Read Batak Dairi 5 Musa 9 Bible Online

5 Musa 9 - Batak Dairi bible

5 Musa 9

¹“Dengkohken kènè mo alè kaka anggi! Sidari èn mo kènè menurèpari Laè Jordan lako mengiani ladang bangsa-bangsa belennen janah gegohen daripada kènè. Mbelgah-mbelgah ngo kuta kalak i janah pagarna pè ndates kalohon songket mi la- ngit.

²Kalakna pè mbelgah-mbelgah janah mergegoh perdagingna; bagè ntuara ngo kalak i, janah enggo idengkoh kènè, isè poda pang mengalo kalak i.

³Tapi bagèndari idahen ndènè sendiri mo barang bakunè cara JAHOWA Dèbata ndènè merdalan i lebbè ndènè codi bagè api mengelekkup. Italuken mo kalak idi ipetengen-tengen kènè, gabè ibagasen sinempas ndorok mo ipepuar janah iripasken kènè kalak i bagè sinijandiken JAHOWA.

⁴Enggo kessa ipelaus JAHOWA Dèbata ndènè kalak i lako bai ndènè, ulang mo dok atè ndènè iuluken kènè mi sidi lako mersidasaken tanoh i kumarna burju ndènè dekket iulaken kènè sinikelemoken JAHOWA Dèbata ndènè gabè patutna menjalo tanoh i. Mada! Ipelaus JAHOWA pè bangsa i lako bai ndènè kumerna jahat kalak i ngo. Ibelli JAHOWA pè kènè menaban tanoh kalak i, kumerna naing ipesaut ngo jandiNa taba empung ndè si Abraham, si Isak dekket si Jakob.

⁶Tok mo kènè iberèken JAHOWA Dèbata ndènè pè tanoh merandal i bai ndènè oda ngo kumernaken enggo patut kènè menjalosa. Oda! Ai bangsa perukur mpihir ngo kè.

⁷Èngèt kè mo barang bakunè pemakin ndènè gabè melaga JAHOWA Dèbata ndè i gurun pasir. Kessa nai itadingken kènè Mesir soh mi sèn kènè, dak ialo kènè ngo JAHOWA.

⁸Baliksa i Delleng Sinai ibakin kènè ngo sanga punguren JAHOWA, gabè sanga naing iripasken kènè.

⁹Laus mo aku mengenangkengi delleng i lako menjalo batu perpadanen sinibahan JAHOWA dekket kènè. Empatpuluh ari empatpuluh berngin mo dekkahna aku merian i babo ndelleng i oda mangan oda mènum.

¹⁰Nai iberèken JAHOWA mo baku batu sidua i sienggo isurati Dèbata sendiri. Tersurat ngo ibas batu idi karina kata siniruapkenNa i tengah-tengah api i nai bai ndènè, sidangna mertumpu kènè i pispis delleng i.

¹¹Uè, nai enggo kessa leppas empatpuluh ari empatpuluh berngin, iberèken JAHOWA mo baku duana batu perpadanen idi.

¹²Nai nina JAHOWA mo mbang aku, ‘Kettu mo susur, kumerna enggo jahat ulah-ulah bangsamu siniulukenmu mbungkas i Mesir idi nai. Enggo menurimpang kalak idi i pati-patiinKu nai, janah enggo iteppa gana-gana mahan sembahenna.’

¹³Idokken JAHOWA dèng ma taba aku, ‘Kubettoh ngo mpihir kalohon ukur bangsa idi.

¹⁴Ulang cuba lako menghalangi Aku. Naing Kuripasken ngo kalak i, asa ulang nè pella èngètèngèten kalak i. Tapi ukum kono Kubaing mo gabè bapa sada bangsa terbelennen janah mergegohen daripada kalak i.’

¹⁵Nai kumessing mo aku lako balik, janah ninganna merembah dua batu perpadanen idi ipas duana tanganku, susur mo aku i delleng simergollah-gollah i nai.

¹⁶Kuidah mo enggo keppèken ilausi kènè perèntah JAHOWA Dèbata ndènè i. Enggo merdosa kènè meradepken JAHOWA kumerna iteppa kènè bai ndènè sada gana-gana lembu ipas emmas nai.

¹⁷Nai kutembemken mo duana batu perpadanen idi ipetengen-tengen kènè sanga mereppuk bagè empak-empak.

¹⁸Nai mersembah merkuraja nola mo aku sikali nai i hadeppen JAHOWA i pucuk delleng i empatpuluh ari dekket empatpuluh berngin dekkahNa, oda mangan oda mènum. Kubahanken idi kumerna enggo merdosa kènè meradepken JAHOWA merkitè iulaken kènè jahat mengèkutken pertimbangenNa, maing gabè melaga Ia.

¹⁹Mbiar ngo aku mengidah pungur JAHOWA meradepken kènè, ai naing gabè iripasken ngo kènè, tapi tupungna èn pè tong ngo idengkohken JAHOWA aku.

²⁰Melaga kalohon ma ngo JAHOWA bai si Aron sanga naing ibunuh Ia, nai kusodipken ma mo ia.

²¹Gana-ganaen lembu emmas siniteppa ndènè kubentirken mi bagasen api. Nai kulala mo janah kugiling melèmet bagè cirabun, janah kucircirken mo cirabunna i mi anak laè simarir ibas delleng idi nai.

²²Bagi ma i Tabera, i Masa dekket i Kibrot- Taawa, melaga ngo JAHOWA ibakin kènè.

²³Nai sinderrang idokken JAHOWA kènè menadingken Kades-Barnea lako menessak dekket mengkubu tanoh sinaing berènkenNa bai ndènè ialo kènè ngo perèntah JAHOWA Dèbata ndènè; oda ngo uè kènè tok bak merpenguèi tabasa.

²⁴Kessa nai kutandai kènè, dak-dak ialo kènè ngo JAHOWA.

²⁵Kubettoh ngo itaki JAHOWA ngo naing mengeripasken kènè. Nai mersembah merkuraja mo aku sidekkah empatpuluh ari empatpuluh berngin i hadeppen JAHOWA janah mersodip bagèen:

²⁶Ialè JAHOWA Sintèmbul kalohon, ulang mo ripasken bangsaMu ènda, bangsa sinipaluahMu dekket sinibabaenMu mbungkas i Mesir nai, merkitè kegegohen dekket kuasaMu simbelgah i.

²⁷Èngèt mo naposoMu si Abraham, si Isak dekket Jakob, janah ulang lugun bakko ukur mpihir, kejahaten dekket dosa bangsa èn.

²⁸Mula tong ngo ripasenkenMu bangsaMu i, nai dokenken kalak Mesir nola ma mo oda tellap Ko merembah bangsaMu mi nagerri sinijandikenMu bai kalak i, janah ibabai Ko pè kalak i mi gurun pasir lako memunuh kalak i ngo, kumerna nggogo atèMu midah kalak i.

²⁹Tapi èngèt mo alè JAHOWA, sinipilihMu ngo bangsa èn gabè bangsaMu, janah ibabai Kono i Mesir nai merkitè kegegohen dekket kuasaMu mbelgah idi.”