Read Batak Dairi Johanes 10 Bible Online

Johanes 10 - Batak Dairi bible

Johanes 10

¹Situhunna ngo sikudokken èn bai ndè, “Barang isè masuk mi kandang biri-biri oda arap pèntu, tapi menangkih arap pagar pennangko ngo i janah pendaus.

²Tapi kalak simasuk arap pèntu, i ngo permakan biri-biri i.

³Mula roh ia, mèter ibuka perjaga i ngo pèntu bana janah iuèi biri-biri i ngo ranana, gennep idiloi gerar biri-biri i; janah iuluken mo biri-biri i mi ruar.

⁴Enggo kessa ruar karinana biri-birina i, mèter kan lebbè ngo ia merdalan, nai dak ièkut-èkut biri-birina i ngo ia, kerna itandai ngo sorana.

⁵Oda uè biri-birina i mengèkutken sidèban; merberrus ngo tupèh biri-biri i bai sidèban idi nai, kumarna oda itandai sorana.”

⁶Oda iarti simendengkoh idi codiin nibaing Jesus i.

⁷Nai nina Jesus nola mo, “Situhunna ngo sikudokken èn: Aku ngo pèntu biri-biri i.

⁸Karina kalak siroh i lebbènKu, pennangko ngo i janah pendaus, janah oda idengkohken biri-biri i sora kalak i.

⁹Aku ngo pèntu i. Barang isè mbengket arap Aku, njuah-njuah ngo ia; karuar masuk mo ia janah terrolih pangaan.

¹⁰Ukum pennangko, roh ngo ia pellin lako mennangko sambing, memmunuh bak mencèdaken. Tapi ukum Aku roh, lako merrèken kenggelluhen mertinèncuk ngo taba kalak simendengkohken sorangku.

¹¹Aku ngo permakan burju. Iberrèken permakan burju i ngo kessahna mengkepkep biri-birina.

¹²Tapi ukum permakan sinigaji siso sidasa biri-biri i, mula idah roh sorigala, mperrus mo ia mennadingken biri-biri i. Gabè ijerngemmi sorigala idi mo biri-biri i janah ipersuragè.

¹³Mperrus mo ia, kumarna pellin mengharapken gaji idi sambing ngo kessa memmaing asa karèjo ia, ukum biri-biri idi, oda iparduliken.

¹⁴Aku ngo permakan burju. Tosè bagè Bapa menandai Aku, janah Aku menandai Bapa,

¹⁵bagidi ngo Aku menandai biri-biringKu, janah itandai biri-biringKu i ngo Aku. Kuberrèken ngo kessahKu mengkepkep biri-biringku.

¹⁶Lot dèng ngo biri-biringKu sidèban siso i kandang èn nai; biri-biringKu i pè kuuluken ma ngo, janah idengkohken ngo sorangKu. Gabè sada pulungen mo karinana kalak i, janah gabè sada ngo mermakan kalak idi.

¹⁷Ikekelengi Bapa ngo Aku, kumarna Kuberrèken kessahKu, asa kujalo nola i mengolihi.

¹⁸Isè poda ndorok mengerampasi kessahKu, bangku nai. Tapi merkitè selloh ukurku ngo kuberrèken kessahku i. Merkuasa ngo aku merrèken, janah merkuasa ma ngo Aku menjalosa mengolihi. Idi mo ulaan sikujalo bai Bapa nai.”

¹⁹Merkitè kata nidokken Jesus i, gabè petongkah sora ma mo kalak Jahudi.

²⁰Mèduk ngo kalak i mendokken, “Isellapi sètan ngo Ia. Gila ngo Ia. Man kadè pedengkoh-dengkohen ndènè i?”

²¹Dèba mendokken, “Oda ngo rana nisellapen sètan bagidi. I dikè mo ndorok ibuka sètan mata kalak sipètung gabè merpendidah?”

