Read Batak Dairi Johanes 1 Bible Online

Johanes 1 - Batak Dairi bible

Johanes 1

¹I mulana, sinderrang madèng ihanaken dunia èn, enggo kin ngo lot kata i. Rebbak dekket Dèbata ngo kata i, janah Dèbata ngo kata idi.

²I mulana nai ngo Ia rebbak dekket Dèbata.

³Merkitè kata i ngo ihanaken Dèbata sagumanna silot. Oda lot barang kadè pè hana, ukum mak merkitè-kitè Ia.

⁴Kata i ngo memmerrèken kenggelluhen, janah kenggelluhen i ngo merrèken sendang taba jelma.

⁵Merbinendang ngo cuhaya i mi bagasen sigellap, janah oda terènteppen sigellap i cuhaya i.

⁶Ipasulak Dèbata ngo utusenna magahken terrèngèt cuhaya i taba jelma. Si Johanes ngo gerar utusen i.

⁷Roh ngo ia memmagahken sukuten i mendahi karina jelma, asa percaya kalak i taba cuhaya i.

⁸Oda ngo ia dèng penendang i; ai roh pè ia pellin lako memmagahken terrèngèt penendang idi ngo.

⁹Penendang i ngo cuhaya situhunna, cuhaya siroh mi dunia èn lako menerrangi karina jelma.

¹⁰Enggo i dunia èn kata idi. Tukasi pè merkitè kata idi ngo itempa Dèbata dunia ènda, tapi oda itandai dunia èn ia.

¹¹Roh ngo ia mi nagerriNa sendiri, tapi oda ijalo bangsaNa i Ia.

¹²Tapi lot ma ngo barang piga-piga kalak menjaloSa, janah percaya baNa. Bai kalak idi mo iberrèken kuasa asa gabè dukak-dukak Dèbata,

¹³sinitubuhken oda bai jelma nai, kerna nggelluh rimbaru idi bai Dèbata nai ngo rohna.

¹⁴Enggo gabè jelma kata idi janah merrian i tengah-tengahta. Enggo siidah kesangapenNa imo kesangapen nijaloNa bagè Anak sada-sada ni Dèbata. Ai merkitè Ia ngo ipeterar Dèbata dirina dekket ngkelleng atèNa banta.

¹⁵Si Johanes ngo mengindangkenSa, ai nina ngo, “Èn mo kalakna sikudokken i roh i podingku nai; tapi belgahen ngo Ia asa aku, ai enggo kin ngo lot Ia sinderrang madèng tubuh aku.”

¹⁶Ngkelleng kalohoon ngo atèna banta, jadi dakdak ipasu-pasu ngo kita.

¹⁷Merkitè si Musa ngo iberrèken Dèbata pati-patiin banta, tapi merkitè Jesus Kristus, ipetarar Dèbata ngo dirina dekket kelleng atèna banta.

¹⁸Isè poda nung mengidah Dèbata, laènken anakNa sada-sada i sidos dekket Dèbata, sirebbak dekket Bapa i, Ia ngo petararken Dèbata Bapa banta.

¹⁹Ipasulak pengulu-pengulu Jahudi mo imam-imam dekket dèba marga Lewi i Jerusalem nai, mendahi si Johanes janah mengkusoken tabasa, “isè ngo ko situhunna?”

²⁰Oda ngo irusiaken si Johanes, ntompel ngo idokken, “Oda ngo Aku Raja Sipaluah niperbagah-bagah Dèbata.”

²¹“Mula bagidi, isè ngo kono?” nina kalak idi mengkusoi. “Mada ngo kono si Elias?” “Oda,” nina si Johanes. “Mada ngo kono Nabi idi?” nina kalak i dèng ma. “Oda,” nina mengaloi.

²²“Mula bagidi, bagahken mo bai na- mi, isè ngo kono,” nina kalak idi, “Asa ku- bettoh kami magahken taba sipasulakken kami. Bakunè pendokkenmu terrèngèt di- rimu?”

²³“Ukum aku,” nina si Johanes, “Imo bagè nidokken Nabi Jesaya, ‘Sora sitenggo-tenggo i kellongoon. Peddèas kènè mo dalan bai Tuhan i!’ ”

²⁴Ukum kalak simengkusoi idi imo sinipasulak kalak Parisè.

²⁵Nai nina kalak idi mo taba si Johanes, “Mula oda ngo kono Raja Sipaluah niperbagah-bagah Dèbata, oda si Elias, oda ma Nabi idi kasa perridiken jelma kono?”

²⁶Ialoi si Johanes mo, “Laè ngo kuperridiken bai jelma i. Tapi enggo i tengah-tengah ndènè sada kalak siso nitandaan ndènè.

²⁷Roh ngo Ia janah enggo i podingku, tapi mengosari èkèt cipatuNa pè oda sanggup dèng aku.”

²⁸I Betania ngo masa i karina, kan kebincaren Laè Jordan bekkas si Johanes perridiken jelma i.

