Read Batak Dairi 5 Musa 13 Bible Online

5 Musa 13 - Batak Dairi bible

5 Musa 13

¹Tah lot sada kalak nabi barang pengelapati nipi menjandiken sada kelengangen barang pè kelèganen

²mertujuen asa mersembah janah merpenguèi kènè taba dèbata-dèbata siso nung itandai kènè, agia nola pè tuhu-tuhu masa sinidokkenna i,

³ulang berrè ukurmu tabasa. Ipakkè JAHOWA Dèbata ndènè ngo kalak i lako mengoji kènè, lako menengen barang tah tuhu-tuhu ma ngo kènè mengkekelengi JAHOWA barang tah oda.

⁴Kennah ihukum matè ngo kalak sibagidi, kumerna naing ilalingken nola kènè ipas dalan siniperèntahken JAHOWA Dèbata nai bai ndènè. Jelma jahat ngo kalak sibagidi kumerna iajar-ajari kènè mengalo JAHOWA Dèbata ndènè sipaluahken kènè i Mesir nai, bekkas ndènè i perhamba. Jadi kennah bunuhen ngo Ia asa mèntep kejahaten sibagidi. Tapi ukum kènè naing mo mengèkutken JAHOWA Dèbata ndènè, janah pesangapkensa; uèi mo Ia janah ulaken karina perèntahNa. Dak tong mo kènè setia janah merpenguèi tabasa.

⁶Tah lot denganmu sibeltek, barang tah anakmu barang berrumu, barang pè sinibagesmu sinikekelengenmu barang supan-supanmu mboni-mboni mengajar-ngajari kono lako menembah dèbata sidèban siso tinandaen ndènè janah oda itandai empung ndènè, dèbata bangsa-bangsa simerian ndessing barang ndaoh,

⁸ulang dengkohken ia janah ulang duè dirimu iajar-ajari. Ulang masèh atèmu bana barang iondingi ko nola ia.

⁹Kennah ibentiri ngo ia dekket batu soh matè. Kennah kono ngo lebbèen mengkebekkisa, nai ipè asa ièkutken karina jelma nterrem. Kennah ibunuh ngo kalak simersalah idi, kumerna naing ngo ia pedaohken kènè bai JAHOWA Dèbata ndènè nai sipaluahken kita i perhambaen Mesir nai.

¹¹Nai karina mo bangsa Israel mendengkoh tersèngèt pemunuhen i janah gabè mbiar, gabè sada kalak nè poda lot memakin kejahaten sibagidi.

¹²Mula enggo kessa iani kènè sikali èn kuta siniberèken JAHOWA Dèbata ndènè bai ndè, tah bakunè terbertik baritana

¹³lot barang piga-piga kalak jahat i bangsa ndènè nai enggo mengelalingken pengisi kuta i lako menembah dèbata siso nitandaen ndènè.

¹⁴Mula lot terdengkoh bertik sibagidi, perdatèken kènè mo mendè. Mula tuhu-tuhu ngo enggo masa kejahaten idi,

¹⁵kennah ibunuh ngo karina pengisi kuta i bak pinakanna pè. Kuta idi pè kennah irumpakken karina.

¹⁶Karina ugasen pengisi kuta i kennah ipepulung janah itèmbun i tengah kasèan, nai kennah itutung mo kuta i dekket karina ugasenna sikira pèlèen bai JAHOWA Dèbata ndènè. Enggo kessa bagidi karinana idi kennah itadingken gabè terulang janah oda ndorok nè ipekadè.

¹⁷Karina ugasen si kenna sempetta idi oda ndorok ipennep lako bai ndènè, tapi kennah ibinasaken ngo karina. Nai malap mo laga JAHOWA janah mermasèh atè mo Ia bai ndènè. Lemmo mo atèNa midah kènè janah ibaing mo kènè gabè bangsa mbellen rembang mi siniperbagahNa taba empung ndènè

¹⁸asal mo iuèi kènè karina sinidokkenNa sikupesakat taba kènè i ari sidari èn, janah mengulaken karina sinipergeddoNa.”