Read Batak Dairi 5 Musa 25 Bible Online

5 Musa 25 - Batak Dairi bible

5 Musa 25

¹Umpamana lot mo dua kalak Israel laus mi kerungguen lako mengaduken perkara, nai idabuh mo hukum, sada salah, tapi ukum sisada nai oda salah.

²Mula ligas-ligas ngo hukumna idabuh taba simersalah i, kennah idohken hakim ngo ia tangkep. Barang piga kali ia naing ligasen rembang mi kejahaten siniulakenna idi mo i,

³tapi oda ndorok lebbih empatpuluh kali. Mula lebbih enggo gabè mengelèaisa nola i i lebbè jelma mbellang.

⁴Ulang kontam muncung lembu tikan ibaing ko ia mengerrik gandum.”

⁵“Mula lot kalak merdengan sibeltek rebbak sada sapo, nai matè mo sada kalak bai kalak idi nai oda lot menadingken anak daholi, oda ndorok sijahè bai sidèban simebalu i laènken sisimpangaen sinibalèna sienggo matè i. Dengan sibeltek sienggo matè idi, kennah mengkabini daberru simebalu i.

⁶Anak kalak i daholi situaen kennah iètong anak dengan sibeltekna sienggo matè i, asa lot pinemparna i tengah-tengah bangsa Israel.

⁷Mula oda nggèut ia kabin dekket sinibages dengan sibeltekna sienggo matè i, kennah laus daberru idi menghadep taba simpantasniasè kuta i lako magahken, ‘Oda nggèut sininangku mengulaken tanggung jababna merèken cundut bai dengan sibeltekna i tengah-tengah bangsa Israel.’

⁸Nai kennah idilo simpantas niasè kuta i mo kalakna janah mengerana dekketsa. Mula tong ngo ia oda uè,

⁹kennah ijolmiti sinibages dengan sibeltekna i mo ia i lebbè simpantas niasè kuta i, iruah mo cipatu kalak i, janah icèduri abèna ninganna idokken, ‘Kennah bagèen ngo bakinen taba kalak siso nggèut merèken cundut bai denganna sibeltek.’

¹⁰Itandai dèba mo sisimpangaen kalak idi, ‘Kalak sienggo italkasi cipatuna.’ ”

¹¹“Mula lot dua kalak anak laki tupung merubat, janah sinibages sada kalak mengu- rupi sinibalèna merkitè memetcek dengan tu- buh alo sinibalèna i,

¹²gettap mo tangan daberru idi janah ulang mermasèh atè kènè tabasa.

¹³Ulang kènè mengoto-ngotoi merkitè memakè dacing dekket sellup siso selloh.

¹⁵Pakkè kènè mo dacing dekket sellup mendè asa nggeddang umur ndènè i nagerri siniberèken JAHOWA Dèbata ndènè taba kènè.

¹⁶Nggogo ngo atè JAHOWA Dèbata ndènè taba kalak pengoto-ngotoi.”

¹⁷“Èngèt kènè mo barang bakunè pemakin kalak Amalek taba kènè tikan i perdalanen lako mbungkas kènè i Mesir nai.

¹⁸Oda ikebiari kalak i Dèbata janah ijuhap ngo kènè i podi nai sinderrangna ledja kènè janah enggo kerri gegoh ndènè, gabè irasipken karina dengan ndènè sienggo ledja merdalan i podi.

¹⁹Kerna i, mula enggo iberrè JAHOWA Dèbata ndènè nagerri i bai ndènè janah mènak kènè bai karina musuh silot i sikuliling ndènè, kennah ripasken kènè karina kalak Amalek idi asa oda nè lot kalak i èngèten. Ulang kènè lupa!”