Read Batak Dairi 5 Musa 18 Bible Online

5 Musa 18 - Batak Dairi bible

5 Musa 18

¹“Karina marga Lewi iberrè ulaen imam, kumerna i oda ndorok menjalo perbagien tanoh i Israel. Kennah nggelluh ipas pèlèen nai dekket pèlèen-pèlèen sidèbanna siniberèken bai JAHOWA ngo kalak i.

²Oda ndorok kalak i mertanoh bagè marga-marga sidèbanna, kumerna JAHOWA ngo jambar uaris bai kalak i, bagè sienggo iperbagah JAHOWA bai kalak i.

³Mula lot sada kalak memèlèken pèlèen lembu barang biri-biri, kennah iberèken mo kaè jolo, isang dekket bituka pinakan i taba imam mahan sulang kalak i.

⁴Hasil perlebbè ibas pagè, anggur, minak zaitun dekket buk biri-biri nai, tong ngo i sulang kalak i.

⁵Ibas karina marga Israel nai, enggo ipilih JAHOWA Dèbata ndènè marga Lewi gabè imam soh mi amman sumendah.

⁶Mula lot sada kalak Lewi roh barang i kuta dikè nai silot i Israel roh mi bekkas sinipilih JAHOWA janah uè merian i si,

⁷ndorok ngo ia merkebbas bai JAHOWA Dèbatana tosè bagè imam kalak Lewi sidèbanna simengula i bekkas idi.

⁸Kennah menjalo panganen ngo Ia dos buèna bagè imam-imam sidèbanna; barang kadè sinijalona bai kadè-kadèna nai, tong ma ngo bana idi.”

⁹“Mula enggo kessa ibengketti kènè nagerri siniberèken JAHOWA Dèbata ndènè bai ndènè, ulang mo osih kènè kejahaten siniulaken bangsa-bangsa silot i sidi.

¹⁰Ulang lot bai ndènè nai memèlèken dukak-dukakna mahan pèlèen situtungen. Janah ulang ma lot sada kalak pè gabè pertendung, dak menulusi tanda-tanda, memakè tabas-tabas barang perhèlmu du- nia,

¹¹barang pesellukken sumangan.

¹²Iketcegoken JAHOWA Dèbata ndènè ngo kalak simengulaken perulaen jahat sibagidi, janah kumernaken sibagidi ngo asa ipuari bangsa-bangsa idi i hadeppen ndènè nai.

¹³Jadi kennah merpenguèi ngo kènè taba JAHOWA Dèbata ndènè ibas nasa pusuh peratèen ndènè nai.”

¹⁴Nai enggo kessa i idokken si Musa nola mo, “Ukum bangsa-bangsa i nagerri sinaing ianen ndènè idi dak iuèi ngo peddah pertendung dekket simenulusi tanda-tanda. Tapi ukum kènè oda iduè JAHOWA Dèbata ndènè mengulaken sibagidi.

¹⁵Tapi i bangsanta nai sendiri naing ipecèndek ngo bai ndènè sada kalak nabi bagè aku èn, janah kennah uèi kènè Ia.

¹⁶Tikan arinkenna merpulung kènè i Delleng Sinai, ipengidoken kènè ngo asa ulang nèngè idengkoh kènè JAHOWA Dèbata ndènè mengerana janah ulang nèngè mengidah pekirohNa ibas api mergollah-gollah, kumerna mbiar kènè matè.

¹⁷Kumerna i idokken JAHOWA mo taba aku, ‘Selloh ngo pengidoen kalak idi i.

¹⁸Kupasulak mo sada nabi bai kalak i i bangsa kalak i nai sendiri tosè bagè kono. Kubagahken mo tabasa barang kadè si kennah dokenkenna, nai ibagahken mo bai bangsa idi karina siKuperèntahken.

¹⁹Mengerana mo ia merkitè gerarKu, janah Kuhukum mo barang isè sambing siso mendengkohkensa.

²⁰Tapi mula lot pang nabi pesakatken tennah merkitè gerarKu keppèken oda lot Kudokken ia mengulaken bagidi, kennah matè ngo ia; bagi ma ngo nabi simengerana merkitè gerar dèbata sidèban kennah matè.’

²¹Tah bakunè lot kuso-kuso kènè ibas ukur ndènè, ‘Bakunè mo pemettoh nami tah bai JAHOWA nai sinidokken nabi idi barang oda?’

²²Mula lot sada kalak nabi mengerana merkitè gerar JAHOWA, tapi oda saut masa bagè sinidokkenna idi, oda ngo bai JAHOWA nai ramalen idi. Merkitè gerarna sendiri ngo mengerana nabi sibagidi janah ulang pella mbiar kènè tabasa.”