Read Batak Dairi 5 Musa 31 Bible Online

5 Musa 31 - Batak Dairi bible

5 Musa 31

¹Nai mengerana nola mo si Musa taba bangsa Israel,

²nina mo, “Bagèndari enggo mo siratus duapuluh tahun umurku janah mak tellap nèngè aku menguluken kènè. Nai nola dèng ma enggo idokken JAHOWA ukum aku oda ndorok menurèpari Laè Jordan.

³JAHOWA Dèbata ndènè sendiri ngo merdalan i lebbè ndènè janah mengeripasken bangsa-bangsa simerian i sidi, asa gabè ndorok kènè mengiani tanoh kalak i. Si Josua nola mo gabè menguluken kènè, bagè sinidokken JAHOWA.

⁴Ripasenken JAHOWA mo bangsa-bangsa i, tosè bagè penalukenNa taba raja Sihon dekket Og, raja kalak Amori, bagi dekket mengelala nagerri kalak i.

⁵Iberèken JAHOWA mo kemenangen taba kènè meraloken kalak i, nai kennah bakinen ndènè mo taba kalak i rembang bagè sikudokken bai ndènè.

⁶Ntegguh mo pikiren ndènè janah mboho! Ulang kènè mbiar midah kalak i, kumerna JAHOWA Dèbata ndènè sendiri ngo mengurupi kènè. Oda ngo ibelli kè mernong alè barang tadingenkenNa nola kè.”

⁷Nai idilo si Musa mo si Josua, janah idokken mo tabasa i hadeppen karina bangsa Israel, “Ntegguh mo ukurmu janah mboho alè Josua! Kono nola mo menguluken bangsa ènda lako menaban nagerri siniperbagah JAHOWA bai empung kalak i.

⁸JAHOWA ngo mengajari dekket mengurupi kono. Oda ngo ibelli kono mernong-alè barang pè tadingenkenNa nola ko. Kumarna i ulang mbiar barang rembekbekken kono.”

⁹Nai isuratken si Musa mo Patiin JAHOWA Dèbata janah iberèken taba imam-imam Lewi sinidokkenna lako menjamotken Pèti Perpadanen, dekket taba karina pengulu Israel.

¹⁰Iperèntahken ngo taba kalak i, “Gennep i punca tahun pepituken, ibas tahun menelangsaèken utang tupung Pèsta Sapo-sapo,

¹¹kennah jakaken kènè pati-patiin ènda dekket sora mbancar taba bangsa Israel si roh menembah JAHOWA Dèbata ndènè i bekkas sinipilihNa.

¹²Dokken mo karina anak laki, daberru dekket anak-anak bak kalak sidèban simerian i gennep kuta ndènè mertumpu lako mendengkohken penjakaen idi, asa merguru kalak idi pesangapken JAHOWA Dèbata ndènè janah setia menguèi pati-patinNa.

¹³Merkitè dalan bagidi ndorok mo dukak-dukak ndènè siso nung dèng mendengkoh tersèngèt JAHOWA Dèbata ndènè gabè mendengkohkensa janah merguru pesangapken JAHOWA sidekkah nggelluh kalak i i nagerri sinaing ianen ndènè oda pella sadikè dekkah nai i kèpar Laè Jordan.”

¹⁴Nai nina JAHOWA nola mo taba si Musa, “Oda ndekkah nèngè nggelluhmu. Jadi tenggoi mo si Josua janah arahken ia mi Undung-undungKu, asa Kupernoi ia.” Nai laus mo si Musa dekket si Josua mi Undung-undung JAHOWA,

¹⁵janah ipacidah JAHOWA mo dirina taba kalak i ibagasen tihang hembun i gembar pèntu Undung-undung i.

¹⁶Nina JAHOWA mo mbang si Musa, “Enggo njolmit ajalmu. Enggo kessa Kumellip kono oda nèngè mo setia bangsa Israel taba Aku janah mengosè padan sienggo Kubahan dekket kalak i. Itadingken kalak i mo Aku lako menembah dèbata sinisembah i nagerri sinaing bengketten kalak i, oda pella sadikè dekkah nai.

¹⁷Mula masa kessa i, kèkè mo lagangKu meradepken kalak i. Kutadingken mo kalak i janah Kubinasaken. Mèduk mo olpek sempa taba kalak i, nai satdar mo kalak i, masa pè karina idi kumerna Aku Dèbata kalak i, oda nèngè mendengani kalak i.

¹⁸Tikan bagidi oda uè Aku mengurupi kalak i, kumerna enggo isembah kalak i dèbata sidèban janah mengulaken jahat.

¹⁹Bagèndari pè suratken mo èndè èn janah ajarken bai bangsa Israel sikira kesaksien bai kalak i.

²⁰Kuarak mo kalak i mi nagerri kaya janah nggabur, bagè sienggo Kuperbagah bai empung kalak i. I sidi mo kalak i nggelluh mersennang-sennang janah terolih pangaen siniperluken kalak i. Tapi kenggonna merbalik nola ngo kalak i janah menembah dèbata sidèban. Itulak kalak i mo Aku janah me- ngosè padan,

²¹janah mermatcam bagè mo kememago sempa taba kalak i. Tapi ukum endè èn dak ngo iendèken janah ipakkè mahan saksi bai kalak i. Salang bagèndari pè, sinderrang mak dèng Kubabai kalak i mi nagerri siKuperbagah i, enggo ngo Kubettoh perukuren kalak i.”

²²I arinkenna i ma mo isuratken si Musa èndè idi, nai iajarken taba bangsa Israel.

²³Enggo kessa i mengerana mo JAHOWA taba si Josua, anak si Nun, nina mo, “Dak ntegguh mo perukurenmu janah mboho, alè Josua! Kono nola mo menguluken bangsa Israel memengketti nagerri siKuperbagah i taba kalak i, Kuurupi pè kono.”

²⁴Nai isuratken si Musa mo Patiin Dèbata ibas sada lapihen. Seppè kalohon ngo isuratken i bennana nai soh mi puncana.

²⁵Enggo kessa pul, nina mo taba imam-imam Lewi sinidokkenna lako menjamotken Pèti Perpadanen,

²⁶“Buat kènè mo lapihen Patin Dèbata ènda, janah baing mo i sisi Pèti Perpadanen JAHOWA Dèbata ndènè, asa dak tong lot i sidi sikira kesaksin taba bangsa i.

²⁷Kubettoh ngo mpihir kalohon ukur kalak i janah dak lemmo atèna mengalo. Sidekkah i nggelluhku dèng kin pè dak mengalo ngo kalak idi taba JAHOWA; makinsa nola mo luas, enggo kessa matè aku!

²⁸Bagèndari pè dokken mo karina pengulu bangsa dekket karina pakalima merpulung i lebbèngku, asa kubagahken tersèngèt mi sèn taba kalak i. Kumangmangken mo mi langit dekket tanoh èn sikira saksi taba kalak i.

²⁹Kubettoh ngo enggo kessa matè aku, gabè makin jahatna mo kalak i janah menulak kadè sienggo kuajarken bai kalak i. Janah daoh-daoh arien sempa mo kememago bai kalak i, kumerna idungkul kalak i laga JAHOWA merkitè me- ngulaken kadè sinigerraNa.”

³⁰Nai ièndèken si Musa mo èndè èn soh pul ninganna idengkohken bangsa Israel.