Read Batak Dairi Lukas 23 Bible Online

Lukas 23 - Batak Dairi bible

Lukas 23

¹Nai kèkè mo karinana kalak idi lako menaruhken Jesus mi hadeppen si Latus.

²Iaduken kalak idi mo Ia, nina mo, “Kudapet kami ngo kalak èn mengelalingken jelma nterrem. Iajar-ajari ngo jelma nterrem i asa ulang menggarar belasting taba Kèsar; kerna nina, Kristus ngo Ia sada kalak raja.”

³Nai ikusoi si Latus mo ia, “Tuhu ngo Kono raja ni kalak Jahudi?” Ialoi Jesus mo, “Bagè nidokkenmu ngo.”

⁴Gabè idokken si Latus mo taba imam-imam ekuten dekket jelma nterrem idi, “Oda lot dapet aku kesalahen kalak ènda, lako menghukumSa.”

⁵Tapi dak ipaksa kalak idi mo, nina mo, “Merkitè peddahNa, dak Iajar-ajari ngo karinana bangsa nami, mulai i Galilea nai soh mi Juda, janah bagèndari soh ma mi sènda.”

⁶Idengkoh si Latus kessa mo idi, mengkuso mo ia, “Ai kalak Galilea ngo keppè ia?”

⁷Nai ibettoh kessa mo kalak Galilea ngo keppè Jesus imo gemgemmen si Herodes, ipasulak mo merembahken Jesus mi si Herodes, ai tupung i Jerusalem ngo ia tikanna bagidi.

⁸Lolo kalohoon ngo si Herodes enggo kessa iidah ia Jesus, ai enggo ndekkah idengkoh terrèngèt Jesus janah sèkel ia naing mengidahSa. Dak ipercinta ukurna ngo idahenNa tanda kellengangen sibakinen Jesus.

⁹Kernana idi matcam mo bagèNa ikusoken taba Jesus, tapi dak sip sambing ngo ukum Jesus.

¹⁰Tapi dekket ngo roh imam-imam ekuten bak guru-guru agama nisidi lako mengaduken Jesus, idokken kalak i mo tuduhen mberrat bai Jesus.

¹¹Nai irèhè-rèhèi si Herodes rebbak dekket pengabalna mo Jesus, isellukken mo bai Jesus pakkèen kebelgahen, nai ipasulak mo Jesus balik mendahi si Latus.

¹²Mulai sidarinkenna i nai, gabè mersupan-supan mo si Herodes dekket si Latus mengolihi, ai mersikosomen kin ngo kalak idi.

¹³Nai ipepulung si Latus mo imam-imam ekuten, pengulu-pengulu bak jelma nterrem ginemgem pè,

¹⁴nina mo taba kalak idi, “Iaduken kènè ngo kalak ènda bangku, janah mendokken Ia mengelalingken jelma. Bagèndari pè iidah kènè ngo enggo kutangkasi Ia, tapi kesalahen nidokken ndènè i oda lot dapet aku baNa.

¹⁵Si Herodes pè oda ma lot jumpasa, kernana idi ngo asa iulakken ia mendahi aku. Situhunna oda lot ibahanken kalak ènda barang kadè pè memmaingken kennah merrutang kessah.

¹⁶Kumarna nai, kuligas mo Ia, nai kupaluah mo Ia,” [

¹⁷Biasana gennep ari raya Paskah ipaluah si Latus ngo sada kalak sikurungen bai kalak i nai.]

¹⁸Tapi karina nisidi menggegohken surakna, “Bunuh mo Ia! Si Barabas mo paluah bai nami!” (

¹⁹I kurungen pè si Barabas, kumarna menggutturi ngo ia janah kumarna memmunuh.)

²⁰Kumarna naing ipaluah si Latus ngo Jesus, idokken mo sikali nai taba jelma nterrem idi.

²¹Tapi isurakken kalak idi mo, “Persilangken mo Ia! Persilangken mo Ia!”

²²Idokken si Latus mo bai kalak i petellu kaliken, “Kadè ngo kessalahenNa? Ai oda lot dapet aku kessalahenNa tuk memmaingkensa merrutang kessah. Kuligas mo Ia, nai pè asa kupaluah.”

²³Tapi dak isurakken kalak idi mo mergegoh mendokken asa ipersilangken Jesus, ujungna gabè mennang mo kalak idi.

²⁴Nai iputus si Latus mo hukumen matè bai Jesus, rembang bagè nipido jelma nterrem idi.

²⁵Nai ipaluah mo si Barabas bagè nipido kalak idi imo sienggo ikurungken kumarna menggutturi dekket memmunuh. Nai ipesakat mo Jesus bai kalak idi asa ibaing bana merguru lemmo atè kalak idi.

²⁶Nai iiring kalak i mo Jesus mi ruar. I tengah ndalan, pesimbak mo kalak i dekket sada kalak mergerar si Simon kalak Kirene, rimbaru roh dèng ia mi kuta idi. Ia mo itangkup kalak idi janah ipaksa memersan kayu silang idi ipodi Jesus.

²⁷Mbuè ngo kalak merrotor mengèkutken Jesus — dèba mo ia daberru — janah itangisi kalak i ngo Jesus.

²⁸Tapi itulihken Jesus mo mi podi, janah nina mo taba kalak idi, “Kènè alè karina daberru Jerusalem! Ulang mo tangisi kènè Aku, tapi diri ndènè mo tangisi kènè dekket dukak-dukak ndènè.

