Read Batak Dairi 5 Musa 12 Bible Online

5 Musa 12 - Batak Dairi bible

5 Musa 12

¹“Enda mo pati-patiin sikennah uèen ndènè sidekkah nggelluh ndènè i nagerri siniberèken JAHOWA, Dèbata empung ndènè bai ndènè.

²Enggo kessa mbengket kènè mi nagerri i kennah rumpakken kènè karina bekkas pemelèen i babo delleng-delleng ndates, i uruk-uruk dekket siniterruh kayu ntemtem, bekkas bangsa simerian i sidi menembah dèbata-dèbata kalak i.

³Rumpakken kènè mo langgaten-langgaten kalak i janah reppukken pandak-pandak batu siniètong kalak idi keramat. Tutung kènè mo tanda-tanda Asyera, janah reppuk kènè mo gana-ganaen sembahen kalak i, asa ulang nèngè isembah dèbata-dèbata sibagidi i bekkas idi.

⁴Tikan isembah kènè JAHOWA Dèbata ndènè, ulang mo osih kènè bagè pemaing kalak i menembah Dèbata kalak i.

⁵Ibas karina ladang marga-marga Israel nai, ipilih JAHOWA Dèbata ndènè ngo sada bekkas asa ndorok roh bangsanta mi lebbèNa janah menembahSa.

⁶Mi bekkas idi mo kennah embahen ndènè pèlèen-pèlèen situtungen bang pèlèen-pèlèen sidèbanna, pèlèen persipuluhen ndènè bak pèlèen sidèban, pèlèen penggarar sininiatkenmu kin, pèlèen sitergerrek ibas ukur dekket anak lembu dekket kambing bak biri-biri siperlebbè tubuh.

⁷I sidi ma mo i hadeppen JAHOWA Dèbata ndènè, kènè rasken dekket karina simpangaen ndè kennah mangan janah merlolo atè kumerna merhasil sinibahan ndènè ipasu-pasu JAHOWA Dèbata ndènè.

⁸Mula enggo dapet katikana i, ulang nè mo bakin kènè bagè ulah-ulah ndè sibagèndari i. Ai soh mi bagèndari mersembah ngo kènè bakunè lemmo atè ndènè,

⁹kumerna oda dèng mbengket kènè mi nagerri siniberrèken JAHOWA Dèbata ndènè bai ndènè, bekkas ndènè merian ibagasen damè.

¹⁰Enggo kessa isuberrangi kènè Laè Jordan, iurupi JAHOWA Dèbata ndènè mo kènè menaban dekket mengiani tanoh sinikèpar laè i. Ijamoti ngo kè ipas karina musuh nai, janah nggelluh ibagasen damè dekket kemènaken mo kènè.

¹¹Enggo kessa i ipilih JAHOWA Dèbata ndènè mo sada bekkas mahan bekkas ndènè kennah menembahSa. Kennah mi si mo kènè merembah karina sienggo kuperèntahken, imo pèlèen situtungen dekket pèlèen sidèbanna, pèlèen persipuluhen dekket pèlèen simerkedekoen sienggo ijanjiken kènè bai JAHOWA.

¹²Merlolo atè mo i hadeppen JAHOWA Dèbata ndènè, rebbakken dekket dukak-dukak ndènè, naposo-naposo ndènè bak kalak Lewi simerian i kuta ndènè, kumerna oda menjalo jambar tanoh kalak Lewi i nagerri ndènè.

¹³Oda ndorok kènè memèlèken pèlèen ndènè i sembarang bekkas sinipilih ndènè sendiri,

¹⁴tapi pellin i bekkas sinipilih JAHOWA ngo kessa. Pellin i sidi sambing ngo kessa kènè memèlèken pèlèen situtungen dekket mengulaken sidèbanna sikuperèntahken taba kènè.

¹⁵Tapi lemmo ndènè ngo lako menèat pinakan ndènè dekket kipangan jukutna barang i dikè sambing kènè merian. Ndorok ngo kènè kipangan barang sadikè buèna iberèken JAHOWA Dèbata ndènè bai ndè. Gennep jelma tah mpanting pè ia barang tah melamun, ndorok ngo kipangan jukut i, bagè kènè ndorok kipangan jukut rigarung barang balkih.

