Read Batak Dairi 5 Musa 23 Bible Online

5 Musa 23 - Batak Dairi bible

5 Musa 23

¹“Kalak sienggo irenten barang igettap buah langgèna oda ndorok gabè bangsa JAHOWA.

²Dukak gampang dekket karina pinemparna soh mi cundut pesipuluhken oda ndorok gabè bangsa JAHOWA.

³Kalak Amon dekket kalak Moab bak pinempar kalak i soh mi cundut pesipuluhken oda ndorok gabè bangsa JAHOWA,

⁴kumerna oda nggèut kalak i memerèken pangaen dekket laè bai ndènè sinderrang i perda- lanen kènè i Mesir nai. Balikna nola iupahi kalak i ngo si Bileam, anak si Beor i kuta Petor i Mesopotamia nai, lako menumpahi kènè.

⁵Tapi oda nggèut JAHOWA Dèbata ndènè mendengkohken si Bileam. Balikna nola ipesungkar ngo sumpah idi gabè pasu-pasu, kumerna masèh ngo atèNa midah kènè.

⁶Sidekkah kènè nggelluh dekket soh mi amman sumendah, ulang urupi kènè bangsa i barang memakin kalak i gabè nduma.

⁷Ulang pis mata ndènè midah kalak Edom, kumerna sibeltek ngo kènè. Ulang mo pis mata ndènè midah kalak Mesir, kumarna pennah ngo kènè merian i nagerri kalak i.

⁸Mulai i sundut petelluken nai soh mi cundut siterrusna mi podi ndorok ngo pinempar kalak i gabè bangsa JAHOWA.”

⁹“Mula tikan mergeraha kènè, kennah imbilken kènè karina simemaing melamun.

¹⁰Mula lot sada kalak gabè melamun kumerna mengkaluarken igit sinderrang meddem, kennah itadingken mo perundung-undungen idi janah i darat ia merian.

¹¹Mayak bon ari kennah meridi mo ia janah tikan sundut mataniari ndorok mo ia balik mi perundung-undungen.

¹²Kennah pèmaken kènè bekkas cioh i ruar perundung-undungen.

¹³Mula naing laus mi si, embah mo keperluenmu bak omban-omban lako mengkurak lubang bekkas ceggah dekket lako menamburisa.

¹⁴Idengani JAHOWA Dèbata ndènè ngo kènè i perundung-undungen ndènè lako mengondingi kènè dekket merèken kemenangen bai ndènè meraloken musuh ndènè. Asa jaga mo perundung-undungen ndènè asa dak tong mbersih. Ulang sanga lot terdapet siso selloh i tengah-tengah ndènè, asa ulang itadingken JAHOWA kènè.”

¹⁵“Mula lot sada kalak hamba mperrus menadingken tuanna, nai roh mengido percilenggemmen taba kènè, ulang mo pasulak ia balik.

¹⁶Ndorok ngo ia mian ibas sada kuta ndènè sinipilihna, janah oda ndorok bakinen ndènè siso puna-puna tabasa.

¹⁷Sada kalak Israel daholi barang daberru, oda ndorok gabè perkendangen i bekkas persembahen.

¹⁸Bagi ma bang kèpèngna hasil merkendangen idi nai, oda ndorok iembah mi Bages JAHOWA Dèbata ndènè lako menggarar niat, kumerna nggogo ngo atè JAHOWA Dèbata ndènè midah perkendangen i bekkas persembahen dekket midah upah merkendangen idi.

¹⁹Mula pejualken kèpèng kènè taba kalak sidèban, ndorok ngo kènè menjalo anakna. Tapi mula pejualken kèpèng kènè barang pangaen barang ugasen sidèban bai dengan ndènè sada bangsa kennah berènken ndènè jualen idi oda pella meranak. Uèi kènè mo perèntah idi, asa ipasu-pasu Dèbata JAHOWA nasa siniula ndènè i nagerri siniianen ndènè i.

²¹Mula lot bagah-bagah ndènè barang kadè bai JAHOWA Dèbata ndènè, ulang mo dak pedekkah-dekkah kènè lako menggarar bagah-bagah i, kumerna tong ngo itunggu JAHOWA Dèbata ndènè idi, janah merdosa ngo kènè mula oda igarar kènè i.

²²Oda ngo merdosa kènè mula oda kin lot maing bagah-bagah taba JAHOWA.

²³Tapi mula ibas gerrek atè ndènè nai ngo kènè merbagah-bagah bai JAHOWA Dèbata ndènè, patut ngo tebbusen ndènè.

²⁴Mula tupung kènè merdalan arap pekken anggur ndèba, ndorok ngo panganen ndènè buah anggur i barang sadikè katè ndènè, tapi oda ndorok isini kènè nola kirang.

²⁵Mula tupung kènè merdalan arap juma ndèba, ndorok ngo guguten ndènè pagè sinipotiken ndènè, tapi oda ndorok memotik merkitè sabi-sabi.”