Read Batak Dairi 5 Musa 29 Bible Online

5 Musa 29 - Batak Dairi bible

5 Musa 29

¹Enda mo kata perpadanen sinibakin si Musa merkitè perèntah JAHOWA meradepken bangsa Israel tikanna i tanoh Moab dèng kalak idi. Perpadanen èn imo merumangken tambahna i perpadanen sienggo ibakin JAHOWA dekket kalak i, i Delleng Sinai.

²Idokken si Musa mo karina kalak Israel merpulung, nai nina mo taba kalak i, “Enggo idah kènè sendiri bakunè ibakin JAHOWA meradepken raja Mesir, pugabèna dekket suberri nagerrina.

³Bagi ma idah kènè ngo bang olpek mahantu, tanda kelengangen dekket kelèganen sinihanaken JAHOWA.

⁴Tapi soh mi ari sidari èn oda iberèken dèng taba kènè pe- ngantusien lako mengarusi karina siniakapen ndènè i.

⁵Empatpuluh tahun mo dekkahna iuluken JAHOWA kènè memellus gurun pasir, tapi oda nggèut malè cipatu dekket oles ndènè.

⁶Oda lot roti mahan panganen ndènè, laè anggur barang pè ènumen mperngis, tapi ipepada JAHOWA ngo karina keperluen ndènè asa ibettoh kènè Ia ngo JAHOWA Dèbata ndènè.

⁷Janah tikan soh kessa kita mi bekkas ènda, roh mo Raja Sihon i Hesybon nai dekket Raja Og i Basan nai lako menjuhap kita. Tapi sitaluken ngo kalak i.

⁸Sitaban mo tanoh kalak i janah sipellaken bai marga Ruben, Gad dekket dèba marga Manasye.

⁹Asa naing mo nemmuken tuhu-tuhu kènè menguèi karina perpadanen ènda, asa merhasil karina usaha ndènè.

¹⁰I ari èn cènder ngo kènè karina i hadeppen JAHOWA Dèbata ndènè, karina huntuen marga, simpantasniasè, pakalima, karina anak laki,

¹¹daberru, anak-anak, dekket karina kalak sidèban simerian i tengah-tengah ndènè dekket simengurupi kènè menabah kayu dekket sipetaruh laè.

¹²Ibakin JAHOWA Dèbata ndènè ngo perpadanen dekket kènè, janah merpulung ngo kènè karina i sèn lako pehotken perpadanen i ninganna menjalo kadè patut ulaenken ndènè.

¹³Merkitè perpadanen idi ipetegguh JAHOWA ngo kènè i ari sidari èn gabè bangsaNa, janah Ia gabè Dèbata ndènè bagè siniperbagahNa i taba kènè dekket bai empung ndènè si Abraham, si Isak dekket si Jakob.

¹⁴Ibahanken JAHOWA perpadanen idi dekket karina sipatut ulaenken oda ngo pellin bai ndènè sambing,

¹⁵tapi mi gennep jelma sicènder i sèn ari sidari èn, i hadeppen JAHOWA Dèbatanta, dekket bai pemparenta mi podien èn.”

¹⁶“Ièngèt kènè dèng ngo barang bakunè nasipta i Mesir dekket barang bakunè kita merdalan memellus nagerri bangsa-bangsa sidèban.

¹⁷Enggo mo idah kènè gana-ganaen sembahen kalak i simerronah i ipas kayu nai, ibas batu, pirak dekket emmas nai.

¹⁸Asa jaga kènè mo diri ndènè ulang sanga lot sada kalak pè bai ndènè nai, daholi barang daberru, kadè-kadè barang pè marga si lot cènder i sèn, merbalik nola bai JAHOWA Dèbatanta nai lako mersembah taba dèbata bangsa sidèban idi. Ulah-ulah sibagidi tosè bagè urat mertunas gabè suan-suanen mpagit janah merbisa.

¹⁹Ulang mo lot merdok atè i tengah-tengah ndènè nai sienggo mendengkoh rana mposi i dak tong mendè nasipna, tukasi pè ia pukpuk menjuljulken ukurna sendiri. Perulaen sibagidi mengeripasken kènè karina ngo i, kalak jelma jahat bang pè ntèger.

²⁰Oda ngo iampuni JAHOWA jelma sibagidi. Baliksa, kenna laga JAHOWA ngo ia dekket karina olpek sitersurat ibas lapihen ènda sempa bana, soh iripasken JAHOWA ia.

²¹Gabè iperumpamaken mo ia i tengah-tengah marga Israel ibaing JAHOWA janah menghukumsa dekket sumpah sinigegoli ibas bulaban sitersurat ibas lapihen èn, lapihen pati-patiin JAHOWA.

²²I podi ari idahen pinempar ndènè dekket kalak sidèban siroh i nagerri sindaoh nai mo karina olpek dekket kinimago sinipesempa JAHOWA mi nagerri ndènè.

²³Karina juma ndènè gabè dakkir sap barèrang bak sira. Oda nèngè tersuanen tanohna, janah dukut pè oda nèngè nggèut turah i sidi. Tosè bagè kuta Sodom dekket Gomora, Adma dekket Zeboim mo nagerri ndènè sinipetumpat JAHOWA sinderrangNa hangat lagana.

²⁴Nai kuso-kuso mo suberri dunia, ‘Kasa ndia bagi pemakin JAHOWA taba nagerri kalak i? Kadè ngo makinsa bagidi hangatna lagana?’

²⁵Janah pengaloina imo, ‘Kumerna iosè kalak i bulaban JAHOWA, Dèbata empung kalak i; bulaban sinibakinNa dekket kalak i tikan iarak kalak i mbungkas i Mesir nai.

²⁶Isembah kalak i ngo dèbata sidèban siso itandai kalak i, keppèken enggo ngo igerra JAHOWA kalak i asa ulang menembah dèbata sidèban idi.

²⁷Kumernana i ngo melaga JAHOWA taba bangsaNa janah pesempaken mi nagerri kalak i karina olpek sienggo tersurat ibas lapihen ènda.

²⁸Mposi ngo mengenna pungur JAHOWA, janah ibas mpungurNa mposi i ipuar mo bangsa Israel i tanoh kalak idi nai janah mematakken kalak i mi nagerri sidèban gabè i sidi mo kalak i.’

²⁹Lot ngo barang piga-piga nai irusiaken JAHOWA Dèbatanta; tapi ukum pati-patinNa enggo ipetarar banta, janah kennah uènta bak pemparenta ngo idi soh mi sidekkah-dekkahNa.”