Read Batak Dairi 5 Musa 34 Bible Online

5 Musa 34 - Batak Dairi bible

5 Musa 34

¹Nai itadingken si Musa mo kèndet Moab janah inangkengi mo Delleng Nebo, mi pucuk Pisga kan kebincaren Jeriko. I sidi mo ituduhken JAHOWA tabasa karina nagerri i, imo: Ladang Gilead mi Utara soh mi kuta Dan,

²karina aur Naptali; aur Efraim dekket Manasye, aur Juda mi kesunduten soh mi Laut Tengah;

³arah mi Selatan Juda dekket kendet si arur i Zoar nai mi Jeriko, kuta sidom dekket batang korma.

⁴Nai nina JAHOWA mo mbang si Musa, “Idi mo nagerri siKuperbagah bai si Abraham, si Isak dekket si Jakob lako isohken bai pinempar kalak i. Kupacidah idi bamu, alè Musa, tapi oda Kuduè kono laus mi sidi.”

⁵Nai matè mo si Musa naposo JAHOWA i tanoh Moab, bagè sienggo iruapken JAHOWA kin ilebbènkenna i.

⁶Ikuburken JAHOWA mo ia i sada lembeng i Moab i kèpar kuta Bet-Peor, tapi soh mi ari sidari èn isè poda lot bettoh-bettohen tah tupung idikè pendèbanna.

⁷Matè mo si Musa tikan merumur siratus duapuluh tahun. Oda moru gegohna janah pendidahna pè tong ngo ntangkas.

⁸Itangisi bangsa Israel mo si Musa i kendet Moab janah merhendem kalak i sidekkah tellupuluh ari.

⁹Nai ipesenggep JAHOWA mo kebijaken bai si Josua anak si Nun kumerna ia ngo iteddo si Musa mahan gancihna. Merpenguèi ngo bangsa Israel taba si Josua janah mengulaken pati-patien siniberèken JAHOWA bai kalak i merkitè si Musa.

¹⁰Oda lot nèngè nabi i Israel bagè si Musa pehadep abè mengerana dekket JAHOWA.

¹¹Oda lot kalak menghanaken tanda-tanda kelengangen bak kelèganen bagè sinihanaken si Musa meradepken nagerri Mesir, rajana dekket pugabè-pugabèna rembang bagè perèntah JAHOWA.

¹²Oda lot simenghanaken ulaen mahantu janah meheji bagè sinibakin si Musa i hadeppen karina bangsa Israel.