²⁹Sibarembenkenna, idah si Johanes mo roh Jesus mendahisa. Idokken si Johanes mo, “Tengen kènè mo! Adoi mo biri-biri Dèbata mahan pèlèenken i, asa sasa dosa dunia èn!

³⁰Ia ngo sikudokken i siroh i podingku nai, tapi belgahen ngo Ia asa aku; ai enggo kin ngono lot Ia, madèng kin pè tubuh aku.

³¹Oda ngo kutandai dèng kin Ia, tapi roh aku perridiken bangsa Israel merkitè laè asa itandai kalak i Ia.”

³²Bagèen ngo pengindangken si Johanes terrèngèt Ia, “Kuidah ngo Tendi Dèbata susur i langit nai bagè ndarapati, senggep janah merrian baNa.

³³Sinderrangna i oda kutandai dèng kin Ia; tapi Dèbata sipasulakken aku perridiken merkitè laè, mendokken bangku: ‘Barang mendahi isè idah kono susur tendi Dèbata janah merrian bana, Ia mo roh perridiken jelma merkitè Tendi Dèbata!’

³⁴Tuhu-tuhu ngo enggo kuidah idi,” nina si Johanes, “Asa, tuhu ngo Ia Anak Dèbata; percaya mo kènè!”

³⁵Sibarembenkenna nola, cènder nola ma mo i bekkas idi si Johanes dekket dua kalak sisinna.

³⁶Idah kessa mo Jesus memellus arap idi, nina mo, “Tengen kènè mo! Adoi mo biri-biri Dèbata!”

³⁷Idengkoh sisiin si Johanes sidua kalak idi ngo nidokkenna i, nai mèter ièkutken kalak idi mo Jesus.

³⁸Tumulih mo Jesus mi podi, nai idah mo kalak i mengèkutkenSa, gabè idokken Jesus mo, “Isè ngo nitulusen ndènè?” Ialoi kalak idi mo, “Rabi, i dikè ngo kono merian?” (Rabi lapatenna ‘Guru’).

³⁹“Roh mo kènè, asa idah kènè,” nina Jesus. Nai ièkutken kalak idi mo Jesus, rebbak mo kalak i sidarinkenna i. Kira-kira pukkul empat ciboon mo i.

⁴⁰Sada ibas kalak idi sidua i nai sienggo mendengkoh kadè sinidokken si Johanes janah laus nola mengèkutken Jesus, imo si Andreas, anggi si Simon Petrus.

⁴¹Nai ndor mo itulusi si Andreas si Simon kakana i, nina mo mbangsa, “Enggo jumpa kami Mesias i, Raja Sipaluah niperbagah-bagah Dèbata!” (Mesias lapatenna Kristus kata Junani.)

⁴²Nai ibabai si Andreas mo si Simon mendahi Jesus. Idah Jesus kessa mo si Simon, nina mo, “Si Simon ngo kono, anak si Jona. Si Kepas mo kono mi podinkenna èn.” (Kepas kata Heber dos ngo i dekket Petrus kata Junani, lapatenna delleng batu).

⁴³Sibarembenkenna, ipetettap Jesus mo ukurna lako laus mi Galilea. Nai pesimbak mo ia dekket si Pilipus, idokken mo mbangsa, “Èkutken mo Aku!”

⁴⁴Si Pilipus asalna i Betsaida nai, imo bekkas si Andreas dekket si Petrus.

⁴⁵Nai pesimbak nola mo si Pilipus dekket si Natanael, idokken mo mbangsa, “Enggo pesimbak kami dekket kalakna sinidokken si Musa ibas Bukku patinna dekket sinidokken nabi-nabi. Imo Jesus anak si Josep kalak Nazaret.”

⁴⁶Tapi ialoi si Natanael mo, “Mèter lot mo harapen roh simendè i Nazaret nai?” “Ita mo asa idah kono!” nina si Pilipus mengaloi.

⁴⁷Idah Jesus kessa mo roh si Natanael mendahisa, idokken Jesus mo terrèngètsa, “Èn mo sada kalak Israel bennar, oda lot sipakulah-kulah bana!”

⁴⁸Nai idokken si Natanael mo taba Jesus, “Bakunè carana pemmettohmu terrèngèt aku?” Ialoi Jesus mo, “Kuidah ngo kono i terruh kayuara i, sinderrang madèng idiloi si Pilipus idi kono.”

⁴⁹“Guru,” nina si Natanael. “Anak Dèbata ngo kono, Raja kalak Israel!”

⁵⁰Nai nina Jesus mo, “Mada ngo kumarna Kudokken i kuidah kono i terruh kayu ara i, memmaing asa gabè percaya kono? Idahenmu mo belgahen dèng daripada i!”

⁵¹Idokken Jesus dèng ma, “Kudokken mo bai ndènè; idahèn ndènè mo mbuka langit, janah merlaus roh malaèkat Dèbata menda- hi Anak Jelma.”