Read Batak Dairi 5 Musa 32 Bible Online

5 Musa 32 - Batak Dairi bible

5 Musa 32

¹“Dengkohken mo alè langit, sekel ngo aku mengerana; alè tanoh èn, pecingir mo penggelmu!

²Katerra pè susur mo peddahku tosè bagè udan, dekket ranangku menunggèap bagè hembun, bagè udan rintik-rintik i babo dukut-dukut, dekket udan darèdè i babo suan-suanen.

³Kupoji mo gerar JAHOWA. Sukutken mo kehejien Dèbatanta!

⁴JAHOWA perheji ngo pengampinimu, seppè ngo sinibahanNa, janah ntèger ngo karina dalanNa. Setia ngo Dèbata ndènè, oda lot akkal-akkal bana, selloh ngo iulaken janah bennar.

⁵Tapi ukum kènè imo bangsa siso setia, janah oda nè patut gabè bangsaNa, bangsa sidom kejahaten dekket dosa.

⁶Bagi mo kènè memales kinimendè JAHOWA, alè kènè kalak moto janah siso merroka? Otang Ia ngo Bapa ndènè, Simenempa kènè, simemakin kènè gabè sada bangsa?

⁷Èngèt mo siarnia, datèken mo jaman cundut sikahia. Kusoken mo taba partuamu, asa ibagahken kalak i bamu.

⁸Tikan ibagiken Sintèmbul kalohon idi tanoh, gennep bangsa itentuken ladangna dekket dèbata sikira perkuasa.

⁹Tapi ukum pemparen si Jakob èn ipilih JAHOWA gabè milikNa sendiri.

¹⁰Idapet ngo kalak i sidang mardap-ardap i bekkas melongo i rambah lunglang. Nai iondingi janah ipehèdu-hèdu mo kalak i karina janah idèdah bagè milikNa.

¹¹Tosè bagè keliki mengajar anakna ngkabang menjamotkensa ipas kabengna ngkèrbang janah mencukungsa mi babo kabengna,

¹²bagidi mo JAHOWA sendiri menguluken bangsaNa, oda lot dèbata sidèban mendenganisa.

¹³Ibakin ngo kalak i mengerajai delleng-delleng; ipangan kalak i mo hasil jumana janah mènum tenggoli rambah i delleng batu nai. Dapetten minak ngo kalak i ibas kayu zaitun nai si turah i tanoh simerbatu i.

¹⁴Lembu dekket kambing, biri-biri kalak i menghasilken mbuè susu; pinakan kalak i ngo simerandalna tuhu, pagè bak laè anggur kalak i simendèna tuhu.

¹⁵Gabè kaya mo bangsa JAHOWA, tapi dak-dak mengalo, nggomok-nggomok ngo kalak i, bessur pangaen. Nai itadingken kalak i mo Dèbata, Situmempasa janah menulak simergegoh Sipeluahkensa.

¹⁶Isembah kalak i mo dèbata sidèban, gabè cimburu mo JAHOWA, kumerna kejahaten idi seggat mo lagaNa.

¹⁷Ipèlèken kalak i ngo pèlèen taba tendi jahat siso Dèbata, taba dèbata sidèban siso tinandanna, dèbata sidèban sirimbaru siso ikebiari empungna.

¹⁸Iètongi kalak i nè poda simergegoh Sipaluahkensa, ilupaken kalak i ngo Dèbata simemerèken kenggelluhenna.

¹⁹Mengidah i, gabè melaga mo JAHOWA, janah menulak dukak-dukakNa.

²⁰Nina mo, ‘Oda uè nèngè Aku mengurupi kalak i; asa Kuidah bakunè ujung sudah kalak i. Kerna mpihir ngo ukur bangsa i janah bana oda setia.

²¹Cimburu ngo Aku ibakin kalak i midah siso Dèbata, janah melaga midah gana-ganaenna. Nai Kubakin mo ummatKu cimburu midah siso bangsa, janah melaga midah bangsa lengah.

²²Nggerger ngo lagangKu bagè api simengelekkup soh mi dunia kalak simatè. Ilekkup api i ngo tanoh dekket karina hasilna, dekket delleng-delleng soh mi urat-uratna.

²³Dak pukpuk mo Kupemasa olpek bak mara Kutèmbakken mo taba kalak i panahKu karina.

²⁴Mermatèen mo kalak i kumerna panè dekket kelèhèen, dekket kumerna sakit ntengngam kalohon. Kubelli mo kalak i ijerngem binatang sinirambah, dekket ipagut nipè merbisa.

²⁵Gerraha merembahken kematèen i gennep dalan; bejogiten sempa bai jelma silot i rumah. Kalak simatah daging dekket simerbaju bajar ipengeripasken, bang anak mbara dekket kalak sienggo tua-tua.

