Read Batak Dairi 5 Musa 28 Bible Online

5 Musa 28 - Batak Dairi bible

5 Musa 28

¹“Mula iuèi kènè JAHOWA Dèbata ndènè janah setia mengulaken nasa patiin sikuberèken bai ndènè i ari sidari èn, nai ibaing mo kènè gabè bangsa sitermurmurna i dunia èn.

²Uèi mo JAHOWA Dèbatamu, asa karina pasu-pasu ènda iberèken bai ndènè:

³Ipasu-pasu mo karina kuta bak juma ndènè.

⁴Ipasu-pasu mo kènè, gabè meranak merberru kènè, gaya-guyu buah pagè ndènè janah mbuè kalohon mo lembu bak kambing bang biri-biri ndènè.

⁵Ipasu-pasu mo pagè peranien ndènè bak pangaen sinibahan ndè ipas pagè idi nai.

⁶Ipasu-pasu mo karina ulaen ndènè.

⁷Mula lot menjuhap kènè, JAHOWA ngo menaluken musuh ndènè. Mula pè meratur penjuhap kalak i taba kènè, tapi mperrus ngo kalak i sompar-baèr.

⁸Ipasu-pasu JAHOWA Dèbata ndènè mo siniula ndènè janah mendomi palung bak kebben ndènè dekket pagè. Ipasu-pasu ngo kènè i nagerri siniberèkenNa idi bai ndènè.

⁹Mula dak iuèi kènè JAHOWA Dèbata ndènè janah mengulaken karina patinNa, iabin mo kènè gabè bangsaNa sendiri, bagè siniperbagahNa i.

¹⁰Nai idah karina bangsa sinitanoh èn mo ukum kènè imo bangsa sinipilih JAHOWA, janah merkebiaren mo kalak i midah kènè.

¹¹Pasu-pasuenkenna mo bai ndènè mbuè dukak. Merrak merrik mo pinakan ndènè janah gaya-guyu mo hasil juma ndènè i nagerri siniperbagah JAHOWA taba empung ndènè lako iberèken bai ndènè.

¹²Roh mo udan ibaing JAHOWA tikan mosimna ibas bekkas pemeneppenNa i langit nai. Ipasu-pasu mo karina ulaen ndènè, gabè ndorok ipejual kènè taba mèduk bangsa, tapi ukum kènè oda pella merjual.

¹³Ibaing JAHOWA Dèbata ndènè mo kènè huntuen i tengah-tengah nasa bangsa janah oda gabè ginemgem. Mula tuhu-tuhu kènè menguèi karina patien JAHOWA sikuberèken taba kènè sidari èn, makin ndumana mo kènè janah oda nung sondar.

¹⁴Tapi ulang mo jaisken kènè pati-patienna idi barang merkitè dalan kadè pè idi. Ulang mo mersembah bak menguèi kènè taba dèbata-dèbata sidèban.”

¹⁵“Tapi mula oda ngo iuèi kènè JAHOWA Dèbata ndènè, janah mula oda tuhu-tuhu setia mengulaken karina perèntah dekket patinNa sienggo kuberèken bai ndènè sidari èn, mengenna mo taba kènè karina jèkat ènda:

¹⁶Merjaya mo kuta dekket juma ndènè.

¹⁷Kenna sempetta mo pagè peranien ndènè dekket pangaen sinibahan ndènè ipas pagè i nai.

¹⁸Kenna sempetta mo kènè, gabè pellin cituk mo kessa dukak ndènè, cituk hasil juma ndènè, bagi dekket lembu bak kambing bang biri-biri ndènè.

¹⁹Kenna sempetta mo karina usahamu.

²⁰Mula jahat ngo perulaen ndènè janah itulak kènè JAHOWA, ipesempa mo olpek, kerukraken dekket kepenjetten ibas karina siniula ndènè, gabè iripasken mo kènè karina ibagasen sigejap sambing.

²¹Sempa mo taba kènè sakit mermatcam bagè, ujungna sada kalak nèngè poda kènè lot tading i nagerri siniianen ndènè idi.

²²Ihukum JAHOWA mo kènè merkitè sakit merlangketten, baroh-barohen dekket panè-panèen. Roh mo ibaing kelegoen dekket angin mengelekkup, gabè ncèda mo peranien. Dak sempa mo taba kènè olpek i soh tumpat kènè.

²³Oda mo roh udan janah gabè mpihir mo tanoh ndènè bagè bessi.

²⁴Oda nè mo roh laè udan ibaing JAHOWA, tapi roh mo udan abu dekket kersik sampè kerri kènè tumpat.

²⁵Mula oda iuèi kènè JAHOWA Dèbata ndènè, italuken musuh ndènè mo kènè. Mula pè meratur ibakin kènè lako menjuhap, ta- pi mperrus ngo kènè sompar-baèr. Karina bangsa i tanoh èn merdesser pendurungenna mengidah kinimago ndènè.

