Read Batak Dairi 5 Musa 30 Bible Online

5 Musa 30 - Batak Dairi bible

5 Musa 30

¹“Bagèndari pè ndorok mo pilih kènè barang apaina tah pasu-pasu ngo barang tah sumpah bagè sienggo kupeterrang taba kènè. Mula enggo kessa irasai kènè karina kinidersa idi janah nggelluh i tengah-tengah bangsa sidèban bekkas ndènè ipemèrap JAHOWA Dèbata ndènè, terèngèt mo kènè mi pilihen sikuberèken bai ndènè.

²Mula naing balik kènè dekket pinempar ndènè taba Dèbata JAHOWA, janah mertuhu-tuhu menguèi ibas pusuh peratèen ndènè nai pati-patinNa sikuberèken bai ndènè i ari sidari èn,

³nai balik mo masèh atè JAHOWA Dèbata ndènè midah kènè. Iarak mo kènè balik ibas bangsa-bangsa bekkas ndènè mermèrapen idi nai janah ibaing nola ngo kènè nduma mengolihi.

⁴Tukasi pè kènè mèrap tah idikè i suberri tanoh èn, ipepulung JAHOWA Dèbata ndènè nola mo kènè janah mengarak kènè balik.

⁵Nai me- ngulaki nola mo kènè sidasa tanoh siniianen empung ndènè arnia. Janah ibaing mo kènè makin mi ndumana, janah bilangen ndènè pè ndaoh buèen dari pada bilangen empung ndènè kin.

⁶Berènkenna mo ukur merpenguèi bai ndènè dekket bai pinempar ndènè, gabè ikekelengi kènè mo JAHOWA Dèbata ndènè ibas nasa pusuh peratèen ndènè nai janah ndorok terrus merian i nagerri i.

⁷Karina sempetta idi idabuh nola mo taba musuh ndènè simerceggo atè janah mendersa kènè.

⁸Mengolihi nola mo kènè menguèi JAHOWA janah mengulaken karina perèntahNa sikuberèken taba kènè i ari sidari èn.

⁹Merhasil mo karina usaha ndènè ibaing JAHOWA Dèbata ndènè; marpar mo dukak-dukak ndènè janah mellak pinakan ndènè; lahlah mo hasil juma ndènè. Sampang mo atè JAHOWA memakin kènè gabè nduma, tosè bagè lolo atèNa memerèken kiniduma taba empung ndènè.

¹⁰Tapi kennah tunduk ngo kènè taba JAHOWA Dèbata ndènè janah menguèi karina patinNa sitersurat ibagasen lapihen ènda, imo lapihen Pati-patiin JAHOWA. Kennah balik kènè mendahisa ibas nasa perukuren ndènè nai.

¹¹Perèntah sikuberèken idi taba kènè oda pella mberratsu i bai ndènè janah oda ma pella ndaohsu.

¹²Oda ngo i langit bekkasna, gabè sanga nola kè mengkuso, ‘Isè mo laus mi sidi lako mengalengi banta, asa sidengkoh janah siuèi?’

¹³Oda ma ngo i kèpar laut bekkasna, gabè ikusoken kènè nola, ‘Isè mo laus mi kèpar laut mengalengi i lako banta, asa ndorok sidengkohken janah menguèisa?’

¹⁴Ulang mo kusoken kènè bagi, kumerna ndessing kalohon ngo patin idi taba kènè. Enggo mono ibettoh kènè i janah pandè ngo kènè pejojorken, pellin mengulaken nai ngo kessa.

¹⁵Sidari èn mo pilih kènè barang apaina ibas simendè dekket jahat nai, barang kenggeluhen ngo katè ndènè barang kematèen.

¹⁶Sidari èn kuperèntahken taba kènè lako mengkekelengi JAHOWA Dèbata ndènè janah tunduk tabasa ninganNa mengulaken nasa patiin dekket perèntahNa asa nduma kènè janah gabè bangsa mbellen. Ipasu-pasu JAHOWA Dèbata ndènè mo kènè i nagerri sinaing ianen ndènè oda nè sadikè nai dekkahna.

¹⁷Tapi mula oda ngo kènè tunduk janah oda uè mendengkohken, janah ibelli kènè diri ndènè ilalingken lako menembah dèbata sidèban,

¹⁸kennah ngo ripasenkenna kènè, janah oda nggeddang umur ndènè i nagerri sinaing ianen ndènè oda pella sadikè dakkah nai. Èngèt mo! Enggo kubagahken i taba kènè i ari sidari èn.

¹⁹Bagèndari pè pilih kènè mo barang siapaina tah kenggeluhen ngo barang kematèen, tah pasu-pasu JAHOWA ngo barang sumpahNa. Kutenggo mo langit dekket tanoh èn mahan saksi ibas keputusen ndènè. Pilih kènè mo kenggeluhen.

²⁰Kekelengi mo JAHOWA Dèbata ndènè, janah uèi mo Ia, janah setia mo kènè tabasa. Asa ndekkah kè nggelluh dekket pinempar ndènè i nagerri siniperbagah JAHOWA bai empung ndènè, si Abraham, si Isak dekket si Jakob.”