Read Batak Dairi 5 Musa 15 Bible Online

5 Musa 15 - Batak Dairi bible

5 Musa 15

¹“Gennep i punca tahun pepituken kennah baing kènè menelangsaèken utang.

²Bagèen mo carana. Gennep kalak Israel sipejualken kèpèng bai denganna sada bangsa, kennah iselangsaèken ngo utang i, kumerna mengèkutken keputusen JAHOWA sendiri enggo iselangsaèken utang idi, asa oda ndorok nèngè tungguen idi.

³Ndorok ngo itunggu kènè kèpèng sinipejual ndènè bai kalak sidèban, tapi oda ndorok nèngè menunggu kèpèng sinipejual ndènè bai dengngan ndènè sada bangsa.

⁴Ipasu-pasu JAHOWA Dèbata ndènè mo kènè i nagerri siniberrèkenNa bai ndènè. Nai oda mo lot ncor i tengah-tengah bangsa ndènè,

⁵asal mo dak merpenguèi kènè bai JAHOWA Dèbata ndènè, janah dak jamot kènè mengulaken karina sikuperèntahken bai ndènè i ari sidari èn.

⁶Itumpak JAHOWA Dèbata ndènè ngo kènè bagè siniperbagahNa i. Ipejual kènè mo riar ndènè bai mèduk bangsa, tapi ukum kènè oda ngo merjual; mèduk ngo bangsa irajai kènè, tapi ukum kènè oda ngo irajai.

⁷Mula enggo merian kènè sikali èn i nagerri siniberèken JAHOWA Dèbata ndènè bai ndènè, nai lot mo i kuta ndènè i dengan ndènè sada bangsa sikekurangen, ulang mo kènè menarihken diri ndènè sambing janah oda uè lako mengurupisa.

⁸Baliksa, kennah mermasèh atè ngo kènè janah pejualken bai kalak i sadikè perlu bana.

⁹Ulang tonja kènè pejualken bana merkitè cudalihen enggo njolmit tahun menelangsaèken utang. Ulang padiat perukuren jahat sibagidi mbengket mi bagasen ukur ndènè. Mula oda uè kènè pejualken, dilo-dilo mo kalak i taba JAHOWA lako mengaduken kènè, nai gabè salah mo kènè.

¹⁰Ibagasen lolo janah sampang atè mo kènè memerèken bana nai itumpak JAHOWA Dèbata ndènè mo nasa ulaen ndènè.

¹¹Dakdak ngo lot barang piga-piga kalak ncor dekket kalak sikekurangen i tengah-tengah kalak Israel. Kumernana i mo asa kuperèntahken taba kènè lako mermasèh atè taba kalak i.”

¹²“Mula lot sada kalak anak laki barang daberru i bangsa ndènè nai mendèa dirina gabè hamba ndènè, kennah mahan bahaen mo ia rebbak kènè ennem tahun dekkahna. I tahun pepituken kennah selangsaènken ndènè mo ia.

¹³Hamba siniselangsaèken idi oda ndorok ibelli bagi sambing laus mengambè.

¹⁴Berèken mo bana ibas mbersih ukurmu nai barang kadè siniberèken JAHOWA Dèbata ndènè taba kènè imo kambing, biri-biri, pagè dekket anggur.

¹⁵Èngèt mo, kènè pè arnia hamba ngo i Mesir, nai ipaluahi JAHOWA Dèbata ndènè; kumerna i ngo asa kubaing hatoren ènda taba kènè.

¹⁶Tapi mula oda nggèut laus hamba idi kumerna ngkelleng atèna taba kènè sisimpangaen, janah sennang iakap rebbak kènè,

¹⁷arahken mo ia mi pèntu bages ndènè janah tindik mo copingna, nai gabè hamba ndènè mo ia sidekkah nggelluhna. Bagi ma mo tong bakin kènè taba hamba ndènè daberru.

¹⁸Mula ipaluah kènè sada kalak hamba, ulang kè peselsel, kumerna sidekkah ennem tahun ia enggo mahan bahaen rebbak kènè menjalo sitengah upah sada kalak perkebbas. Ulaken kènè mo perèntah idi, nai ipasu-pasu JAHOWA Dèbata ndènè mo nasa ulaen ndènè.”

¹⁹“Anak lembu dekket kambing, biri-biri tonggal siperlebbè tubuh kennah ipèlèken bai JAHOWA Dèbata ndènè. Oda ndorok ibaing lembu i menarik tinggala, janah biri-biri idi oda ndorok igonting.

²⁰Gennep tahun kennah pangaen kènè sisimpangaen mo jukutna i hadeppen JAHOWA Dèbata ndènè, i bekkas sinipilih JAHOWA.

²¹Tapi mula mertikas ngo pinakan i, umpamana mekkah-ekkah barang pètung, barang tikas mbellen sidèbanna, oda ndorok pèlèenken ndènè idi bai JAHOWA Dèbata ndènè.

²²Gennep jelma, tah mpanting barang pè tah melamun, ndorok ngo kipangan i i bages, bagè kipangan jukut balkih barang rigarung.

²³Darohna oda ndorok ipangan, tapi kennah iorèken ngo mi tanoh bagè laè.”