Read Batak Dairi 5 Musa 1 Bible Online

5 Musa 1 - Batak Dairi bible

5 Musa 1

¹Bukku ènda merisiken kata-kata sinipesakat si Musa bai bangsa Israel sinderrang i gurun pasir i lembeng Jordan kalak i. Kan kebincaren Laè Jordan ngo lembeng i, ndessing mi kuta Suf, i kellang-kellang kuta Paran, dekket kuta-kuta Tofel, Laban, Hazerot bak Di-Zahab.

²(I delleng Sinai nai soh mi Kades Barnea mengelausi ladang delleng Edom, daohna sipuluh sada ari merdalan.)

³I ari sada bulan sebellas tahun peempatpuluhken enggo kessa itadingken kalak i Mesir, ipesakat si Musa mo bai bangsa i karina siniperèntahken JAHOWA silako iranaken bai kalak i.

⁴Masa ngo i enggo kessa italuken si Musa si Sihon, raja kalak Amori, simemerèntah i kuta He- sybon, dekket si Og, raja Basan, simemerèntah i kuta Asytarot dekket Edrei.

⁵Asa kan kebincaren laè Jordan i ladang kalak Moab, i si mo perlebbè kalohon ipeterrang si Musa hukum dekket perèntah JAHOWA.

⁶Nina si Musa mo, “Sinderrang merian i Delleng Sinai kita, nina JAHOWA Dèbata ngo, ‘Enggo toko dekkahna kènè i delleng ènda.

⁷Bagèndari pè rontas kènè mo perundung-undungen ndènè janah berkat mo kènè mi ladang si kan delleng kalak Amori dekket mi karina aur sikulilingna, imo Napa Jordan, nagerri simeruruk-uruk dekket simernapa kendet, aur kan selatan dekket biding Laut Tengah. Berkat mo kènè mengiani tanoh Kanaan dekket uruk-uruk sini Libanon soh mi batang laè Efrat simbelgah i.

⁸Aku, JAHOWA, enggo menjandiken karina tanoh i bai empug ndènè si Abraham, si Isak dekket si Jakob bak pinemparna. Asa laus mo kènè mengiani tanoh i.’ ”

⁹Nina si Musa mo taba bangsa i, “Sinderrang merian i Delleng Sinai dèng kita, ningku ngo taba kènè: Mberratsu ngo kuakap tanggung jabab lako menguluken kènè. Oda terulaken pellin sadaku sambing mengu- laken i, kumerna

¹⁰enggo ibaing JAHOWA Dèbata ndènè tambah buè bilangen ndènè bagè buè bintang i langit.

¹¹Katerra pe itambahi JAHOWA, Dèbata empung ndènè mo pukpuk bilangen ndè soh seribu kali lempit, janah memakin kènè gabè bangsa nduma bagè singgo nijandikenNa i.

¹²Tapi bakunè mo persautna mula pellin sadaku sambing lako memersan tanggung jabab bagi belgahna lako peliasken karina persoalen ndènè?

¹³Pilih kènè mo i gennep marga nai barang piga-piga kalak anak laki bijak, singgeddang radumen janah merpengantusi, asa kupebangkit kalak i lako menguluken kènè.

¹⁴Selloh ngo ijalo kènè pengidoen idi.

¹⁵Kumarna i ipas pengulu-pengulu sinipilih ndènè nai, kupebangkit mo barang piga-piga kalak simpantas niasè janah singgeddang radumen lako mengerajai kènè. Dèba nibaing menguluken seribu kalak, dèba menguluken seratus kalak, limapuluh kalak dekket mengu- luken sipuluh kalak. Kupebangkit ma mo pengulu-pengulu sidèbanna lako mengatur marga-marga ndènè.

¹⁶Tikala i kudokken ngo bai kalak i bagèen: Perdatèken mo persilisihen-persilisihen simasa i tengah-tengah bangsa ndènè. Bakin kènè mo hukum sènteng, tah pè i perkara dengan ndènè sada bangsa bang pè kalak sidèban simerian i tengah-tengah ndènè.

¹⁷Ulang mo berrat subellah keputusen ndènè; kennah dos ngo adilna hukum ndènè bai karina kalak sinihukum ndè, ulang lot kalihna barang isè pè kalakna. Ulang mbiar barang midah isè pè, kumerna bai Dèbata nai ngo rohna keputusen sinibahanken ndènè i. Mula lot sada perkara mahalsu iakap kènè, sohken kènè mo taba aku, asa aku menimbangi dekket memutusken.

¹⁸Tikala idi pè kupeddahken ma ngo bai ndènè tersèngèt sagumanna sidèbanna dèng sikennah ulaenken ndènè.”

¹⁹“Nai rembang mi perèntah JAHOWA Dèbatanta, sitadingken mo Delleng Sinai janah merdalan memellus gurun pasir mbellang janah ntengngam menuju uruk kalak Amori. Sinderrang sakat kita mi Kades Barnea,

²⁰kudokken mo: Bagèndari enggo sakat kènè mi uruk ladang kalak Amori, tanoh siniberèken JAHOWA Dèbatanta dekket Dèbata empungta. Tengngen kènè mo, enggo hantar i lebbè ndènè tanoh i. Berkat mo kè lako mengiani bagè sieggo iperèntahken JAHOWA. Ulang kènè roga barang mbiar.

