Read Batak Dairi 5 Musa 27 Bible Online

5 Musa 27 - Batak Dairi bible

5 Musa 27

¹Nai rebbak dekket pengulu-pengulu Israel, ipesakat si Musa mo tennah èn bai bangsa i, “Uèi mo karina patiin sikupesakat mendahi kènè ari èn.

²Tupung ari isuberrangi kènè Laè Jordan lako mbengket mi nagerri siniberèken JAHOWA Dèbata bai ndènè, kennah pajek kènè barang piga-piga batu mbellen janah cèt kènè.

³Suratken mo ipas batu-batu idi gennep kata ibas pati-patiin èn nai. Mula enggo kessa mbengket kènè mi nagerri kaya janah nggabur sinijanjiken JAHOWA, Dèbata empung ndènè bai ndè,

⁴janah enggo i kèpar Laè Jordan kènè, kennah laus kènè mi Delleng Ebal. I sidi mo kennah pajek janah cèt kènè batu-batu idi bagè sienggo kuperèntahken bai ndènè i ari sidari èn.

⁵Kennah pajek kènè ma mo i bekkas i sada langgaten bai JAHOWA Dèbata ipas batu nai siso nung dèng idakdak merkitè perkekkas bessi,

⁶kerna gennep langgaten sinipajek bai JAHOWA Dèbata ndènè kennah ibahan ipas batu siso nung dèng idakdak. I babo langgaten idi mo kennah pèlèenken ndènè pèlèen situtungen.

⁷Pèlèken ma mo bak pèlèen perdamèen ndènè janah pangan kènè mo i i sidi janah mersampang atè mo kènè i hadeppen JAHOWA Dèbata ndè.

⁸I babo batu sinicèt i kennah mpanal suratken kènè gennep kata ipas pati-patiin Dèbata nai.”

⁹Kessa i nola mengerana mo si Musa rasken dekket imam-imam Lewi taba bangsa Israel, “Kènè karina kaka-anggi peratè-atèken janah dengkohken mo! I ari sidari èn kènè enggo gabè bangsa JAHOWA Dèbata ndènè.

¹⁰Kumerna i uèi kènè mo JAHOWA Dèbata ndènè janah ulaken mo karina patinNa sikuberèken bai ndènè i ari èn.”

¹¹Nai nina si Musa mo taba bangsa Israel,

¹²“Enggo kessa isuberrangi kènè Laè Jordan, kennah cènder mo marga Simeon, Lewi, Juda, Isasar, Josep, dekket Benjamin i babo Delleng Gerizim tikala iruapken kata pasu-pasu bai bangsa èn.

¹³Tikan iruapken perbilangen, cènder mo marga Ruben, Gad, Asyer, Zebulon, Dan, bak Naptali i babo Delleng Ebal.

¹⁴Kennah nggang ngo iruapken kalak Lewi kata ènda janah kalak Israel kennah mengaloi dekket kata, ‘Amèn.’

¹⁵Kalak Lewi: ‘Merjaya ngo kalak simemahan gana-gana ipas batu, kayu barang pè i tembaga nai, janah menembah mboni-mboni; nggogo ngo atè JAHOWA midah kalak simersembah taba sembahen sidèban.’ Karina sinterrem: ‘Amèn!’

¹⁶‘Merjaya ngo kalak siso pesangapken partuana janah memelli kalak i mpersah.’ ‘Amèn!’

¹⁷‘Merjaya ngo kalak simengompat baleng tanoh dengan balengna.’ ‘Amèn!’

¹⁸‘Merjaya ngo kalak simaing laling kalak sipètung.’ ‘Amèn!’

¹⁹‘Merjaya ngo kalak simengerampasi hak ndèba, hak anak melumang dekket simbalu.’ ‘Amèn!’

²⁰‘Merjaya ngo kalak simengelèai bapana kumerna mercampur dekket sada kalak sinibages bapana.’ ‘Amèn!’

²¹‘Merjaya ngo kalak simercampur dekket binatang.’ ‘Amèn!’

²²‘Merjaya ngo kalak simercampur dekket turangna kalohon, barang pè turangna sada bapa barang sada inang.’ ‘Amèn!’

²³‘Merjaya ngo kalak simercampur dekket simatuana berru.’ ‘Amèn!’

²⁴‘Merjaya ngo kalak simemunuh jelma mboni-mboni.’ ‘Amèn!’

²⁵‘Merjaya ngo kalak simenjalo sisip lako memunuh kalak siso mersalah.’ ‘Amèn!’

²⁶‘Merjaya ngo kalak siso pesautken patien dekket peddah Dèbata merkitè perulaen!’ ‘Amèn!’ ”