Read Batak Dairi Lukas 24 Bible Online

Lukas 24 - Batak Dairi bible

Lukas 24

¹Tikan ari Minggu, njengkas kalohoon, laus mo daberru-daberru i mi kuburen merembah rempah-rempah sienggo ihantari kalak idi kin.

²Soh kessa kalak idi mi kuburen, idapet kalak i enggo nggoling batu penutup lubang kuburen idi.

³Nai ibengketti kalak idi mo kuburen idi, tapi oda idah kalak idi bangkè Jesus idi.

⁴Sinderrang cender idi kalak i janah jellak ukurna kerna simasa i, sintempu mo cènder dua kalak merpakèen mbulan merkillok-killok i gembar kalak idi.

⁵Buradan mo kalak idi, nai gabè sujud mo kalak i mersembah soh mi tanoh, mènter idokken sidua kalak idi mo bai kalak i, “Kasa itulusi kènè singgelluh i bekkas simatè?

⁶Oda isèn ia; enggo balik nggelluh ia! Èngèt kènè mo sienggo nidokkenNa i kin bai ndènè sinderrang i Galilea dèng Ia,

⁷imo: Kennah ipesakat ngo Anak Jelma i mi tangan kalak perdosa, nai ipersilangken mo ia, tapi balik nggelluh ngo i ari petelluken.”

⁸Gabè ièngèt daberru-daberru idi mo kata nidokken Jesus idi kin.

⁹Nai balik kessa kalak idi i pendèban idi nai, ibagahken kalak i mo karina simasa i mendahi sisiin sipuluhsada idi dekket mi karina simengèkutkensa sidèbanna i.

¹⁰Ukum daberru-daberru idi imo: si Maria Magdalena, si Johana dekket si Maria inang si Jakobus, dekket daberru-daberru sidèbanna sirebbakken dekket kalak idi.

¹¹Tapi oda tok ukum sisiin idi mi sukuten daberru-daberru idi, ai idokdok ngo sukut-sukuten sambing.

¹²Tapi kèkè mo si Petrus, lojang mo ia mi pendèban. Tungkuk mo ia menengngen mi bagasen, iidah mo pellin kaèn kapan mo kessa i sidi. Lengang kalohoon ngo si Petrus, balik mo ia dekket ukur merkalimesso terrèngèt karina simasa idi.

¹³Sidarinkenna idi ma, laus ngo dua kalak sisiin Jesus mi sada kuta mergerar Emaus, kira-kira sipuluhsada batu daohna i Jerusalem nai.

¹⁴Ninganna merdalan idi kalak i, dak icakapi kalak idi ngo karina terrèngèt simasa i.

¹⁵Sinderrang kiranai idi kalak i, mènter roh mo Jesus mendahi kalak idi gabè rebbakken merdalan.

¹⁶Iidah kalak i ngo Jesus tapi lot memmaingken asa oda itandai kalak i Ia.

¹⁷Idokken Jesus mo taba kalak i, “Kadè ngo pana iranai kènè ninganna merdalan èn?” Terridah ngo ibas abè kalak idi marsak, merradi mo kalak idi merdalan idi.

¹⁸Nai sada bai kalak i nai mergerar si Kleopas mengkuso taba Jesus, “Pellin kono ngo pana simerrian Jerusalem siso memettoh simasa mbaru dèng isidi?”

¹⁹“Kadè pana masa?” nina Jesus mengaloi. “Simasa taba Jesus kalak Nazaret idi,” nina kalak idi. “Ia sada kalak nabi, mergegoh kalohoon ngo ranaNa dekket pemahanNa pè i penengennen Dèbata bang jelma pè.

²⁰Enggo ipesakat imam-imam ekuten dekket pengulu-pengulu bangsanta Ia ihukum matè janah enggo mo ipersilangken Ia!

²¹Harap ngo kami asa Ia naing paluahken Israel! Petellu ariken ènda mo enggo, kessa nai masa bagidi.

²²Nai dèng ma barang piga-piga kalak daberru horong nami memmaing kami gabè tersengget. Ai njengkas kalohon ngo ndaboi laus kalak idi mi kuburen,

²³tapi oda idapet kalak idi nèngè isidi bangkè Jesus. Balik mo kalak idi, janah nina iidah kalak idi ngo malaèkat; idokken malaèkat idi nggelluh ngo Jesus.

²⁴Dèba ma dengan nami enggo laus mi kuburen, idapet kalak idi ngo tuhu bagè sukuten daberru idi, pellin Jesus ngo kessa oda iidah kalak idi.”

²⁵Nai idokken Jesus mo taba kalak idi, “Èo, kènè simoto! Mahal nai kènè percaya mi sinidokken nabi-nabi!

²⁶Mesias Raja Sipaluah niperbagah Dèbata idi, otang kennah menggong simpersuk ngo lako soh mi kemulianNa?”

