Read Batak Dairi 5 Musa 24 Bible Online

5 Musa 24 - Batak Dairi bible

5 Musa 24

¹“Umpamana lot mo sada kalak anak laki kabin dekket sada kalak simerbaju, janah daoh-daoh arien oda nèngè lemmo atèna kumerna terdapet ia memaingken sada kememalu bana. Nai iberèken anak laki i mo surat sirang bana janah ipelaus mo ia i bagesna nai.

²Nai kabin nola mo daberru idi dekket anak laki sidèban.

³Tapi enggo kessa barang sadikè dekkah oda nè ma mo ngkelleng atè anak laki idi tabasa, nai iberèken ma mo surat sirang tabasa janah ipelaus mo ia. Barang pè umpamana tah matè sinibalèna peduaken idi.

⁴Ibas sidua pengelako idi oda ndorok nèngè sinibalè perlebbè idi mengkabini daberru i, kennah iètong ngo daberru i sada daberru sienggo mekemmer. Mula ikabini nola ngo, enggo mengelèai JAHOWA Dèbata ndènè ulah-ulahna idi. Oda ndorok ulaenken ndènè dosa bagi belgahna i nagerri siniberèken JAHOWA bai ndènè.”

⁵“Sada kalak anak laki rimbaru jejap oda ndorok idilo gabè soridadu janah laus mergeraha barang pè menguluken ulaen keteremmen sidèbanna. Kennah ibèbasken ia ibas ulaen sibagidi nai sidekkah sitahun lako mengurus rumah tanggana dekket lako pesennangken ukur sinibagesna.

⁶Mula ipejual kènè barang kadè bai ndèba, ulang pella buat lessung sinipakè kalak i menutu pagè pangaenna mahan gadèna. Merkitè memuat lessungna idi enggo mengerampas alat sinipakè kalak i lako mengudun nggelluhna kènè i sidi.

⁷Kalak simenculik jelma denganna sada bangsa, nai ibakin gabè hamba barang pè tah idèaken, kennah ihukum matè. Merkitè bagidi mo kènè mengènteppi kejahaten i.

⁸Mula lot terdapet sakit puru merbahaya, perèso kènè mo seppè kadè siniperèntahken imam Lewi taba kènè; èkutken kènè mo peddah sienggo kuberèken taba kalak i.

⁹Èngèt mo kadè sinibakin JAHOWA Dèbata ndènè meradepken si Miryam i perdalanen ndènè tikan mbungkas i Mesir nai.

¹⁰Mula ipinjamken kènè barang kadè bai samah kènè, ulang mo pella mbengket kènè mi bagesna lako memuat olesna mahan borohna.

¹¹Pèma mo i ruar janah belli mo ia sendiri merembah bamu.

¹²Mula ncor ngo kalakna, oda ndorok icèkèpi kènè olesna i suntuk berngin,

¹³tapi kennah balikken bana gennep berngin, asa ndorok ipakkè tikan meddem. Nai mendokken lias atè mo ia janah JAHOWA Dèbata ndènè pè lemmo mo atèna mengidah kènè.

¹⁴Ulang oto-otoi sigajien kalak ncor janah kurangen, tah pè i dengan ndènè sada bangsa, barang pè kalak sidèban simerian ibas barang pai kuta ndènè.

¹⁵Gennep ari sinderrang mak dèng sundut mataniari kennah gararen ndènè upah siniulana sidarinkenna i; kèpèng idi ngo iharapken kumerna perluna. Mula oda igarar kènè upahna, isodipken ngo taba JAHOWA lako mido urup kumernaken kènè, janah merdosa mo kènè idokken.

¹⁶Ulang ihukum matè sada kalak partua kumerna kejahaten dukakna, janah ulang ihukum matè dukakna kumerna kejahaten sinibakin partuana. Pellin kumerna kejahaten siniulakenna sendiri ngo ndorok ihukum matè jelma.

¹⁷Ulang mengerampasi hak kalak sidèban dekket hak anak melumang, janah ulang jalo oles simbalu mahan gadèna.

¹⁸Èngèt mo, kènè pè nung ngo gabè hamba i Mesir, janah ipaluah JAHOWA Dèbata ndènè, kumernaken i ngo asa kuberèken hatoren ènda taba kènè.

¹⁹Mula tikan pepulungken hasil juma ndènè kènè, ulang pella olihi kènè lako pepulungken rohi pagè simertadingen. Belli kè mo pagè simertadingen i bai kalak sidèban, anak melumang dekket lah simbalu, asa ipasu-pasu JAHOWA Dèbata ndènè kènè ibas karina ulaen ndènè.

²⁰Enggo kessa itapu kènè sikali buah Zaitun dekket buah anggur ndènè, ulang pella olihi kènè nèngè lako pepulungken buah turiangna. Kennah bellien ndènè ngo idi bai kalak sidèban, anak melumang dekket simbalu.

²²Èngèt mo, kènè pè nung ngo gabè hamba i Mesir; kumerna i ngo asa kuberèken hatoren ènda taba kènè.