Read Batak Dairi 5 Musa 2 Bible Online

5 Musa 2 - Batak Dairi bible

5 Musa 2

¹Dungna balik mo kita mi gurun pasir arap dalan menuju mi Suak Akaba, bagè siniperèntahken JAHOWA. Ndekkah ngo kita kadap i ladang uruk Edom.

²Nai idokken JAHOWA mo bangku

³magahken enggo toko dekkahna kita kadap i nagerri i. Jadi kennah laus ngo kita mi Utara.

⁴Nai nola ma idokken JAHOWA mo aku memagahken peddah ènda bai ndènè, ‘Oda ndekkah nèngè bengketten ndènè mo nagerri Edom, ladang dengngan sibeltek ndènè, pinempar si Esau. Mbiar ngo kalak i midah kènè,

⁵tapi oda ndorok juhapen ndènè kalak idi, kumerna ukum i tanoh kalak idi nai situk poda berènkenKu bai ndènè, kumerna ladang Edom enggo Kuberrèken bai pinempar si Esau.

⁶Ndorok ngo kènè menokor pangaen barang ènumen bai kalak idi nai.’

⁷Èngèt mo barang bakunè JAHOWA Dèbata ndènè enggo memasu-masu kènè ibas karina bahaen ndènè. Ipehèdu-hèdu ngo kènè sidekkah kadap kènè i gurun pasir simbellang èn. Ikellini ngo kènè sidekkah empatpuluh tahun èn janah memerèken karina siperlu bai ndènè.

⁸Nai terrus mo kita merdalan, menadingken dalan arap kuta Elat dekket Ezion-Geber menuju mi Laut Matè, nai merèluk mi Timur Laut menuju Gurun Moab.

⁹Nina JAHOWA mo taba aku, ‘Oda ndorok susahen ndènè kalak Moab, imo pinempar si Lot. Ulang ma mo juhap kè kalak i. Enggo ngo Kuberrèken nagerri Ar bai kalak i, janah situk poda Kuberrè ibas tanoh kalak i nai bai ndènè.’ ”

¹⁰(Arnia kalak Emim ngo mengiani Ar. Kalak nggeddang ngo rua-ruana, dos dekket kalak Enak, bagè bangsa ntuara.

¹¹Bagè kalak Enak, idokken ma ngo kalak i kalak Refaim, tapi ukum kalak Moab mendokken, kalak Emim ngo kalak idi.

¹²Arnia kalak Hori merian i Edom, tapi iletlet janah itumpatken pinempar si Esau mo, simengiani tanoh kalak i nola daoh-daoh arien; bagi ma ngo bangsa Israel ipodi ari nola mengeletlet musuh-musuhna i tanoh siniberèken JAHOWA bai kalak idi nai).

¹³“Nai siturèpari mo Laè Zered bagè siniperèntahken JAHOWA banta.

¹⁴Masa ngo idi enggo kessa tellupulu ualuh tahun sitadingken Kades Barnea. Karina soridadu i cundut idi nai enggo matè bagè sinidokken JAHOWA.

¹⁵Pukpuk ngo ialo JAHOWA kalak idi, ujungna riput mo kalak i karina.

¹⁶Enggo kessa matè kalak i karina,

¹⁷nina JAHOWA mo taba kita,

¹⁸‘Sidari èn mo kènè memellus ladang Moab, mengelausi nagerri Ar.

¹⁹Nai sakat mo kènè mi gembar tanoh kalak Amon, pinempar si Lot. Ulang kekadè kènè barang ikubu kènè kalak i, kumerna ipas tanoh sienggo Kuberèken bai kalak i nai, situk poda lot naing Kuberèken idi bai ndènè.’ ”

²⁰(Terberita ma ngo ladang idi mergerar nagerri Refaim, imo gerar bangsa simerian i sidi arnia; tapi igerari kalak Amon ngo kalak idi kalak Zamzumim.

