Read Batak Dairi 5 Musa 33 Bible Online

5 Musa 33 - Batak Dairi bible

5 Musa 33

¹Sinderrang mak dèng matè si Musa, pasulakken Dèbata, ipasu-pasu mo bangsa Israel merkitè katana bagèen:

²“Roh ngo JAHOWA i Delleng Sinai nai; mbincar ngo Ia i babo Edom tosè bagè mataniari janah ibendangi bangsaNa i Delleng Paran nai. Idengani sipuluh ribu malaèkatNa ngo Ia; mergollah ngo api kan kamuhunNa.

³Tuhu-tuhu ngo, JAHOWA mengkekelengi bangsaNa ilènggemmi ngo karina kalak sienggo gabè milikNa. Kita kènè mo mersembah mi lebbè nènèhNa janah menguèi pati-patinNa.

⁴Siuèi mo patien siniberèken si Musa, harta bangsa èn simahargana kalohon.

⁵Tikan mertumpu Israel dekket kalak simengulukensa, JAHOWA ngo gabè Raja ummatNa.”

⁶Tersèngèt marga Ruben, nina si Musa ngo, “Katerra pè ulang mo nung marga Ruben binasa, kasi pè oda piga bilangenna.”

⁷Tersèngèt marga Juda nina ngo: “Ialè JAHOWA dengkohken mo dilo-dilo Juda; pesada mo kalak i balik dekket bangsana. Mergeraha mo ko mengurupi kalak i, alè JAHOWA, urupi mo kalak i meraloken musuhna.”

⁸Tersèngèt marga Lewi nina mo: “Merkitè Urim dekket Tumim ipetarar Kono harkatMu, tarap kalak Lewi, naposoMu bujur jah setia. Enggo ioji Kono kalak i i Masa, janah mersoal dekket kalak i i laè mul Meriba.

⁹Setia ngo kalak i taba Kono mengelebihi karinana lebbih bagè kadè-kadè bak partua. Iuèi kalak i ngo pati-patinMu, perpadanenMu iteppati kalak i.

¹⁰Iajari kalak i ngo ummatMu menguèi karina patinMu janah memèlèken pèlèen i babo langgatenMu.

¹¹Alè JAHOWA urupi mo asa mergegoh marga i, katerra pè dak lemmo mo atèMu midah perulaen kalak i. Ripasken mo karina musuh kalak i asa ulang terbaing kalak i nè kèkè.”

¹²Tersèngèt marga Benjamin nina mo: “En mo marga sinikekelengen JAHOWA. Ilenggemmi ngo kalak i mahar dekket berngin janah merian i tengah-tengah kalak i.”

¹³Tersèngèt pemparen si Josep nina ngo: “Dak ipasu-pasu JAHOWA mo tanoh kalak i merkitè udan, dekket merkitè laè i terruh tanoh nai.

¹⁴Katerra pè gennep tahun mo ratraten buah suan-suanenna buah simerandal kalohon ntasak i benana.

¹⁵Katerra pè karina urukna i sinuria nai dom hasil tanoh selloh kalohon i.

¹⁶Katerra pè dak mo idomi tanohna dekket nasa simerandalna kalohon, janah ipasu-pasu mendè basa JAHOWA simengerana i rambah simergollah-gollah i nai. Katerra pè sampur mo pasu-pasu idi mi pinempar si Josep, kumerna ia ngo pengulu i tengah-tengah dengngan sibeltekna.

¹⁷Gegoh si Josep lot bagè sada kerbo tonggal, dekket bagè tanduk lembu tonggal meriar imo Manasye si merribu-ribu dekket merpuluh ribu Efraim. Itambihi ngo mèduk bangsa-bangsa janah isesakken soh mi punca dunia èn.”

¹⁸Tersèngèt marga Zebulon dekket Isasar nina ngo: “Katerra pè nduma mo Zebulon kumerna perdalan-dalanna, janah sennang ukur Isasar i gennep undung-undungna.

¹⁹Idilo kalak i ngo bangsa-bangsa mi dellengna janah memèlèken pèlèen bennar i bekkas i ma. Dapet kalak i ngo kinibèak i laut nai, dekket ibas kersik silot arur i biding laut i nai.”

²⁰Tersèngèt marga Gad nina ngo: “Terpoji mo Dèbata sipebelangken ladang kalak Gad. Dak mèma ngo Gad bagè sada singa lako memerngas betekken barang koling takal.

²¹Ibuat ngo tanoh simerandalna bana sulang raja iberèken taba kalak i ma. Iulaken kalak i ngo karina perèntah dekket patien JAHOWA sinderrang mertumpu pengulu Israel karina.”

²²Tersèngèt marga Dan nina ngo: “Tosè bagè sada singa bajar ngo Dan nai merdigal karuar i Basan nai.”

²³Tersèngèt marga Naptali nina ngo: “Ukum Naptali idomi ngo dekket pasu-pasu bak masèh atè JAHOWA; ladangna i tao Galilea nai sakat mi Selatan.”

²⁴Tersèngèt marga Asyer nina ngo: “Ipasu-pasu ngo Asyer mengelampoi marga-marga sidèbanna; katerra pè gabè kekelengen kaka-anggina mo ia, janah merandal ngo turah kayu zaitun i tanohna.

²⁵Katerra pè ilegenni mo karina kutana merkitè pèntu-pèntu pengkeruhen bessi dekket tembaga asa sennang janah mènak nggelluhna.”

²⁶“Alè Israel, oda lot dèbata bagè Dèbatamu; ilampoi ngo langit raya janah ibellus ngo hembun lako mengurupi kènè.

²⁷Soh mi amman sumendah ngo Dèbata gabè perculèndungen ndènè, hot ngo bitekkenNa menoat kènè. Ipelaus ngo musuh i hadeppen ndènè nai, janah ipasulak kènè mengeripasken kalak i.

²⁸Nai mersennang-sennang mo nggelluh pemparen si Jakob i nagerri dom pagè bak laè anggurna, janah ibaing merlaè merkitè hembun i langit nai.

²⁹Sayur ntua mo ko, alè Israel! Oda lot bangsa bagè kono ipaluah JAHOWA. Tosè bagè peddang bak onding-onding ngo JAHOWA bamu; lako menjamotken kono bak merèken kemenangen bamu. Merrohen mo musuh-musuhmu mengido masèh atè, janah iperjati kono mo kalak i.”