²⁹Kerna roh mo tikkina dokkenen ndèba mo, ‘Sayurntua mo daberru nggempus, siso nung tubuh-tubuhen janah oda nung pesusuken!’

³⁰Nai idokken dèba mo ipas katika i taba delleng, ‘Tinggang mo kami!’ Janah taba uruk-uruk idokken, ‘Tamburi mo kami!’

³¹Kerna mula bagidi pemaing kalak idi taba kayu nggelluh, bakunè mo ndia pemmaing kalak idi taba kayu sienggo matè!”

³²Lot dua kalak sidèban perjahat — iembah kalak idi asa ihukum matè rebbak dekket Jesus.

³³Soh kessa mo mi bekkas mergerar “Pertulanen”, ilabangken kalak idi mo Jesus mi kayu persilang. Bagidi ma mo perjahat sidua kalak i — ipersilangken mo sada kan kamuhun Jesus janah sada nai kan kambirangna.

³⁴Nai mersodip mo Jesus, “Ialè Pa, ulang pella ilugun kono pemmaing kalak idi, ai oda ibettoh kalak idi sinibaingna idi.” Ibagi-bagi kalak idi mo isidi oles Jesus merkitè tendung.

³⁵Mbuè ngo kalak cènder i sidi janah mengidah karina simasa idi, ninganna pengulu-pengulu Jahudi dak mengerèhè-rèhè Jesus, nina mo, “Sidèban ipaluah ngo, bagèndari diriNa mo nemmu ipaluah mula tuhu ngo Ia Mesias Raja Sipaluah niperbagah-bagah Dèbata!”

³⁶Soridadu-soridadu idi pè mengerèhèi Jesus ngo. Roh ngo kalak idi mi gembar Jesus, iberrèken kalak i mo anggur macem tabasa.

³⁷Ninganna idokken kalak idi, “Mula raja ni kalak Jahudi ngo Kono, paluah mo diriMu!”

³⁸I babo kayu persilang Jesus idi, isurat ngo bagèen, “Èn mo Raja ni kalak Jahudi.”

³⁹Sada ibas perjahat nipersilangken idi mengelèai Jesus, nina ngo, “Otang Kristus Raja Sipaluah niperbagah-bagah Dèbata ngo kono? Paluah mo diriMu, bak kami pè!”

⁴⁰Tapi ipesèngèt sisada kalak nai mo ia, nina mo, “Oda ngo keppè ikebbiari kono Dèbata, tukasi pè kita rebbak ihukum matè?

⁴¹Sènteng ngo hukum simengenna banta, ai sijalo ngo ali perrulanta. Tapi ukum Ia, kadè poda lot salahna!”

⁴²Nai nina nola mo taba Jesus, “O Jesus, èngèt aku, Enggo kessa soh kono gabè Raja!”

⁴³Nai idokken Jesus mo tabasa, “Kudokken mo bamu, sidari èn mo kono rebbak dekket Aku i Paradaiso.”

⁴⁴Kira-kira pukkul duabellas tengngah ari, gellap mo suberri nagerri idi kerna oda mercuhaya mataniari soh mi pukkul tellu cibon.

⁴⁵Nai merribak mo kirè-kirè ni Bages Dèbata, i babo nai soh mi terruh.

⁴⁶Nai mersora nggang mo Jesus, “Alè Pa! Mi bagasen tanganMu mo Kupesakat tendingKu!” Enggo kessa idokken bagidi, mpostep mo kessahna.

⁴⁷Iidah ekuten soridadu i kessa mo simasa i, ipoji kalak i mo Dèbata nina mo, “Tuhu ngo oda mersalah kalak ènda!”

⁴⁸Mbuè ngo roh jelma mi bekkas idi janah iidah ngo karina simasa idi. Mulak mo kalak i mi sapona merdengan ukur peselsel.

⁴⁹Karina simendahi Jesus bagi ma daberru simengèkutkensa i Galilea nai, cènder ndaoh-ndaoh janah mengidah karina simasa idi.

⁵⁰Lot mo sada kalak simergerar si Josep kalak Arimatea i nagerri Juda. Kalak selloh ngo ukurna janah ihormati sinterrem ngo ia, janah ia pè memmèma-mèma ngo i Kerajaen Dèbata idi senggep.

⁵¹Oda ngo tuju iakap ukurna pemmakin ni runggu idi, tukasi pè ia masuk bilangen rungguun mbellen.

⁵²Laus mo ia menghadep mi si Latus, ipido mo bangkè Jesus.

⁵³Nai ipesampur mo bangkè Jesus idi i kayu persilang idi nai, ibalut mo dekket kaèn kapan ibas kaèn lennen nai. Nai igamparken mo bangkè idi mi bagasen kuburen sienggo ipahat i sada delleng batu. Oda nung dèng terpakkè kuburen idi.

⁵⁴Ari perkebbasen mi ari Sabat ngo arinna idi, janah oda pella ndekkah nèngè mulai mo ari Sabat.

⁵⁵Daberru-daberru siroh i Galilea nai sirebbakken Jesus idi, ièkutken ngo si Josep lako mengidah kuburen idi. Iidah kalak idi ngo barang bakunè pergampar bangkè Jesus ibagasen kuburen idi.

⁵⁶Nai molih mo kalak idi, ikebbasi mo rempah-rempah dekket minak baungkus lako memminaki bangkè Jesus. Sibarembenkenna, ari Sabat idi, mentadi ngo kalak idi ibas ulanna, mengèkutken pati-patiin.