Read Batak Dairi Lukas 20 Bible Online

Lukas 20 - Batak Dairi bible

Lukas 20

¹Ibas sada ari tikan mengajar Jesus terrèngèt Sukuten Simerandal bai Dèbata nai i Bages Dèbata, roh mo imam-imam ekuten dekket simettoh Patiin bak pengituai-pengituai.

²Nina kalak i mo taba Jesus, “Bagahken mo bai nami barang idikè nai ngo kuasamu lako mengulaken idi karinana, isè memerrè kuasa baMu?”

³Ialoi Jesus mo kalak idi, “Aku pè mengkuso kènè ma. Bagahken kènè mo bangKu.

⁴Ia ukum perridiin nibaing si Johanes, bai Dèbata nai ngo barang bai jelma nai?”

⁵Nai mersungkuun mo kalak idi samahsa, “Kadè mo tuhu ndia jababna. Mula sidokken, ‘I Sorga nai,’ tentu dokkenenna banta, ‘Mula bagi ngo, kasa oda percaya kènè taba si Johanes?’

⁶Tapi mula sidokken nola, ‘Bai jelma nai ngo,’ karina nahan jelma nterrem idi mementiri kita dekket batu, kerna kalak idi percaya ngo karina ukum si Johanes idi nabi ngo.”

⁷Nai idokken kalak i mo, “Oda kubettoh kami.”

⁸Nai idokken Jesus mo taba kalak idi, “Mula bagi ngo, Aku pè oda Kubagahken barang idikè nai kuasangku lako mengulaken idi karinana.”

⁹Nai isukutken Jesus mo codiin taba jelma nterrem idi, “Lot mo pekken anggur ni sada kalak daholi. Ipebellahken mo pekken anggurna idi taba barang piga-piga kalak, nai laus mo ia mengeranto janah toko ngo dekkahna i pengerantoen idi.

¹⁰Enggo kessa mosim memuat buahna, ipasulak sidasa pekken i mo naposona lako mengaleng bagianna. Tapi ipekpekki ngo pasulaken idi, janah ipellaus oda lot iberrè.

¹¹Nai ipasulak sidasa pekken idi nola mo naposona sidèban, tapi tong ma ngo ipekpekki, ipellèa janah ipemèla, nai ipellaus ma ngo oda lot iberrè.

¹²Enggo kessa bagidi, ipasulak sidasa pekken i dèng ma mo naposona petellu kaliken, tapi tong bagidi ibakin kalak idi, janah iambongken mi ruar pekken idi.

¹³Perpodi, nina sidasa pekken i mo ibas ukurna. Bakunè nola mo ndia kubaing? Kuutus mo tupèh anakku sendiri kekellengenki, tentu nangga ngo atè kalak idi midahsa.

¹⁴Tapi iidah simengula pekken idi kessa mo roh anakna idi, idokken kalak idi mo samahsa, ‘Èn mo anak sidasa pekken idi. Aci sibunuh mo ia, asa banta hartana i.’

¹⁵Nai mènter itangkup mo ia, iruah mo mi ruar pekken idi janah ibunuh mo. ‘Bakunè ngo ndia bakinen sidasa pekken i taba kalak idi?’ nina Jesus mengkuso jelma nterrem simendengkoh codiin idi.

¹⁶Tentu roh mo ia lako mengeripasken kalak idi, janah isohken nola mo pekken idi taba pemellah pinang sidèban.” Mendengkoh idi, nina kalak i mo, “Ah ulang mo bagidi!”

¹⁷Tapi itengen Jesus mo kalak idi ninganna idokken, “Mula oda ngo bagidi, bakunè mo lapaten ayat Bibèl idi? Batu sinipatakken tukang bages i, idi ngo gabè batu persoki.

¹⁸Barang isè ndabuh mi batu idi kennah merreppuk, janah barang isè itinggang, kennah nggeppu.”

¹⁹Iarti simettoh Patiin dekket imam ekuten ngo mengarusi codiin idi janah mendahi kalak idi ngo lapatenna itujuken. Kumarna idi, iusahaken kalak i mo naing menangkup Jesus gejapkenna idi.

²⁰Nai, itulusi kalak i mo tikki mendè. Isisip mo kalak peteridahken dirina bagè kalak bujur, ipasulak mo mengenggep Jesus merkitè-kitè kuso-kuso, asa ndorok iserahken kalak idi Jesus mi gubèrnur asa itahan.

²¹Nai idokken pasulaken simettoh Patiin dekket imam ekuten mo taba Jesus, “O Guru, kubettoh kami ngo karina niranakenmu bak nipeddahkenmi, tuhu ngo karina. Kubettoh kami ma ngo oda uè Kono mengidah-idah abè; pellin memeddahken situhunna sambing ngo kono terrèngèt nipergeddo Dèbata bai jelma.