¹⁶Pellin darohna ngo kessa oda ndorok ipangan, tapi kennah iorèken mi tanoh bagè laè.

¹⁷I bekkas ndènè merian i oda ndorok kènè kipangan pèlèen persipuluhen ibas pagè ndènè nai, anggur ndènè, minak Zaitun ndènè, lembu barang pè kambing bak biri-biri ndè siperlebbè tubuh, pèlèen penggarar niat ndènè, pèlèen gerrek atè barang pèlèen sidèbanna.

¹⁸Kènè dekket dukak-dukak ndènè, rebbak dekket naposo-naposo ndènè dekket kalak Lewi simerian i kuta ndènè, kennah i hadeppen JAHOWA Dèbata ndènè ngo kipangan pèlèen idi, imo bekkas sinipilih JAHOWA Dèbata ndènè. Janah i bekkas idi mo kènè kennah merlolo atè kumerna karina usaha ndènè.

¹⁹Datèken kènè mo asa ulang sanga ibelli kènè rapar kalak Lewi sidekkah nggelluh kènè i nagerri i.

²⁰Enggo kessa ipebellang JAHOWA Dèbata ndènè perbalengen nagerri ndènè bagè sinijanjikenNa, ndorok mo kènè kipangan jukut tuk gegoh bak roh gèut ndènè.

²¹Mula ndaohsu ngo bekkas sinipilih JAHOWA Dèbata ndènè i bekkas ndènè nai, ndorok ngo sembellih kènè sada lembu, biri-biri barang kambing siniberèken JAHOWA bai ndènè, janah kipangan jukutna i bekkas ndènè bakunè ipergeddo ukur ndènè, bagè sienggo kudokken bai ndènè.

²²Karina jelma, tah mpanting ia barang melamun, ndorok ngo kipangan jukut i, bagè kènè ndorok kipangan jukut balkih barang jukut rigarung.

²³Tapi jukut simerdaroh dèng oda ndorok ipangan, kumerna ibagasen daroh i ngo kessah, janah oda ndorok kènè kipangan kessah rebbak dekket jukutna.

²⁴Ukum darohna oda ndorok panganen, tapi kennah iorèken ngo mi tanoh bagè laè.

²⁵Mula iuèi kènè ngo perèntah idi lolo ngo JAHOWA, jadi sayur ntua mo kènè bak pinempar ndènè.

²⁶Karina pèlèen sienggo nijandiken ndènè bai JAHOWA, kennah taruhken kènè mi bekkas sinitentuken JAHOWA.

²⁷Pèlèen situtungen dekket pèlèen panganen jukutna kennah ipèlèken i babo langgaten idi.

²⁸Peratè-atèken mo mendè karina sienggo kudokken bai ndènè, nai ulaken kènè mo si merandal dekket sinikelemoken JAHOWA Dèbata ndènè, asa sayur ntua kènè bak pinempar ndènè soh sidekkah-dekkahna.”

²⁹“Iripasken JAHOWA Dèbata ndènè mo karina bangsa simerian i nagerri idi, asa gabè ndorok itaban dekket iiani kènè.

³⁰Enggo kessa iripasken bangsa-bangsa idi, mermanat mo kènè ulang gabè iosih kènè nola kalak i menembah dèbata-dèbata sidèban, kumerna perohken kememago ngo perulaen sibagidi.

³¹Ulang mo osih kènè bagè pemakin bangsa- bangsa i menembah dèbata-dèbatana lako menembah JAHOWA Dèbata ndènè, kumerna mersembah ngo kalak i merkitè mengu- laken perulaen-perulaen luhlah sinikecegoken JAHOWA. Soh mi dukak-dukak kalak i sendiri pè itutung kalak i ngo i babo langgaten mahan pèlèen bai dèbata-dèbata kalak i.

³²Ulaken kènè mo karina sikuperèntahken bai ndènè i; ulang tambahi barang kurangi.