²⁶Mula matè kènè, ipangani manuk-manuk dekket binatang-binatang mo bangkè ndènè, janah oda lot simengalai binatang-binatang i.

²⁷Ihukum JAHOWA mo kènè dekket merkitè baroh-barohen bagè sinibakinNa taba kalak Mesir. Dom buruk dekket puru gatel mo daging ndènè, tapi oda lot tambarna.

²⁸Gila mo kènè ibaing JAHOWA, bak pètung janah bingung.

²⁹Dadap-dadap mo kènè tupung cèger ari bagè sipètung, tapi oda jupa kè dalan. Sia-sia mo karina usahamu. Pukpuk mo kènè idersa janah isamun, janah oda lot simengurupi kènè.

³⁰Mula oda iuèi kènè JAHOWA Dèbatandè, sempa mo bai ndè sibagèn èn: Lot mo tinandamu, tapi kalak sidèban ngo kabin dekket rantomu i. Ipajek kènè bages, tapi oda kènè mengiani. Isuani kènè mo pekken anggur ndènè tapi oda kènè kipangan buahna.

³¹Isèat dèba mo lembu ndènè i hadeppen ndènè, tapi oda kènè dekket kipangan jukutna. Iiring dèba mo kalodè ndènè ipetengen-tengen kènè janah oda ibalikken. Iberrèken mo biri-biri ndènè taba musuh-musuh ndè janah oda lot simempebèlai.

³²Inelnelli mata ndènè mo dukak-dukak ndènè iberèken bai kalak sidèban gabè hamba. Gennep ari nggara mata ndènè menulusi dukak-dukak ndènè, tapi tong sia-sia, kumarna oda nè balik kalak i.

³³Irampasi bangsa sidèban mo karina hasil juma sienggo nikelejaken ndènè tapi ukum kènè sendiri oda lot terolih laènken dakdak idersa dekket pemakin ndèba siso puna-puna.

³⁴Gabè gila mo kènè kumernaken jaloenken ndènè idi.

³⁵Dom puru-nambi mpiah mo karina nènèh ndènè ibaing JAHOWA janah oda ndorok malum; mulai tapap nènèh nai soh mi babontakal ndènè sap baroh bak buruk.

³⁶Iteggu JAHOWA mo kènè dekket raja ndènè mi nagerri ndèba siso itandai kènè janah oda ma itandai empung ndènè. I sidi mo kènè gabè menguèi taba dèbata-dèbata sidèban sinigana ipas kayu bak batu nai.

³⁷I nagerri bekkas ndè ipesompar-baèrken JAHOWA, merdesser pendurungen ndèba menengen kènè; irèhè-rèhè janah itaba-tabai kalak mo kènè.

³⁸Mèduk pè bennih iardangken kènè, tapi cituk ngo kessa hasilna dapet kènè, kumerna kerri suan-suanen ndènè ipangani balang.

³⁹Isuani kènè mo pekken anggur ndènè janah ijamotken kènè mendè, tapi oda itapu kènè buahna barang pè iènum kènè laèna, kumerna kerri ngo batang anggur idi ipangani olong.

⁴⁰Turah ngo kayu Zaitun i suberri nagerri ndènè, tapi merurus ngo karina buahna, gabèna oda lot dapet kènè minakna.

⁴¹Meranak merberru ngo kènè, tapi itaban ngo kalak i karina gabè tabanen geraha, gabè kembalangen mo kènè.

⁴²Kerri nasa kayu dekket suan-suanen ndènè ipangan ridap.

⁴³Makin gegah mo kalak sidèban simerian i nagerrimu, janah makin mersepna ngo kuasa ndènè.

⁴⁴Lot ngo kèpèng kalak i lako pejualenkenna taba kènè, tapi ukum kènè kadè ndènè poda lot mahan pejualenken ndènè bai kalak i. Janah ujungna irajai kalak i mo kènè.

⁴⁵Karina olpek i sempa mo bai ndènè janah dak pukpuk mengganggu kènè sampè ripas kènè, kumerna oda tunduk kènè bai JAHOWA Dèbata ndènè janah oda mengulaken pati-patin siniberèkenNa taba kènè.

⁴⁶Olpek i mo sada pertanda hukum JAHOWA taba kènè soh mi pinempar ndènè sidekkah-dekkahna.

⁴⁷Enggo ipasu-pasu JAHOWA Dèbata ndènè kènè barang ibas kadè sambing pè, tapi tong ngo oda nggèut kènè tunduk tabasa ibagasen perukuren mbersih bak sampang atè.

