Read Batak Dairi 5 Musa 14 Bible Online

5 Musa 14 - Batak Dairi bible

5 Musa 14

¹“Bangsa JAHOWA Dèbata ndènè ngo kè. Asa mula tikan bonek kènè kumarna lot jelma matè, ulang mo ugahi kènè diri ndènè barang mencukkur perjumbaken ndènè bagè pemaing bangsa sidèban.

²JAHOWA Dèbata ngo sidasa kènè; kènè ngo sinipilih Dèbata, ibas karina bangsa sinibabo tanoh èn.”

³“Ulang pangan binatang haram sinidokken JAHOWA mak ndorok panganen.

⁴En mo binatang-binatang sindorok panganen ndènè: lembu, biri-biri, kambing,

⁵balkih, biri-biri rambah, kambing rambah, rigarung

⁶dekket karina binatang siso taka dua cikilina janah merbituka ulak-ulak.

⁷Oda ndorok panganen ndènè binatang siso taka dua cikilina janah oda merbituka ulak-ulak. Ulang pa- ngan unta, kelinci barang pè marmut. Haram ngo binatang i kumerna mula pè merbituka ulak-ulak, tapi oda taka dua cikilina.

⁸Ulang pangan babi. Haram ngo binatang i, kumerna kasi pè taka dua cikilina, oda ngo merbituka ulak-ulak. Oda ndorok panganen jukutna, bangkèna pè oda ndorok ijamah.

⁹Ndorok ngo panganen ndènè karina matcam bagè ikan simerkapi-kapi bak mersisik.

¹⁰Binatang singgelluh ibagasen laè tapi oda merkapi-kapi janah oda mersisik haram ngo i, asa oda ndorok panganen.

¹¹Ndorok ngo panganen ndènè karina matcam bagè manuk-manuk siso haram.

¹²Tapi lot ngo barang piga bagè manuk-manuk siso ndorok ipangan, imo: manuk-manuk rajawali, lengkupa, karina matcam bagè keliki, soridi, kak, manuk-manuk unta, kincir laè, torngak-torngak, dekket karina matcam sibarung, tarak-tarak, kalompinis dekket ringkaber.

¹⁹Karina penerren merkabeng haram ngo i, jadi mak ndorok ipangan.

²⁰Binatang merkabeng siso haram ndorok ngo ipangan.

²¹Oda ndorok panganen ndènè binatang matè bagi sambing, tapi ndorok ngo ipangan kalak sidèban simerian i tengah-tengah ndènè, barang idèa bai bangsa sidèban. Ukum kènè bangsa sinipilih ngo kènè bai JAHOWA Dèbata ndènè. Jukut anak biri-biri barang anak kambing oda ndorok iroroh rasken bak laè susu indungna.”

²²“Gennep tahun kennah pejaè kènè sipersipuluh ibas karina hasil tanoh ndènè nai.

²³Ihadeppen JAHOWA Dèbata ndènè, i bekkas sinipilihNa, kennah pangan kènè pèlèen persipuluhen ibas pagè nai, laè anggur, minak zaitun bak anak lembu dekket kambing bak biri-biri ndènè perlebbè tubuh. Ulaken kènè mo idi asa soh sidekkahna kènè dak merguru pesangapken JAHOWA Dèbata ndènè.

²⁴Mula ndaohsu bages ndènè i bekkas sinipilih JAHOWA Dèbata ndènè nai, gabè oda terembah kènè sipersipuluh ibas hasil tanoh siniberèken JAHOWA Dèbata bai ndènè mi sidi,

²⁵dèaken kènè mo sinipejaè ibas hasil tanoh ndènè idi nai, janah embah mo tokorna i mi bekkas sinipilih JAHOWA Dèbata ndènè i.

²⁶Tokorken kènè mo kèpèng idi mi barang kadè sambing lemmo atè ndènè lembu barang kambing, biri-biri, laè anggur barang ènumen mperngis, nai i bekkas i, i hadeppen JAHOWA Dèbata ndènè, kennah rebbak kipangan mo, kènè bak dukak-dukak ndènè janah mersennang-sennang.

²⁷Ulang cubelli kènè taba kalak Lewi simerian i kuta ndènè; èngèt mo, ukum kalak i oda lot tanohna sendiri.

²⁸Gennep i punca tahun petelluken, kennah taruhken kènè sipersipuluh bagian ibas hasil tanoh ndènè nai janah ipepulung i kuta ndènè.

²⁹Bai kalak Lewi ngo pangaen idi kumerna oda mertanoh kalak i, dekket bai kalak sidèban, anak-anak siso merbapa siso merinang dekket bai simbalu silot i kuta ndènè. Ndorok mo roh kalak i janah memuat nasa siniperluken kalak i. Mula bagi ngo ibakin kènè, ipasu-pasu JAHOWA Dèbata ndènè mo karina usaha ndènè.”