²²Nai dapet mo tikkina Pèsta memengket Bages Dèbata i Jerusalem. Enggo mosim mbergoh tikanna idi.

²³Merdalan-dalan mo Jesus i emper si Salomo, i Bages Dèbata.

²⁴Nai roh mo kalak Jahudi mencingkoisa ninganna mendokken taba Jesus, “Sadikè dekkah nai dak ibelli Kono kami ragu? Ntangkas mo bagahken bai nami, mula Kono ngo tuhu Raja Sipaluah niperbagah-bagah Dèbata!”

²⁵Ialoi Jesus mo, “Enggo ngo Kubagahken taba kènè tapi oda percaya kènè. Karina ulaan sikuula merkitè-kitè gerar BapangKu idi ngo memmagahken terrèngèt Aku.

²⁶Tapi oda percaya kènè, kerna oda biri-biringKu kènè.

²⁷Idengkohken biri-biringKu ngo sorangKu. Kutandai ngo kalak i, janah ièkutken kalak i ngo Aku.

²⁸Kuberrèken ngo kenggelluhen soh mi amman sumendah bai kalak i. Oda mo binasa kalak i soh mi amman sumendah. Isè poda terbakinsa mengerampasi kalak idi i tanganKu nai.

²⁹Ai belgahen ngo BapangKu simemerrèken kalak i bangKu, daripada sidèban, barang isè pè i. Asa isè poda ndorok mengerampasi kalak idi ibas gemgemmen Bapa nai.

³⁰Ai sada ngo Aku dekket Bapa i.”

³¹Nai mèter ibuat kalak Jahudi mo batu naing mementiri Jesus.

³²Tapi nina Jesus mo taba kalak idi, “Idah kènè ngo Kuulaken bagidi buèna ulaan simerandal sinidokken BapangKu mahan ulankenKu; ibas karinana ulaan singgo kuulaken idi, ulaan paina memmaingken asa naing ibentiri kènè Aku?”

³³Nai ialoi kalak i mo, “Oda ngo kemulihken ulaan mendè i asa naing kubentiri kami Kono, tapi kumarna ilèai Kono ngo Dèbata. Jelma ngo kono, tapi ipessobok kono nola diriMu bai Dèbata!”

³⁴Gabè ialoi Jesus mo kalak i, “Otang tersurat ngo ibas Bukku pati-patiin ndènè; bagèen ngo idokken Dèbata, ‘Dèbata ngo kènè’?

³⁵Karinana ngo kita mengaku; karinana sitersurat ibas Bibèl, oda ndorok mondar i. Asa mula taba kalak simenjalo kata Dèbata, idokken Dèbata, kalak idi dèbata,

³⁶kasa idokken kènè Aku mengelèai Dèbata? Padahal ipilih Bapa i ngo Aku janah iutus mi dunia èn.

³⁷Mula oda Kuulaken ulaan Bapa, ulang kènè percaya taba Aku.

³⁸Tapi kerna Kuulaken ngo ulaan Bapa, tukasi pè nemmu oda tok kènè bangku, merkitè-kitè ulaan siKuulaken idi mo nemmu giamken kènè kennah percaya, asa ibettoh kènè, ibagasen Bapa i ngo Aku, janah ibagasen Aku ngo Bapa idi.”

³⁹Jadi naing mo itangkup kalak i Jesus, tapi maluah ngo ia i tangan kalak idi nai.

⁴⁰Balik mo Jesus mi Kepar Laè Jordan, mi bekkas si Johanes tikala iperidiken jelma nterrem, janah merrian i sidi mo ia.

⁴¹Mèduk ngo kalak merrohen mendahisa janah mendokken, “Ukum si Johanes, oda lot memaing tanda kelengangen tapi tuhu ngo karina nidokken si Johanes tersèngèt kalak ènda.”

⁴²Mèduk ngo kalak gabè percaya taba Jesus i sidi.