Read Batak Dairi 5 Musa 16 Bible Online

5 Musa 16 - Batak Dairi bible

5 Musa 16

¹“Pèstaken kènè mo Paskah i bulan Abib lako pesangapken JAHOWA Dèbata ndènè, kumerna tikan i bulan idi, tupung berngin, ipaluah kènè i Mesir nai.

²Laus mo kènè mi bekkas sinipilih JAHOWA lako menèat sada kambing, biri-biri barang pè lembu ndènè mahan pèlèen Paskah lako pesangapken JAHOWA Dèbata ndènè.

³Pèlèen Paskah idi kennah ipangan merdengan roti siso meragi. Pitu ari dekkahna kennah mangan roti siso meragi kènè, bagè tikanna rada-rudu kènè menadingken tanoh Mesir. Pangan kènè mo roti i, imo roti sinigeraren roti kinidersa, asa sidekkah nggelluh ndènè dak tong ièngèt kènè ari tikala itadingken kènè tanoh Mesir, bekkas ndènè menggong kinidersa.

⁴Sidekkah pitu ari i suberri nagerri ndènè sada kalak poda ndorok memennep ragi i sapona. Jukut pinakan sinisèat i berngin perlebbè i kennah kerri ipangan bernginkenna i ma.

⁵Pinakan mi Pèsta Paskah kennah i bekkas sinipilih JAHOWA Dèbata ndènè ngo isèat, janah oda ndorok ukum i bekkas sidèban i suberri aur siniberrèkenNa bai ndènè. Kennah lebbè sundut ngo mataniari asa bahan kènè i, bagè tikanna itadingken kènè tanoh Mesir.

⁷Belgang kènè mo jukut idi janah pangan mo i bekkas sinipilih JAHOWA Dèbata ndènè, nai balik mo kènè ceggen sibarembenkenna mi bages ndènè.

⁸Nai sidekkah ennem ari nai perrèkut kennah tong kènè mangan roti siso meragi. I ari pepituken kennah pulung kènè lako menembah JAHOWA Dèbata ndènè. Ulang kè mahan bahaen tupung ari i.”

⁹“Kèrah kènè mo pitu minggu mulai i ari perlebbè nai kènè memotik pagè,

¹⁰nai pèstaken kènè mo Pèsta Peranien lako pesangapken JAHOWA Dèbata ndènè. Tupung arinkenna i iembah kènè mo pèlèen belgah-belgah atè tabasa mengèkutken buèna pasu-pasu sienggo iberèken bai ndènè.

¹¹Ihadeppen JAHOWA Dèbata ndènè, i bekkas sinipilihNa, kennah mersampang atè ngo kènè rasken dekket dukak-dukak ndènè, hamba-hamba ndènè dekket kalak Lewi, kalak sidèban, anak melumang dekket simebalu simerian i kuta ndènè.

¹²Mertuhu-tuhu mo uèi kènè karina siniperèntahkenNa, janah ulang kènè lupa, hamba ngo kènè arnia i Mesir.”

¹³“Enggo kessa pul karina pagè ndènè ipennep kènè dekket karina buah anggur ndènè pul iperroh, kennah rayaken kènè Pèsta Sapo-sapo Bulung pitu ari dekkahna.

¹⁴Mersennang-sennang mo kènè rasken dekket dukak-dukak ndènè, hamba ndènè, kalak Lewi, kalak sidèban, anak melumang dekket kalak simbalu simerian i kuta ndènè.

¹⁵Pitu ari dekkahna kennah pèstaenken ndènè pèsta idi lako pesangapken JAHOWA Dèbata ndènè i bekkas sinipilih JAHOWA. Meroang-oang mo kènè, kumerna enggo ipasu-pasu JAHOWA Dèbata ndènè hasil tanoh dekket ulaen ndènè.

¹⁶Karina anak laki Israel kennah roh lako menembah JAHOWA Dèbata ndènè i bekkas sinipilihNa tellu kali sitahun, imo tikan ari Pèsta Paskah, tikan Pèsta Peranien dekket Pèsta Sapo-sapo Bulung. Gennep jelma kennah merembah pèlèen

¹⁷rembang mi siterbaingsa, tosè mi buè sibasa-basa siniberèken JAHOWA Dèbata ndènè tabasa.”

¹⁸“I gennep kuta siniberèken JAHOWA Dèbata ndènè bai ndènè, kennah pebangkiten ndènè ngo perhukum dekket pengendeng-pengendeng sidèban lako pedalanken hukum sènteng bai ginemgem.

¹⁹Lako mahanken keputusen, mak ndorok kalak idi memakin lemmo-lemmona barang berrat sebellah. Oda ndorok ma kalak i menjalo sisip, kumerna sisip idi ngo pepètungken jelma bang simpantasniasè dekket kalak bujur, gabè memakin keputusen siso sènteng.

²⁰Kennah dak tong ngo kènè ntèger asa ndorok dak tong hot kènè janah sayurntua i tanoh siniberèken JAHOWA Dèbata ndènè bai ndè.

²¹Mula ipajek kènè langgaten bai JAHOWA Dèbata ndènè, ulang bakin kènè gana-gana kayu sembahen Asera i gembarna,

²²janah ulang pecènder tihang mahan bekkas menembah sembahen, kumerna nggogo ngo atè JAHOWA Dèbata ndènè midah ulah-ulah sibagidi.