⁴⁸Kerna i kennah gabè tunduk mo kènè taba musuh sinipasulak JAHOWA lako mengalo kènè. Kelèhèen mo kènè, muasen janah sabar janah kurangen ibas barang kadè sambing pè. Idersa JAHOWA mo kènè mpiah kalohon soh gabè ripas kènè.

⁴⁹Roh mo ibaing JAHOWA sada bangsa siso iantusi kènè katana i punca dunia èn nai lako mengalo kènè. Bagè manuk-manuk rajawali mo kalak i menèmbuk kènè.

⁵⁰Ketjam ngo kalak i janah oda lot masèh atèna midah situa-tua bang pè midah anak-anak.

⁵¹Ikerriken kalak i mo pinakan bak hasil tanoh ndènè, janah oda lot itadingken bai ndènè pagè, laè anggur, minak zaitun barang lembu dekket kambing bak biri-biri soh matè rapar kènè.

⁵²Ijuhap kalak i mo gennep kuta i nagerri siniberèken JAHOWA Dèbata ndènè taba kènè gabè merumpak mo pagar batu ndates janah ipetegguh siniasangken ndènè i.

⁵³Sinderrangna ikubu musuh ndènè kuta ndènè, mendellè mo kènè kumerna kelèhèen, gabè ipangani kènè mo dukak-dukak ndènè sendiri, dukak-dukak sinibasa-basaken JAHOWA Dèbata taba kènè.

⁵⁴Salang ka- lak simersangap simendè kalohon basana i pè gabè mendellè sidekkah ikubu idi, gabè ipangani mo dukak-dukakna sendiri kumarna oda lot pangaen sidèban. Cituk poda lot iberèken bai kaka-anggina barang pè sinibagesna sinikekelengen atèna barang pè dukak-dukakna singgelluhna dèng.

⁵⁵

⁵⁶Bang daberru simersangap simendè kalohon pengelakona janah bèak tangas-tangasen siso pennah merdalan nènèh, tong ma mengu- laken bagi. Tikan ikubu musuh kuta, mendellè mo daberru idi kumerna lèhè matè kocing i, gabè mboni-mboni mo ia kipangan dukakna sirembaru tubuh dekket anggi-anggina. Cituk poda lot iberrèken bai sinibalèna sinikekelengen atèna barang pè bai dukak-dukakna.

⁵⁷

⁵⁸Mula oda setia kènè menguèi karina patiin JAHOWA Dèbata ndènè sitersurat ibas lapihen ènda janah oda ipesangap kènè JAHOWA Dèbata ndènè simeheji janah mahan- tu,

⁵⁹ipesempa JAHOWA mo taba kènè dekket taba pinempar ndènè sakit siso ndorok terpemalum dekket uabba siso ndorok terpetadi.

⁶⁰Bagè sakit ntengngam siniidah ndènè i Mesir sempa mo taba kènè, janah oda ndorok malum iakap kènè.

⁶¹Ipemasa JAHOWA dèng ma mo mermatcam bagè sakit dekket wabba siso igegoli dèng ibas lapihen èn, lapihen Patiin JAHOWA. Nai iripasken mo kènè.

⁶²Kasi pè enggo bagè buè bintang i langit i bilangen ndènè, pellin cituk nai ngo kessa i tengah-tengah ndènè singgelluhna, kumerna oda tunduk kènè taba JAHOWA Dèbata ndènè.

⁶³Bagè lolona JAHOWA memerèken kiniduma bai ndènè dekket menambahi bilangen ndènè, lolo ngo Ia lako mengeripasken kènè. Ipuari mo kènè ibas nagerri oda ndekkah nè sinaing ianen ndènè.

⁶⁴Ipesompar-baèrken JAHOWA mo kènè mersellaten i tengah-tengah bangsa silot i suberri tanoh èn. I sidi mo kè gabè menembah dèbata sinibahan ipas kayu dekket batu nai, dèbata siso itandai kènè dekket siso itandai empung ndènè.

⁶⁵I tengah-tengah bangsa i oda lot jupa kènè kemènaken, janah oda lot bekkas sindorok dokenken ndènè kè sidasa; rembekbekken mo kènè ibaing JAHOWA janah mendellè oda lot harapen.

⁶⁶Pukpuk mo terancam bahaya nggelluh ndènè. Mahar ari berngin buradan kènè janah mbiar matè.

⁶⁷Barang kadè sambing pè idah kènè dak bukbak mo pusuh ndènè kumerna mbiar. Siceggen dèng pè naing mo katè ndènè roh gellap, janah tikan gellap naing mo katè ndènè ndor siceggen.

⁶⁸Ibaing JAHOWA mo kènè balik mi Mesir merkitè keppel, kasi pè enggo idokken ukum kènè oda nèngè balik mi sadènang. I sidi mo kènè mendèaken diri ndènè gabè hamba bai musuh ndènè, tapi sada kalak poda uè menokor kènè.”