²¹Mbelgah nggeddang ma ngo tong perdagingna, bagè kalak Enak. Mergegoh kalohon ngo kalak i, janah bilangenna pè nterrem. Tapi iripasken JAHOWA mo kalak i, gabè itaban kalak Amon mo tanoh i, janah merian i sidi.

²²Bagidi ma ngo tong ibakin JAHOWA taba kalak Edom, pinempar si Esau, simengiani ladang kan uruk Edom. Iripasken JAHOWA ngo kalak Hori, gabè itaban kalak Edom mo tanoh i janah mengianisa, nai hot mo kalak i i si soh bagèndari.

²³Tanoh silot mengèkut arur biding Laut Tengah i iani kalak sini Pulo Kreta nai. Enggo iripasken kalak idi kalak Awi, pengisi asli tanoh idi kin, nai iiani mo ladang i soh mi Selatan soh mi kuta Gaza daohna).

²⁴“Enggo kessa silausi ladang kalak Moab, nina JAHOWA mo taba kita, ‘Berkat mo kènè bagèndari menurèpari Laè Arnon. Naing Kuberrèken ngo bai ndènè si Sihon, raja Amori simengerajai i Hesybon, rasken bak nagerrina. Juhap kè mo ia, nai iani kènè mo tanohna i.

²⁵Mulai sidari èn nai Kubakin mo kènè asa gabè ikebiari karina bangsa barang idikè sambing pè ia. Karina kalak buradan janah menggirgir mula idengkoh kessa tersèngèt kènè.’ ”

²⁶“Nai kessa i nola kupasulak mo barang piga-piga utusen i padang gurun Kedemot nai, mendahi raja Sihon i Hesybon nai lako pesakatken pengidoen perdamèen ènda:

²⁷‘Padiat mo kami memellus arap tanoh raja i. Terrus pè kami merdalan janah oda menirpang arap dalan mbellen nai.

²⁸Kugarar kami pè pangaen sikupangan kami dekket laè sikuènum kami. Pellin mentas sambing ngo kessa kami perlu arap nagerri ènda,

²⁹mèma kuseberangi kami Laè Jordan lako mbengket mi nagerri siniberèken JAHOWA Dèbata nami bai nami. Pinempar si Esau simerian i Edom dekket kalak Moab simerian i Ar pè enggo mo padiatken kami memellus arap ladang kalak i.’

³⁰Tapi oda ipadiat Raja Sihon kita memellus arap nagerrina idi. Ibaing JAHOWA Dèbata ndènè mo ia gabè merukur mpihir janah jukkat asa ndorok sitaluken ia. Siiani deng ngo ladangna soh bagèndari.

³¹Nai nola nina JAHOWA mo taba aku, ‘Kusohken mo Raja Sihon dekket nagerrina bamu; buat mo janah rajai mo nagerri idi.’

³²Nai roh mo si Sihon dekket karina soridaduna lako mengalo kita i gembar kuta Jahas.

³³Tapi isohken JAHOWA Dèbatanta ngo ia banta, nai sitaluken mo ia dekket dukak-dukakna bak karina soridaduna.

³⁴Tikalana idi ma mo sitaban janah silala gennep kuta, janah sibunuh karina pengisina, daholi, daberru dekket anak-anak. Oda lot nè sipaduè nggelluh.

³⁵Pinakan kalak i pè sibuati janah kutana sitaban.

³⁶Merkitè pengurupi JAHOWA Dèbatanta, terbaing kita mo menaban karina kuta i, mulai i Aroër nai, i punca Napa Arnon, dekket kuta sinitengah napa kendet i, soh mi ladang Gilead. Oda lot kuta ntegguhsu siakap parikna.

³⁷Tapi oda ngo sijolmiti ladang kalak Amon barang pè biding Laè Jabok barang pè kuta silot i delleng bak i bekkas sidèban pè sinigerra JAHOWA Dèbatanta.”