Read Batak Dairi 5 Musa 22 Bible Online

5 Musa 22 - Batak Dairi bible

5 Musa 22

¹Mula lot laling lembu barang biri-biri denganmu sada bangsa, janah tupung idah kènè pinakan idi, ulang mo pakulah-kulah oda ibettoh kènè, tapi iring mo pinakan i balik taba sidasa.

²Mula ndaohsu sapo sidasa, barang oda itandai kènè ia, embah mo pinakan i mi bagesmu. Mula roh sidasa menulusi, berèken mo tabasa.

³Bagidi ma mo tong bakin mula simbak kènè sada kalodè, sirambar gedda, barang kadè sambing ugasen denganmu sada bangsa.

⁴Mula lot sada kalodè barang pè lembu milik denganmu sada bangsa njerbem i tengah ndalan, ulang mo ipakulah oda ibettoh kènè, tapi urupi mo ia pekèkèken pinakan idi.

⁵Daberru oda ndorok merpakèen bagè anak laki, janah anak laki pè oda ndorok merpakèen bagè daberru, kumerna nggogo ngo atè JAHOWA Dèbata ndènè midah kalak simemakin bagidi.

⁶Mula idah kènè sada asar manuk-manuk i sada kayu barang i tanoh janah indungna sidang meddemken naruhna barang rebbak dekket anakna, ulang mo tangkup indung manuk-manuk idi.

⁷Ndorok ngo ibuat kènè anak manuk-manuk i, tapi belli mo indungna i ngkabang, asa ndekkah kènè nggelluh janah nduma.

⁸Mula majek bages kènè, kennah bakinen ndènè pagar i sikuliling biding saongna. Nai oda nèngè mo dikèna kènè mula lot kalak ndabuh i saong sapona idi nai, janah matè.

⁹Ulang mo menuan suan-suaen sidèban i pekken anggur ndènè, laènken anggur. Mula tong ngo isuani kènè dekket sidèban, oda ndorok buatenmu hasil pekken i, bang i anggur nai, barang pè i suan-suaen sidèban idi nai.

¹⁰Ulang pedemmu sada lembu dekket sada kalodè ibas sada luku.

¹¹Ulang mo memakè gedda sinitennun ibas buk biri-biri dekket linen nai.

¹²Bakin mo rambu ibas empatna soki olesmu.”

¹³“Umpamana lot mo sada kalak anak laki kabin dekket sada kalak simerbaju, nai daoh-daoh arien nola oda nè ngkelleng atèna.

¹⁴Ibakin mo tuduhen palsu magahken oda nè gadi sinibagesna i tikan kabin kalak i.

¹⁵Tupung sibagidi kennah ibuat partua daberru idi ngo oles jejap pedemmen daberru idi kin janah lot pistik daroh i sidi mahan bukti gadi dèng ngo berruna i. Kennah ipacidah kalak i ngo oles i bai simpantas niasè kuta i i kerungguen.

¹⁶Kennah dokenken bapa simerbaju i ngo taba kalak i, ‘Enggo kusohken berrungku bai kalak èn gabè sinibagesna, tapi bagèndari oda lemmo nèngè atèna.

¹⁷Ibaing ngo tuduhen palsu merkitè mendokken ukum sinibagesna idi oda nèngè gadi tikan kabin kalak i. Tapi èn mo tandana magahken gadi dèng ngo berrungku i tikala i. Perdatèken kènè mo daroh silot ipas alas pakèenna ènda!’

¹⁸Nai kennah itenggoi simpantasniasè kuta i mo daholi idi janah menendelsa.

¹⁹Nai kennah idenda kalak i ngo ia seratus riar pirak janah iberèken mo riar idi bai simatuana, kumerna haib ibaing sada kalak daberru Israel. Janah dèng ma kennah hot ngo tong daberru i gabè sinibagesna, janah mak ndorok isirangken sidekkah nggelluhna.

²⁰Tapi mula tuhu ngo tuduhen idi janah oda lot bukti magahken gadi dèng ngo sinibagesna idi tikan jejap kalak i,

²¹kennah iembah mo daberru i mi pèntu bages partuana. I sidi mo kennah ibentiri karina anak laki kuta i daberru i dekket batu sampè matè. Ai enggo iulaken daberru idi sada kememalu mi bangsanta kumerna enggo mercampur ia sinderrang mak dèng sijahè tikan i bages bapana dèng ia merian. Merkitè menghukumsa i mo kènè pesisiken kejahaten sibagidi.

²²Mula lot sada kalak anak laki terdapet mercampur dekket sinibages kalak sidèban, duana ngo kalak i kennah ihukum matè. Merkitè bagi mo kènè pesisiken kejahaten sibagidi.

²³Umpamana lot mo ibas kuta sada kalak anak laki terdapet tupung mercampur dekket sada kalak simerbaju sienggo ranto.

²⁴Kalak sibagidi kennah iembah mi ruar kuta janah ibentiri dekket batu soh matè. Kennah patèenken ngo simerbaju idi kumerna oda mersurak ia mengido tolong, keppèken masa simasa idi ibagasen kuta ngo, keppè terdengkoh kin ngo nemmuken surakna idi. Janah anak laki i pè kennah ibunuh kumerna mercampur ia dekket sada kalak simerbaju sienggo ranto. Merkitè menghukum kalak i duana, pesisiken kejahaten i ngo kènè i si.

²⁵Tapi laèn mo umpamana mula i juma ngo irampok sada kalak daholi sada kalak simerbaju sienggo ranto. Tupung sibagidi pellin daholi i ngo kessa ihukum matè.

²⁶Ukum daberru oda ndorok ikekadè kumerna oda lot iulaken barang kadè maing patut ia ihukum matè. Perkara sibagidi tosè ngo bagè perkara sada kalak simenjuhap kalak sidèban janah memunuhsa.

²⁷Kumerna i juma ngo masa pengerampoken idi, nai mula pè mersurak simerbaju idi, tentu oda lot isè roh lako mengurupisa.

²⁸Misalna lot mo sada kalak anak laki terdapet tupung mengerampok sada simerbaju simakdèng ranto.

²⁹Tupung sibagidi kennah menggarar ngo ia bai partua simerbaju i mahan tokorna limapuluh riar pirak. Kennah gabè sinibagesna ngo simerbaju i kumerna ipaksa ia mercampur janah sidekkah nggelluhna oda ndorok ia isirangken.

³⁰Sada kalak poda ndorok mengelèai bapana merkitè rebbak meddem dekket sada kalak sinibages bapana.”