Read Batak Dairi 5 Musa 20 Bible Online

5 Musa 20 - Batak Dairi bible

5 Musa 20

¹“Mula berkat kènè mergeraha me- ngalo musuh-musuh ndènè, ulang kènè mbiar mengidah kurèta geraha dekket kuda kalak i mbuè kalohon bagi dekket soridadu kalak i buèen bilangenna daripada bilangen ndènè. JAHOWA Dèbata ndènè sipaluahken kènè i Mesir nai, ia ma ngo tong mengurupi kènè.

²Sinderrang mak dèng itebennai mergeraha, kennah mi lebbè mo sada kalak imam janah mendokken taba kènè bagèen,

³‘Kènè alè kaka-anggi dengkohken kènè mo! Berkat mo kènè sidari èn mergeraha. Ulang mbiar, barang mernong alè barang pè bingung.

⁴Dekket ngo JAHOWA Dèbata ndènè mengurupi kènè, janah iberèken ngo kemenangen bai ndènè.’

⁵Nai pakalima-pakalima pè kennah mo pesakatken rana èn taba kènè, ‘Lot ngo bai ndènè nai rimbaru dèng mahan sapo, tapi mak dèng ibaing pèstana lako memengketti? Mula lot, ndorok mo ia balik. Kerna mula terbunuh ia tikan geraha i, kalak sidèban nola mo mengiani sapona i.

⁶Lot ngo bai ndènè nai rembaru dèng menuani pekken anggurna janah oda dèng sanga iakin buah anggurna i? Mula lot ngo, ndorok ngo ia balik. Kerna mula terbunuh ia tikan geraha i, kalak sidèban nola mo mengènumi laè anggurna i.

⁷Lot ngo bai ndènè nai kalak sienggo lot rantona janah naing jejap? Mula lot ngo, ndorok ngo ia balik. Kerna mula terbunuh ia tikan geraha i, kalak sidèban nola mo jejap dekket rantona i.’

⁸Kennah dokenken pakalima-pakalima deng ma ngo bagèen taba kènè, ‘Lot ngo bai ndènè nai ringgodoren janah buradan? Mula lot ngo, ndorok mo ia balik, asa ulang gabè icèdai keberanien sidèbaen.’

⁹Enggo kessa mengerana pakalima taba soridadu, kennah ipilih mo kalakna simenguluken gennep nuhnuhen.

¹⁰Mula berkat kènè lako mengkubu sada kuta, berrèken kènè mo lebbèken tikki bai pengisi kuta i lako menerrah.

¹¹Mula ibuka kalak idi pèntu pengkeruhen janah menerrah, kennah gabè hamba ndènè mo kalak i karina janah merrodi bai ndènè.

¹²Tapi mula oda nggèut menerrah pengisi kuta idi janah lotien iakap mergeraha, kennah kubu kènè mo kuta idi.

¹³Nai, mula iduè JAHOWA Dèbata ndènè ngo kènè menaban kuta idi, kennah bunuh kènè mo karina pengisina anak laki.

¹⁴Tapi ndorok ngo taban kènè ukum daberru, anak-anak, pinakan dekket barang kadè sambing lot i kuta idi. Karina ugasen harta musuh ndènè i ndorok ngo ipakkè kènè. JAHOWA Dèbata ndènè ngo menohken idi bai ndènè.

¹⁵Kennah bagi ngo bakin kènè taba kuta sindaoh i nagerri bekkas ndènè merian nai.

¹⁶Tapi mula i ladang siniberèken JAHOWA Dèbata ndènè taba kènè ngo kuta idi, kennah ibunuh ngo karina pengisina.

¹⁷Bagè siniperèntahken JAHOWA Dèbata ndènè, kennah ripasken kènè ngo kalak Het, Amori, Kanaan, Feris, Hewi dekket Jebusi.

¹⁸Bunuh kènè mo kalak i, asa ulang merdosa kènè taba JAHOWA Dèbata ndènè ibakin kalak i merkitè iajar-ajari nola kènè mengulaken perulaen luhlah simeronah i taba dèbata sembahen kalak i.

¹⁹Mula ijuhap kènè sada kuta janah sanga ndekkah ikubu kènè, ulang tabahi kènè kayu simerbuah i sidi. Pangan kènè mo buahna, tapi ulang cèdaken kènè benana, kumerna oda ngo alo ndènè ukum suan-suanen idi.

²⁰Kayu sidèban ndorok ngo itabah kènè mahan pagar pengkubu soh tertaban kuta idi.”