²⁷Nai ipeterrang Jesus mo taba kalak idi, kadè idokken ibagasen Bibèl terrèngèt diriNa, mulai i bukku si Musa nai soh mi bukku nabi-nabi.

²⁸Ujungna naing soh mo kalak idi mi kuta nitujuna. Ipakulah Jesus mo bagè naing iterrusken merdalan,

²⁹tapi icèkèpi kalak idi mo ia, “Rebbak mo kita” nina kalak idi tabaSa, “ai enggo ramben ari, mataniari pè enggo sundut.” Nai mbengket mo ia rebbak dekket kalak idi.

³⁰Tikan kundul rebbak mangan kalak idi, ibuat Jesus mo roti idi, idokken mo lias atè taba Dèbata, nai ipenggelli mo roti i dekket tanganNa, iberrèken mo bai kalak idi.

³¹Gabè satdar mo kalak idi janah itandai mo ia. Tapi mersep mo Jesus ibas pengidah kalak i nai.

³²Nina kalak idi mo samahsa, “Otang bagè mpeddas ngo ndai siakap tikan kirana Ia dekket kita i tengngah ndalan bak sinderrang ipeterrang ma banta isi Bibèl?”

³³Nai gejapkenna i mènter kèkè mo kalak idi kebbas, balik mo kalak idi mi Jerusalem. Idapet kalak i, enggo tumpu sisiin Jesus sisipuluh sada idi, bagi ma dekket sidèbanna pè.

³⁴Nai idokken sisiin i mo, “Tuhu-tuhu ngo enggo balik nggelluh Tuhan i! Enggo ipetarar diriNa bai si Simon!”

³⁵Nai isukutken sidua kalak i ma mo simasa i tengah ndalan, soh mi penandai kalak i mi Tuhan i tikan memenggelli roti.

³⁶Sinderrang mengeranai kalak i, terrèngèt sindai, sintempu mo cènder Jesus i tengngah kalak idi ninganna mendokken, “Damè mo bai ndènè!”

³⁷Tersengget mo kalak idi janah buradan, idok ngo pana bègu niidah kalak idi.

³⁸Tapi idokken Jesus mo, “Kasa kènè mbiar janah kasa oda percaya kènè?

³⁹Tengngen mo tanganKu dekket nèhèngKu! Aku ngo èn, dadap mo janah tengngen kènè mo: ukum bègu oda ngo merdaging janah mertulan bagè niidah ndènè Aku.”

⁴⁰Ninganna idokken Jesus bagidi, ipacidah mo tanganNa bak nèhèNa taba kalak idi.

⁴¹Tapi kumarna oda dèng kalak i percaya, kemulihken lolo bak lengang, idokken Jesus mo taba kalak idi, “Lot ngo pangaan ndènè isèn bagèndari?”

⁴²Nai iberrèken kalak i mo tabaSa sada ikan pinanggang.

⁴³Ijalo Jesus mo ikan i janah ipangan ipetengngen-tengngen kalak idi.

⁴⁴Enggo kessa i, idokken Jesus mo bai kalak i, “Èn mo sienggo Kudokken i kin taba kènè, nderrang rebbak dèng Aku dekket kènè, ai tersurat terrèngèt Aku ibas Bukku si Musa bak Nabi-nabi dekket Psalm pè, kennah saut ngo i masa.”

⁴⁵Nai ibuka Jesus mo pikiren kalak idi, asa iantusi kalak i nidokken Bibèl.

⁴⁶Idokken Jesus mo taba kalak i, “Tersurat ngo ibas Bibèl, kennah menggong simpersuk ngo Raja Sipaluah niperbagah-bagah Dèbata idi, janah balik nggelluh i ari petelluken.

⁴⁷Tersurat ma ngo, kennah isukutken ngo merkitè gerarna taba karina bangsa, iampuni Dèbata ngo dosa ni kalak simertobat. Berrita idi isiarken mulai i Jerusalem nai.

⁴⁸Kènè ngo gabè saksi terrèngèt karinana idi.

⁴⁹Kupasulak mo mendahi kènè niperbagah-bagah Bapangku. Tapi ulang mo kènè mèrèt ibas kuta ènda nai, pèma roh ipesenggep bai ndènè kuasa Dèbata.”

⁵⁰Enggo kessa i, iarahken Jesus mo kalak i mi ruar kuta sampè soh mi Betania. Ipekimbang mo tanganNa memasu-masu kalak idi.

⁵¹Sinderrang memasu-masu idi Ia, mersirang mo kalak idi, laus mo Ia mi sorga.

⁵²Mersujud mo kalak idi mersembah dempak Jesus, nai molih mo kalak i mi Jerusalem ibagasen merlolo atè kalohon.

⁵³Dak i Bages Dèbata ngo kalak idi memoji-moji Dèbata.