Read Batak Dairi 5 Musa 26 Bible Online

5 Musa 26 - Batak Dairi bible

5 Musa 26

¹“Mula enggo kessa mbengket kènè mi nagerri sienggo iberèken JAHOWA Dèbata ndènè bai ndè janah enggo merian i sidi,

²hasil perlebbè ibas karina sinipepulung ndènè ibas juma ndènè nai kennah rurui kènè mi sada baka, janah embah kènè mi bekkas sinipilih JAHOWA Dèbata ndènè.

³Dahi kènè mo imam simengula ibas katika idi janah dokken kènè tabasa, ‘Kubagahken mo bai JAHOWA Dèbatamu, ukum aku enggo masuk mi nagerri siniperbagahNa bai empungta lako berènkenna banta.’

⁴Ijalo imam mo baka i i tangan ndènè nai janah igamparken i hadeppen lang- gaten JAHOWA Dèbata ndènè.

⁵Nai ken- nah dokenkenmu mo i hadeppen JAHOWA Dèbatamu bagèen: ‘Ialè JAHOWA, kalak Aram pengeranto ngo empungku. Iembah ngo simpangansa mi Mesir lako merian i sidi bagè kalak pengusi. Tikan laus kalak i mi sidi cituk ngo bilangen kalak i, tapi gabè bangsa mbellen ngo kalak i janah mergegoh.

⁶Mpiah ngo pemaing kalak Mesir taba kami janah memaksa kami karèjo bagè hamba.

⁷Nai pingko-pingko mo kami mengido pengurupien taba kono, alè JAHOWA, Dèbata empung nami. Idengkohken Kono ngo pingko-pingko nami, janah mengidah kinidersa, kesusahen bak kinipersah nami.

⁸Merkitè kuasa dekket kegegohen mahantu ipaluah Kono ngo kami i Mesir nai. Ihanaken Kono ngo kelengangen-kelengangen dekket mermatcam bagè lègan bak pemasaken maing gontar musuh.

⁹Nai iarak Kono mo kami mi sèn janah merèken tanoh kaya janah nggabur èn bai nami.

¹⁰Kemulihken i, alè JAHOWA, kupèlèken ngo i sèn hasil perlebbè ibas tanoh siniberèkenMu idi nai taba aku.’ Nai gamparken mo baka i i hadeppen JAHOWA Dèbatamu, janah sembah mo Ia.

¹¹Dokken mo lias atè kemulihken pasu-pasu sienggo iberèken JAHOWA Dèbatamu bamu dekket bai kadè-kadèmu. Arahken mo kalak Lewi dekket kalak sidèban simerian i tengah-tengah ndènè asa dekket ibas merpèsta i.

¹²Gennep tahun petelluken kennah berènken ndènè pèlèen perpuluhen, imo sipersipuluh ipas hasil tanohmu nai taba imam Lewi, kalak ranto, anak melumang dekket simbalu, asa i gennep kuta ndènè gabè ndorok kalak i terolih pangaen siniperluken kalak i. Mula enggo bagi,

¹³dokken mo taba JAHOWA Dèbatamu, ‘Ibas sipersipuluh hasil tanoh sikennah pèlèenken baMu, alè JAHOWA, cituk poda lot nèngè tading i sapongku; karina ngo enggo kuberèken bai kalak Lewi, kalak pengeranto, anak melumang dekket simebalu, bagè siniperèntahken JAHOWA Dèbatangku taba aku. Oda lot kulausi perèntahmu alè JAHOWA tersèngèt pèlèen perpuluhen.

¹⁴Situk poda lot kupangan ibas pèlèen idi nai mula pè tikan bonek aku, barang pè kuembah nola mi ruar bages tikan melamun aku, barang pè kuampèken nola bai kalak sienggo matè. Enggo tunduk aku baMu alè JAHOWA, enggo kuulaken karina siniperèntahkenMu.

¹⁵Tatap janah pasu-pasu mo bangsaMu Israel i sorga bekkasMu simbadia i nai, pasu-pasu ma mo bang nagerri kaya janah nggabur siniberèkenMu bai nami, tosè bagè sienggo niperbagahMu bai empung nami.’ ”

¹⁶“Sidari èn iperèntahken JAHOWA Dèbata ndènè ngo kènè lako mengulaken karina perèntah i; ulaken mo i karina mertuhu-tuhu dekket ibas nasa pusuh peratèenmu nai.

¹⁷Sidari èn enggo iindangken kènè JAHOWA ngo Dèbata ndènè. Merpadan ngo kènè menguèi tabasa janah mengulaken karina hukum bak patinNa.

¹⁸Sidari èn ijalo JAHOWA ngo kènè gabè ummatNa sendiri, bagè sienggo ijandiken taba kènè, janah idokken ngo kènè lako mengulaken karina patinNa.

¹⁹Ibaing JAHOWA mo kènè belgahen daripada karina bangsa sidèbanNa sienggo tinempana i, janah ipoji bak ipesangap mo kènè. Gabè ummat JAHOWA Dèbata ndènè mo kènè bagè sienggo ijandiken i.”