Read Batak Dairi 5 Musa 7 Bible Online

5 Musa 7 - Batak Dairi bible

5 Musa 7

¹“Ibabai JAHOWA Dèbata ndènè ngo kènè mi nagerri sinaing ianen ndènè, janah mèduk mo bangsa ipelaus i sidi nai. I lebbè mata ndènè ngo ipelaus pitu bangsa nterremmen janah mergegohen bai ndènè nai, imo kalak Het, Girgasi, Amori, Kanaan, Feris, Hewi dekket Jebusi.

²Mula enggo kessa ipesakat JAHOWA Dèbata ndènè i bangsa-bangsa i mi terruh kuasa ndènè janah italuken kènè kalak i, bunuh kènè mo kalak i karina. Ulang masèh atè ndènè bai kalak i barang merpadan dekket kalak i.

³Oda ndorok kabin kènè dekket kalak i, janah ulang duè kènè dukak-dukak ndènè kabin dekket kalak i,

⁴asa ulang ipedaoh kalak i dukak-dukak ndènè bai JAHOWA nai lako menembah dèbata-dèbata sidèban. Mula isembah kènè dèbata-dèbata sidèban, punguren mo JAHOWA janah sintempu mo kènè iripasken.

⁵Kumerna i, rumpakken mo langgaten-langgaten bangsa i karina, reppuki mo pandak-pandak batu siniètong kalak idi keramat, runggangken kènè mo pertanda-pertanda Asyera, janah lekkup kènè mo gana-ganaen sembahen kalak i.

⁶Ulaken kènè mo karina idi kumerna milik JAHOWA Dèbata ngo kènè. Ibas karina bangsa sinibabo tanoh èn, kènè ngo sinipilih JAHOWA Dèbata ndènè lako gabè bangsaNa sitermurmur.

⁷Ikekelengi janah ipilih JAHOWA pè kènè, oda ngo kumerna nterremmen kènè daripada bangsa-bangsa sidèban i nai; ukum situhuna kènè ngo bangsa sikèdèkna i babo tanoh èn.

⁸Tapi ipilih JAHOWA ngo kènè kumerna ikekelengi ngo kènè janah lako pesautken padan sienggo ibahanken dekket empung ndènè. Kumerna i ngo asa enggo ipaluah kènè merkitè kuasaNa mbellen i janah ipaluahi kènè ibas perhambaen raja Mesir nai.

⁹Engèt mo, pellin sada JAHOWA Dèbata ndènè i ngo kessa Dèbata, janah Dèbata setia ngo Ia. Ipesaut JAHOWA ngo padanNa janah hot ngo ngkelleng atèNa simenettap i soh meribu cundut bai kalak simengkekelengiSa dekket simenguèi pati-patiinNa.

¹⁰Tapi oda meralang-alang atèNa menghukum kalak i simerceggo atè tabaSa.

¹¹Asa, uèi mo karina patiin sikuberèken bai ndènè i ari sidari èn.”

¹²“Mula iperatè-atèken kènè ngo pati-patiin idi, janah iulaken kènè mertuhu-tuhu, JAHOWA Dèbata ndènè pè setia mo Ia meradepken perpadanen sienggo ibahanken dekket kènè. Dak ipacidah ngo masèh atèNa simenettap i bai ndènè bagè sienggo iperbagah bai empung ndènè.

¹³Ikekelengi janah ipasu-pasu mo kènè, gabè meppar mo kènè janah mertambah-tambah bilangen ndènè. Ipasu-pasu mo juma ndènè, gabè menghasilken pagè, anggur dekket minak zaitun. Ipasu-pasu mo kènè gabè mèduk kalohon mo lembu dekket kambing ndènè. Karina pasu-pasu idi jaloen ndènè mo i nagerri siniberèken JAHOWA bai ndènè rembang mi padanNa bai empung ndènè.

¹⁴Ibas karina bangsa sinidunia èn, sada poda lot i menjalo pasu-pasu bagi mertinèncukna bagè kènè. Karina kènè, bang pinakan ndènè pè sada poda i nggempus.

¹⁵Ikelini JAHOWA ngo kènè ibas karina sakit nai janah ipedaoh ibas karina bègu laus nai bagè siniidah ndènè i Mesir, tapi isempaken mo olpek idi taba musuh-musuh ndènè.

¹⁶Karina bangsa sinipesakat JAHOWA mi bagasen kuasa ndènè kennah ripasken kènè, ulang kènè mermasèh atè taba kalak i. Ulang sembah dèbata kalak i, kumerna merembahken olpek ngo ulah-ulah sibagidi taba kènè.

¹⁷Tah bakunè dok atè ndènè buèen ngo bilangen bangsa-bangsa idi, gabè oda ndorok terpelaus kènè kalak i.

¹⁸Tapi ulang kènè mbiar midah kalak i; èngèt mo bakunè pemaing JAHOWA Dèbata ndènè taba raja Mesir bak karina ginemgemna.

¹⁹Engèt kènè mo bakunè olpek mahantu sinisaksiken ndènè sendiri, kelengangen-kelengangen, dekket kegegohen mbellen sinibakinken JAHOWA Dèbata ndènè lako paluahken kènè. Bagi ma ngo bakinen JAHOWA Dèbata ndènè taba karina bangsa sinikebiaren ndènè.

²⁰Baliksa pemasaen JAHOWA Dèbata ndènè mo kegontaren i tengah-tengah kalak i, gabè binasa ngo jelma sindorok mperrus bak ciboni.

²¹Jadi ulang kènè buradan midah bangsa-bangsa idi. JAHOWA Dèbata ndènè ngo menjamoti kènè. Dèbata meheji ngo Ia janah mahantu.

²²Ipelaus ngo bangsa-bangsa i dèba-dèba i hadeppen ndènè nai. Ulang mènter sintempu ripasken kènè kalak i, asa ulang makin mi tambahna buè binatang penjerngem gabè kememago bai ndènè.

²³Bagidi mo cara JAHOWA Dèbata ndènè lako pesakatken musuh-musuh ndènè bai ndè. Ipesompar-baèrken mo kalak i soh tumpat karina.

²⁴Isohken mo raja-raja kalak i bai ndènè. Ibunuh kènè mo kalak idi janah gabè ilupaken mo gerar kalak i. Sada kalak poda tahan mengalo kènè; tumpat mo kalak i karina ibakin kènè.

²⁵Lekkup kènè mo gana-gana sembahen sinisembah kalak i. Ulang mbara mata ndènè mengidah pirak barang emmas silekket i gana-gana i janah ulang buat lako bai ndènè. Mula ilausi kènè perèntah idi matè mo kènè, kumerna ikecegoken JAHOWA Dèbata ndènè ngo menembah gana-gana.

²⁶Singkabuah pè ulang baing ibagesmu gana-gana, asa ulang sempa taba kènè nola sumpah aturen bana. Kennah ceggo atè ndènè midah sibagidi, janah merlèa i penengennen ndènè kumerna isumpahi JAHOWA.”