus.

⁴⁶Enggo tellu ari itulusi, idapet kalak i mo Ia i Bages Dèbata kundul-kundul mendengkoh-ndengkohi ninganna maing kuso-kuso mendahi guru-guru agama Jahudi.

⁴⁷Karina kalak nisidi lengang mendengkoh ibas pengerrananNa dekket pengaloina.

⁴⁸Lengang ma mo dekket partuaNa mengidahSa. Nai idokken inangNa i mo tabaSa, “Kasa bagi pemaingmu taba kami alè pa? Terendep-endep ngo bapaMu dekket aku mennulusi kono.”

⁴⁹Ialoi Jesus mo, “Kasa itulusi kènè Aku? Oda ibettoh kènè kennah ngo Aku i bages BapangKu?”

⁵⁰Tapi oda iarti si Josep dekket si Maria nidokken Jesus idi.

⁵¹Nai balik mo Jesus rebbak dekket kalak idi mi Nazaret, janah dak merpenguèi ngo Ia taba kalak idi. Karinana simasa idi isimpan si Maria ngo ibagasen ukurna.

⁵²Makin ndekkah, makin mbelgahna ngo Jesus janah tambah bijak, ikellemmoken Dèbata bak jelma ngo Ia.