²²Tapi roh ngo kènè mendahi aku janah mendokken, ‘Lotien mo sipasulak barang piga-piga kalak solo-solonta lako merkakap nagerri idi asa ndorok ibagahken kalak i banta arap dalan apai sikennah bellusenta janah bakunè rumang kuta sinaing dahinta idi.’

²³Kuuèi ngo pengidoen i, kerna i kupilih mo sipuluh dua kalak, sada kalak i gennep marga nai.

²⁴Ibengketti kalak idi mo ladang sini uruk i soh mi Kendet Eskol, ninganna mengagahisa.

²⁵Nai balik mo kalak i mendahi kita merembah buah sidapet kalak i isidi nai janah ibagahken ukum nagerri sinaing berènken JAHOWA Dèbatanta idi nggabur kaloen ngo.

²⁶Tapi itonja kènè ngo perèntah JAHOWA Dèbata ndènè janah oda uè kènè memengketti nagerri idi.

²⁷Dak ngut-nguten ngo kènè bagèen, ‘Nggogo ngo atè JAHOWA banta. Nai ibabai mo kita mbungkas i Mesir nai lako menohken kita mi tangan kalak Amori asa ibunuh kalak idi kita.

²⁸Nai merkadè mo kita mi si? Kalak sienggo sipasulak mi sidi memaing kita buradan merkitè ibagahken kalak idi mergegohen janah mbengisen ngo bangsa sinisidi daripada kita, janah merian ngo kalak i ibas kuta simerpagar songket mi langit. Idah kalak i ngo jelma ntuara i sidi.’

²⁹Tapi ningku mo: Ulang kènè mbiar midah kalak i.

³⁰JAHOWA Dèbata ndènè ngo menguluken kènè janah juhap lako bai ndènè bagè sienggo isaksiken kènè i Mesir,

³¹bak i gurun pasir. Idah kènè ngo barang bakunè carana JAHOWA Dèbata ndènè mengarak kènè ibagasen kinijuah sidekkah i perdalanen idi soh mi bekkas ènda, oda lot kalihna bagè sada kalak pertua menempi dukakna.

³²Tapi tukasi pè kudokken bagi, tong ngo kènè oda tok taba JAHOWA Dèbata ndènè,

³³si merdalan i lebbè ndènè lako menulusi bekkas ndènè merundung-undung. Ia petuduhken dalan bai ndènè tikan berngin merkitè tihang api, janah tikan mahar merkitè tihang hembun.”

³⁴“Idengkoh JAHOWA mo ungut-ungut ndènè i, nai gabè melaga mo Ia. Isempetaken mo,

³⁵‘Sada kalak poda ibas cundut jahat ènda nai memengketti nagerri nggabur siKujandiken bai empung ndènè i.

³⁶Pellin si Kaleb, dukak si Jefune ngo kessa mbengket mi si, kumerna hot ngo ia setia taba Aku. Kuberrèken mo bai si Kaleb dekket bai pinemparna nagerri sienggo niagahenna i.’

³⁷Kènè ma ngo pandè ulah memaing melaga JAHOWA taba aku, janah idokken, ‘O Musa, kono pè oda ndorok memengketti nagerri idi.

³⁸Tapi pesobar mo ukur pengurupimu si Josua dukak si Nun. Ia ngo menguluken Israel menaban tanoh idi.’

³⁹Nai nina JAHOWA mo taba kita karina, ‘Dukak-dukak ndènè sikètèk kalohon dèng lako membijaken simerandal bak nggodo, imo anak-anak sinidokken ndènè sinaing itaban musuh-musuh ndènè, bai kalak i mo naing Kuberèken tanoh i, janah kalak i mo mengianisa.

⁴⁰Tapi ukum kènè, balik mo kènè mi gurun pasir arap dalan menuju Suak laut Akaba.’

⁴¹Nai ialoi kènè mo, ‘Alè Musa, enggo merdosa kami taba JAHOWA. Tapi bagèndari nggèut ngo kami berkat mergeraha bagè siniperèntahken JAHOWA, Dèbatanta.’ Nai gennep mo i tengah-tengah ndènè nai kebbas lako geraha, ai dok atèna murah ngo ukum menjuhap ladang sini uruk-uruk i.

⁴²Tapi nina JAHOWA mo taba aku, ‘Ulang belli kalak i mergeraha, kumerna oda ngo Kudengani kalak i, asa ulang italuken musuhna idi kalak i.’

⁴³Kubagahken mo taba kènè kadè sinidokken JAHOWA, tapi oda isarihken kènè. Ialo kènè ngo perèntah JAHOWA, janah ibagasen jukkat ngo kènè laus mi ladang siniuruk i.

⁴⁴Nai toram mo kalak Amori simengiani bekkas kan uruk i mengalo kènè. Nterrem kalohon ngo bilangen kalak i, bagè peremmut renggicing. Ijalang kalak i mo kènè sakat mi Horma, nai italuken mo kènè i ladang uruk Edom.

⁴⁵Nai balik mo kènè janah tenggo-tenggo taba JAHOWA lako mengido pengurupien, tapi oda nggèut Ia mendengkohken bang mendatèken kènè.”

⁴⁶“Nai enggo kessa i merian i Kades mo kita ndekkah kalohon.