Read Batak Dairi 5 Musa 5 Bible Online

5 Musa 5 - Batak Dairi bible

5 Musa 5

¹Ipetumpu si Musa mo karina bangsa Israel, nai nina mo taba kalak i, “Kènè alè karina kaka-anggi, dengkohken kènè mo pati-patiin sikuberèken bai ndènè ari èn. Guruken kènè mo pati-patiin idi, janah setia mo kènè mengulaken i.

²Ibakin JAHOWA Dèbatanta ngo sada perpadanen i delleng Sinai,

³oda manihan bai empungta sambing tapi dekket kita karina sinisèn ngo.

⁴Ibas api i babo delleng idi nai mengerana ngo JAHOWA simbabah dekket kènè.

⁵Tapi kerna buradan kènè midah api janah oda pang menangkih delleng, nai cènder mo aku tikala i, i kellang-kellang ndènè bak JAHOWA lako pesakatken rana JAHOWA bai ndènè.

⁶Itingtingken JAHOWA mo, ‘Aku ngo JAHOWA Dèbata ndènè simengarak kènè mbungkas i Mesir nai, bekkas ndènè iperhamba.

⁷Ulang sembah dèbata-dèbata sidèban. Pellin Aku sambing mo kessa sembah.

⁸Ulang gana bamu gana-gana simencodi barang kadè sambing pè silot i langit, i tanoh èn barang pè sinibagasen laè siniterruh tanoh.

⁹Ulang sembah gana-gana sibagidi kumerna Aku ngo JAHOWA Dèbatamu janah oda uè Aku ipecodi mi barang kadè sambing pè. Kalak simernggogo atè taba Aku Kuhukum ngo soh mi pinemparna cundut petelluken dekket peempatken.

¹⁰Tapi masèh ngo atèngKu midah merribu-ribu pemparen kalak simerkelleng atè midah Aku janah simenguèi pati-patiinKu.

¹¹Mak ndorok dokenken gerarKu mula mak mendè dalanna, kumerna Aku, JAHOWA Dèbatamu, menghukum barang isè sambing maing melancang gerarKu.

¹²Pèstaken mo ari Sabat janah hormati kènè mo i gabè ari Simbadia, kumerna Aku ngo JAHOWA Dèbatamu simendokken idi taba kènè.

¹³Kuberèken ngo bai ndènè ennem ari lako mahan bahaen,

¹⁴tapi ukum ari pepituken idi ari pentadien simerkedekoen baKu, JAHOWA Dèbatamu ngo i. Ukum sidarinkenna i sada kalak poda ndorok mahan bahaen, barang kènè, dukak-dukak ndènè, naposo-naposo ndènè, pinakanmu barang kalak sideban simerian i kutamu. Karina naposomu kennah mentadi ngo bagè kènè sendiri.

¹⁵Engèt mo iperhamba kin ngo kè- nè pè arnia i Mesir, nai ipeluah JAHOWA Dèbata ndènè merkitè kegegohenna simehe- ji i. Kumerna i mo asa Kudokken kènè lako memèstaken ari Sabat.

¹⁶Pesangap janah pehèdu-hèdu kènè mo bapa dekket inang ndènè; idi ngo perèntahKu, JAHOWA Dèbata ndènè, asa sayur ntua kènè janah ndekkah nggelluh i tanoh sinaing berènkenKu bai ndènè.

¹⁷Ulang memunuh.

¹⁸Ulang merlangkah julu meddem.

¹⁹Ulang menangko.

²⁰Ulang kènè mengindangken kata siso tuhu terèngèt kalak sidèban.

²¹Ulang kènè uè menakiken alah ni dèba: Sapona, tanohna, sinibagesna, hamba-hambana, pinakanna, kalodèna bak barang kadè sambing silot bana.’

²²Idi mo pati-patiin siniberèken JAHOWA bai ndènè sinderrangna merpulung kènè i delleng. Tikanna mengerana Ia merkitè sora merdiung ibas api dekket hembun ngkapal nai, iberèken mo pati-patiin idi, janah oda ngo sidèban memerèken. Nai isuratken mo ipas dua batu tettal janah iberèken taba aku.”

²³“Sinderrangna mergollah karina delleng i janah idengkoh kènè sora ibas sigellap idi nai, roh mo karina pengulu-pengulu marga ndènè dekket pungkuh-pungkuh jelma nterrem mendahi aku.

²⁴Nina kalak i mo, ‘Enggo ipetarar JAHOWA Dèbatanta kehejien dekket kemuliaenNa sinderrang kudengkoh kami Ia mengerana ibas api nai. Sidari èn enggo mo kusaksiken kami magahken ndorok ngo keppèken nggelluh tong jelma i, kasi pè enggo mengerana Dèbata dekketsa.

²⁵Tapi kasa dèng kennah kupejuhap kami kessah nami? Ripasenken api simahantu i mo kami èn! Dok atè nami matè nai ngo kami mula kudengkoh kami dèng mengerana Dèbata JAHOWA.

²⁶Nung ma ngo idah kènè lot jelma tong dèng nggelluh ia mula enggo kessa idengkoh Dèbata singgelluh i mengerana ibas api nai?

²⁷Kumerna i, lako mo alè Musa, dengkohken mo karina sinidokken JAHOWA Dèbatanta, nai bagahken mo taba kami kadè sinidokkenNa bamu. Kudengkoh janah kuuèi kami pè.’

²⁸Mendengkohken idi, nina JAHOWA mo taba aku, ‘Enggo Kubeggè kadè sinidokken bangsa i, janah tuhu ngo rana kalak idi i.

²⁹Cuba mo ukum dak bagidi kin nemmuken perukuren kalak i! Ukum dak ipesangap kalak i kin nemmu Aku janah menguèi karina patinKu, asa gabè mersennang-sennang kalak i bak pinemparna soh mi amman sumendah!

³⁰Lako mo janah dokken mo bagèndari bangsa i balik mi undung-undungna gennep.

³¹Tapi ukum ko, Musa, balik nola mo ko janah merian isèn mo ko rebbak dekket Aku; naing Kuberèken ngo bamu karina hukum dekket patiinKu. Ajarken mo bai kalak i, asa iuèi janah iulaken kalak i i nagerri sinaing Kuberèken bai kalak i.’

³²Kènè alè kaka-anggingku, uèi kènè mo selloh karina sinitennahken JAHOWA Dèbata ndènè taba kènè. Ulang lausken kene agia sada pe ibas perèntah-perèntah idi nai.

³³Ulaken mo karina siniperèntahken JAHOWA Dèbatamu bai ndènè asa ncayur tua kènè janah tong merian i nagerri sinaing ianen ndènè i.”