Read Batak Dairi 5 Musa 6 Bible Online

5 Musa 6 - Batak Dairi bible

5 Musa 6

¹“Idokken JAHOWA Dèbata ndènè i ngo aku mengajarken karina patiin ènda taba kènè asa iulaken kènè i nagerri sinaing ianen ndènè oda ndekkah nèngè.

²Naing mo nemmuken kènè bak pinempar ndènè sidekkah nggelluh pesangapken JAHOWA Dèbata ndènè janah menguèi karinana patiinNa sikupesakat taba kènè, asa ndekkah kènè nggelluh i nagerri idi.

³Kumerna i dengkohken kènè mo alè kaka-anggi, ulaken kènè mo idi ibas nasa ukur ndènè nai, asa sayur ntua kènè janah gabè bangsa mbellen i nagerri kaya janah nggabur idi, bagè siniperbagah JAHOWA Dèbata empungta i.

⁴Alè dengan, èngèt kènè mo! Pellin JAHOWA, janah JAHOWA sambing ngo kessa Dèbatanta!

⁵Kekelengi kènè mo JAHOWA Dèbata ndènè ibas nasa pusuh peratèen ndènè: Tuduhken mo idi ibagasen nggelluhmu dekket ibas perulaenmu.

⁶Ulang cuba-cuba kènè mengelupaken pati-patiin sikuberèken bai ndènè sidari èn.

⁷Ajarken mo bai dukak-dukak ndènè. Naing mo dak terèngèti kènè idi i bages dekket i ruar bages pè, tikan mentadi barang pè tikan mengula.

⁸Tapelken mo ibas betekenmu janah lekketken ibas perdempakenmu asa dak ièngèt-èngèt.

⁹Suratken mo i tihang pèntu bages dekket i pèntu pengkeruhen ndènè.”

¹⁰“Merpadan ngo JAHOWA Dèbata taba empung ndènè si Abraham, si Isak dekket si Jakob, magahken naing iberèken ngo nagerri idi bai ndènè. Mbelgah ngo kutana janah nduma, janah oda ngo kènè memajek idi.

¹¹Dom harta ngo karina bagesna i merandal-merandal, janah oda ngo cinari ndènè i. Jumpa kènè mo i sidi sumur-sumur, janah oda ngo kènè mengkurak idi. Dapetten pekken anggur ngo kènè i sidi dekket pekken Zaitun, janah oda ngo kènè menuan i. Mula iarak JAHOWA kènè mi nagerri i, janah keloten mo kènè i barang kadè sambing iperluken kènè mahan pangaen ndènè,

¹²jamoti kènè mo mendè-mendè asa ulang ilupaken kènè JAHOWA sienggo paluahken kènè i Mesir nai, bekkas ndènè iperhamba i.

¹³Pesangap mo JAHOWA, Dèbata ndènè, janah pellin baNa sambing mo kènè mersembah, janah mula mersumpah kènè, bakin mo merkitè gerarNa sambing.

¹⁴Ulang sembah kènè dèbata-dèbata sidèban sinisembah bangsa-bangsa simerian i sikuliling ndènè.

¹⁵Mula isembah kènè dèbata-dèbata sidèban i, sempa mo bai ndènè laga JAHOWA Dèbata ndènè, janah iripasken mo kènè karina, kumerna oda uè ipecodi JAHOWA Dèbata ndènè silot i tengah-tengah ndènè i mi barang kadè pè.

¹⁶Ulang mo unjuni kènè JAHOWA Dèbata ndènè bagè sinibakin ndènè i Masa.

¹⁷Uèi mo karina patiin siniberèken JAHOWA Dèbata ndènè bai ndè.

¹⁸Ulaken mo barang kadè dok atè JAHOWA mendè janah adil, asa sayur ntua kènè. Tanoh nggabur siniperbagah JAHOWA bai empung ndènè, gabè milik ndènè ngo idi,

¹⁹janah ipuari kènè mo musuh-musuh ndènè bagè sienggo ijandiken JAHOWA kin.

²⁰Daoh-daoh arien ipodi ari kuso-kuso mo dukak-dukak ndènè taba kè, ‘Kasa idokken JAHOWA Dèbatanta kita menguèi karina patiin idi?’

²¹Nai kennah bagèen mo pengaloi ndènè, ‘Ukum arnia hamba raja Mesir ngo kita, nai ipaluah JAHOWA mo kita merkitè kuasa mbellen.

²²Kusaksiken kami sendiri ngo ihanaken JAHOWA kelengangen-kele- ngangen dekket memaing mermatcam bagè olpek taba kalak Mesir dekket bai raja kalak i bak karina pugabèna.

²³Ipaluah ngo kita i Mesir nai lako mabai kita mi sèn janah tanoh èn ngo iberèken banta bagè sienggo niperbagahNa bai empungta.

²⁴Idokken JAHOWA Dèbatanta mo kita mengulaken karina patiin idi janah pesangapkenSa. Mula siulaken ngo bagi, dak tong mo ijamoti bangsanta asa pukpuk nggelluh ibagaen damè janah sennang.

²⁵Mula tuhu-tuhu ngo kita setia menguèi karina sinitennahken JAHOWA Dèbatanta banta, ngkelleng mo atèNa taba kita.’ ”