²²Kernanai, bagahken mo bai nami tah ndorok ngo menggarar belasting taba Kèsar mengèkutken agamanta, barang tah oda?”

²³Tapi ibettoh Jesus ngo taki-taki ni kalak idi. Kernana i, idokken mo:

²⁴“Pacidah mo bangKu sada kèpèng pirak! Gombaren dekket surat isè ngo ibas kèpèng ènda?” Ialoi kalak idi mo, “Gombaren dekket surat Kèsar i ngo,” nina kalak i mengaloi.

²⁵“Mula bagi ngo,” nina Jesus mengaloi, “Berrèken kènè mo mi Kèsar, milik Kèsar idi janah berrèken mo balik mi Dèbata, milik Dèbata.”

²⁶Gabè oda dapet kalak idi kesalahen Jesus i lebbè-lebbè jelma nterrem. Pellin mertahan sip mo kalak idi ninganNa kagum mendengkoh pengaloi Jesus idi.

²⁷Roh mo horong kalak Sadusè mendahi Jesus. (Horong kalak idi oda percaya balik nggelluh sienggo matè.) Ikusoi kalak i mo Jesus,

²⁸“O Guru, isuratken si Musa, mula matè sada kalak anak laki menadingken sinibagesna, keppè oda sanga lot dèng dukakna, kennah ipekèkè anggina mo sinibages kakana sienggo mebbalu i, asa lot anak bai sienggo matè idi.

²⁹Jadi lot mo pitu kalak sibeltek. Jejap mo situaan, keppè menter matè oda sanga dèng lot anakna.

³⁰Nai ipekèkè sipeduaken mo sinibages kakana idi, tapi ia pè matè ngo oda sanga lot anakna.

³¹Nai mi sipetelluken pè tong ma bagidi perasatna ipekèkè ma ngo daberru idi. Bagidi mo soh mi pepituken, karinana kalak idi mengkabini daberru i, janah matè oda lot mersikèdèk-kèdèk.

³²Perpodi kalohoon, matè ma mo daberru idi.

³³Nai tikan balik nggelluh seggen jelma sienggo matè idi, sinibages isè mo daberru idi bai sipitu kalak idi? Ai pituna ngo kalak idi mengkabinisa.”

³⁴Ialoi Jesus mo, “Jelma ni dunia ènda ngo kabin,

³⁵tapi ukum jelma sipatut balik nggelluh i ari podi idi seggen oda nèngè ngo kabin.

³⁶Nggelluh ni kalak idi, tosè bagè malaèkat janah oda ndorok matè. Gabè dukak-dukak Dèbata mo kalak idi, kerna enggo kèkè kalak i ibas kematèen nai.

³⁷Si Musa sendiri enggo memagahken balik nggelluh sienggo matè idi, imo suratna terrèngèt rambah mpulguk silakat idi, ‘Tuhan i, imo Dèbata si Abraham, Dèbata si Isak, dekket Dèbata si Jakob.’

³⁸Jadi oda ngo Dèbata simatè Tuhan i, tapi Dèbata singgelluh ngo! Kerna nggelluh ngo karina jelma i hadeppen Tuhan.”

³⁹Mendengkoh idi, idokken kalak simettoh Patiin mo, “Guru, kenna kalohoon ngo pengaloimu idi.”

⁴⁰Kernana i, oda pang nèngè kalak idi lako mengkusoi Jesus.

⁴¹Ikusoken Jesus mo taba kalak idi, “Bakunè mo i, Raja Sipaluah niperbagah Dèbata idi pemparen si Daud?

⁴²Padahal si Daud sendiri mendokken ibas bukku Psalm: ‘Nina Tuhan i ngo mbang Tuhanku: Kundul mo kono i kamuhunKu ènda,

⁴³pèma Kubakin karina musuhMu tunduk baMu.’

⁴⁴Jadi, mula idokken si Daud ngo Raja Sipaluah idi ‘Tuhan,’ idikè mo terdokken Ia pemparen si Daud?”

⁴⁵Enggo kessa mengerana Jesus taba karina jelma nisidi, idokken Jesus mo taba sisinNa,

⁴⁶“Manat mo kènè taba kalak simettoh Patiin. Lolo ngo kalak i merdalan-dalani ninganna memakkè jubahna nggeddang janah ipido ukurna ngo asa itabi dèba ia i tengah ndalan dekket i onan. Dak ipilih kalak i ngo bekkasna kundul i lebbè mula ibages perguruun, janah bekkas simersangapna mula i perpèstaan.

⁴⁷Ikilang kalak i ngo daberru simebbalu janah ilaum bagesna. Nai memmoniken pengelakona jahat idi, mersodip nggeddang mo kalak i. Mberrat ngo kaduan hukumen kalak idi!”