²⁶Naing ngo kalak i karina Kutumpatken asa ulang lot nè kalak i mahan èngèten.

²⁷Tapi oda lemmo atèngKu musuh Israel gabè gegah; asa ulang kalak i salah sangka janah mendokken enggo italuken kalak i ummatKu,’ keppèken Aku ngo memakinsa.

²⁸Sada bangsa siso lot pertimbangen ngo ukum Israel, oda lot pengantusien bai kalak i.

²⁹Ukum bijak kin nemmuken kalak i, tentu iarusi kalak i, janah memikirken ujung sudah kalak i.

³⁰Bakunè mo ndorok sada kalak menjalang seribu kalak, janah dua kalak memaing mperrus sipuluh ribu kalak? Enggo idèaken, JAHOWA Dèbatana kalak i; enggo itadingken Dèbata simergegoh i kalak i.

³¹Ibettoh musuh Israel ngo ukum perculèndungen kalak i, oda bagè Dèbata perculèndungen Israel.

³²Kumerna jahat ngo kalak i tosè bagè Sodom dekket Gomora, bagè batang anggur mpagit janah merbisa buahna.

³³Laè anggur kalak i imo racun nipè merbisa.

³⁴Ièngèt JAHOWA ngo ulah-ulah musuh ummatNa janah ihukum ngo kalak i tupung katikana.

³⁵JAHOWA ngo memales dekket menghukum kalak i, oda ndekkah nèngè ripas mo kalak i ndor mo roh katika persudahna.

³⁶Paluahen JAHOWA mo ummatNa janah mermasèh atè taba naposoNa, mula idah kessa kalak i oda merdaya janah enggo kerri gegohna.

³⁷Nai ikusoken JAHOWA mo taba ummatNa ‘Enggo idikè dèbata sidèban simergegoh siniasangken ndènè i?’

³⁸Ipangani kalak i ngo pessoh-pessoh sinipèlèken ndènè, dekket mengènum laè anggur sinipèlèken ndènè. Dokken mo kalak i roh mengurupi kènè, baing mo kalak i percilèndungen ndènè.

³⁹Tengngen mo sadaKu ngo kessa Dèbata, oda lot laènken Aku Dèbata. Aku ngo memunuh dekket pegelluhken, mengugahi dekket pejuahken. Mula mengulah Aku, sada kalak poda ndorok mengalo.

⁴⁰Merkitè Aku sendiri, Dèbata singgelluh, Kupekèkè tanganKu mi dates janah mersumpah.

⁴¹Kugarut melaha-laha peddangKu janah pedalanken hukumKu. Kubales bai karina alongKu janah Kuhukum karina simergogo atè baKu.

⁴²Merlapu daroh kalak i mo panahKu; karina simengalo Aku Kubunuh merkitè peddangKu. Oda Kubelli barang isè mengalo Aku; kalak sitertaban dekket siugahen kennah ngo matè ma.

⁴³O kènè karina bangsa, poji kènè mo ummat JAHOWA, kumerna ihukum JAHOWA ngo karina simemunuh kalak i. Ibalesken ngo hellem taba musuhNa tapi isasa ngo dosa ummatNa.”

⁴⁴Iendèken si Musa bak si Josua anak si Nun ma ngo endè idi, gabè karina bangsa Israel ngo mendengkohkensa.

⁴⁵Enggo kessa pul ibagahken karina ped- dah pengajari JAHOWA taba bangsa Israel, nina si Musa mo,

⁴⁶“Peratè-atèken kènè mo karina tennah sienggo kubagahken taba kènè i ari èn. Peddahken mo taba dukak-dukak ndènè, asa tuhu-tuhu setia kalak i mengulaken karina patien JAHOWA.

⁴⁷Oda ngo rana rana luap peddah i, tapi ingo nggelluhmu. Uèi mo karina perèntah idi, asa ndekkah kènè nggelluh i nagerri sinaing ianen ndènè sigejap nai i kèpar Laè Jordan.”

⁴⁸Arinkenna i ma idokken JAHOWA mo mbang si Musa,

⁴⁹“Laus mo ko mi Uruk Abarim i nagerri Moab i kèparen kuta Jeriko. Nai menangkeng mo ko mi delleng Nebo janah tatap mo tanoh Kanaan siso pella ndekkah nèngè naing Kuserahken bai bangsa Israel.

⁵⁰Matè mo kono i babo delleng idi, bagè kakamu si Aron matè i Delleng Hor.

⁵¹Oda ngo setia kènè duana taba Aku janah oda ipesangap kènè Aku i hadeppen bangsa Israel sinderrangna i takal laè Meriba kènè merian, i gembar kuta Kades, i padang gurun Zin.

⁵²Kumerna i oda ndorok kono mbengket mi nagerri siKuberrèken bai bangsa Israel; pellin menatap ngo ko kessa ndorok i sindaoh nai.”