Read Batak Dairi 5 Musa 21 Bible Online

5 Musa 21 - Batak Dairi bible

5 Musa 21

¹“Mula lot kalak matè terbunuh i juma nagerri siniberèken JAHOWA Dèbata ndènè taba kènè, janah oda terbettoh barang isè simemunuhsa,

²kennah laus ngo pengulu bak perhukum ndènè lako menibar sadikè daoh ipas bekkas bangkè dapet idi nai mi gennep kuta sinjolmit mi sidi.

³Nai kennah ipilih kalak simpantasniasè ibas kuta sinjolmitna idi mo sada lembu bajar siso nung dèng ipengulaken.

⁴Kennah iiring kalak i mo lembu idi mi sada bekkas mi gembar sada batang laè siso nung marsak janah tanohna i pè oda nung dèng iula barang pè isuani. I sidi mo kennah ibohok kalak i kerahong pinakan idi.

⁵Imam-imam Lewi pè kennah laus ma ngo mi sidi, kumerna kennah kalak i ngo mendabuh keputusen mi gennep perkara sipelebbèken gegoh. Ipilih JAHOWA Dèbata ndènè ngo kalak i gabè pengendengna dekket pesakatken kata pasu-pasu merkitè gerarNa.

⁶Nai karina mo simpantasniasè ibas kuta sinjolmitna kalohon idi nai kennah memorih tanganna i babo lembu i,

⁷ninganna mendokken, ‘Oda ngo kami memunuh jelma i, janah oda kubettoh kami barang isè memakin i.

⁸Ialè JAHOWA, merpemuati mo ukurMu bai bangsaMu Israel sinipaluahMu i Mesir nai. Ampuni mo kami janah ulang mo kami nola dok atèMu mertanggung jawab kumerna terbunuh kalak siso mersalah.’

⁹Asa merkitè mengulaken kadè sinipengido JAHOWA, oda nè mo kènè iètong simertanggung jawab ibas siterbunuh i.”

¹⁰“Mula mergeraha kènè janah iberèken JAHOWA Dèbata ndènè kemenangen bai ndènè, nai iembah kènè mo sitertaban tikan geraha i,

¹¹tah bakunè lot sada kalak daberru mberru ngkelleng atè ndènè janah naing katèmu ibaing ko gabè sinibagesmu.

¹²Embah mo daberru i mi bagesmu. Isidi kennah igonting ngo bukna, igettapi sisèluna,

¹³janah mersalin pakèen. Kennah merian i bagesmu mo ia janah merhendem sibulan dekkahna kumerna permatè partuana. Enggo kessa i ndorok mo kono kabin dekketsa.

¹⁴Mula oda nè ngkelleng atèmu bana i podi arina, ndorok ngo pelausenmu ia barang mikè katèna. Oda ndorok ia bakinenmu bagè hamba barang idèa ko, kumerna enggo ipaksa kono ia mercampur dekket ko.”

¹⁵“Umpamana lot mo sada kalak dua sinibagesna, janah duana menubuhken anak daholi, tapi anak siperlebbè tubuh i oda bai sinibages sinikekelengen atèna nai.

¹⁶Mula naing itentuken kalak i bakunè perbagina kinibèakna bai dukak-dukakna, oda ndorok merpihak ia taba anak sinibages kekelengenna i merkitè memerèken bai anak idi jambar sipatut bai anak situaen.

¹⁷Kennah ngo dua lempit ibas hartana i nai iberèken bai anak situaen i, kasi pè anak idi oda tubuh sinibages kekelengen atèna nai. Kennah iakui bapana ngo hak anak situaen, janah kennah iberèken ngo bai anak idi harta tading-tadingen sipatut hakna mengèkutken hukum.”

¹⁸“Umpamana lot mo sada kalak anak jèngèng, dak mengalo-ngalo janah oda nggèut menguèi pertuana kasi pè enggo ihukum kalak idi ia.

¹⁹Jadi kennah iembah pertuana ngo ia taba simpantasniasè kuta bekkas kalak i merian janah mengidoken asa ihukum anak idi.

²⁰Kennah dokenken kalak i mo taba simpantasniasè kuta idi, ‘Jèngèng ngo anak nami ènda, dak mengalo-ngalo sambing ngo ganaenna janah oda merpe- nguèi taba kami; ihambur-hamburken ngo kèpèng nami janah mabuk sambing ganaenna.’

²¹Nai kennah ibentiri karina anak laki sinikuta i mo anak i dekket batu soh matè. Merkitè bagidi mo ipatèi kènè kejahaten idi. Karina kalak i Israel ngo mendengkoh simasa i, janah gabè mbiar mo kalak idi.”

²²“Mula lot sada kalak enggo ihukum matè kumerna kejahaten, janah bangkèna igantung ibas sada tihang,

²³oda ndorok bangkè i ibelli i sidi suntuk berngin, tapi kennah itanem arinkenna i ma. Bangkè sitergantung ibas tihang mengkerohken sumpah Dèbata taba nagerri i. Jadi, kubur kènè mo bangkè idi asa ulang kènè mengelamuni ladang siniberèken JAHOWA Dèbata ndènè.