Read Batak Dairi Johanes 11 Bible Online

Johanes 11 - Batak Dairi bible

Johanes 11

¹Lot mo sada kalak simersakit mergerar si Lazarus. I Betania ngo kutana rebbak dekket si Maria bak si Marta turangna i.

²Si Maria imo simeminaki nèhè Jesus merkitè minak mur, janah mengelapui merkitè bukna.

³Duana ngo kalak simerkaka-kuanggi i magahken berrita mersakit turangna i bai Jesus, “Tuhan, mer- sakit ngo supan-supanmu nikekellengen atèmu i.”

⁴Idengkoh Jesus kessa mo berrita i, nina mo, “Oda ngo kemmatèen ujung sakitna i, tapi asa mersangap ngo gerar Dèbata, janah kumernaken i mo asa mersangap Anak Dèbata.”

⁵Ngkelleng ngo atè Jesus midah si Marta bak taba anggina si Maria bang taba si Lazarus pè.

⁶Tapi enggo pè ibettoh Jesus mersakit si Lazarus i, ndong dèng ngo ngo Ia i bekkasna i dua ari nai.

⁷Enggo kessa i, nina Jesus mo taba sisinNa, “Ita kènè mo balik mi Juda.”

⁸Nai nina sisinna i mo mengaloi, “Rabi, rembaru dèng naing ibentiri kalak Jahudi kono dekket batu, keppèken naing iolihi Kono dèng ma mi sidi?”

⁹“Otang sipuluh dua jom ngo sidari?” nina Jesus. “Oda nggèut terdengdeng kalak simerdalan mahar, kerna idah ngo penendang dunia èn.

¹⁰Tapi barang isè merdalan tikan gellap, terdengdeng ngo ia, ai oda lot penendang bana.”

¹¹I mo idokken Jesus. Nai nina nola dèng ma mo, “Enggo meddem supan-supanta si Lazarus, laus mo Aku mendungoisa.”

¹²Nai nina sisinna i mo, “Tuhan, mula terpeddem ngo si Lazarus i, lako njuah mo i.”

¹³Keppè ukum maksud Jesus, enggo ngo matè si Lazarus. Tapi ukum dok atè kalak idi terpeddem sambing ngo.

¹⁴Kerna naidi ntangkas mo ibagahken Jesus, “Enggo matè si Lazarus.

¹⁵Tapi tuahna mo oda i sidi Aku tikanna idi kerna sellohen ngo bagidi, asa percaya kènè. Kita kènè mo laus mendahisa bagèndari.”

¹⁶Nai nina si Tomas nidokkenna ma Didimus (leppa) mo taba sisiin, “Laus ma mo kita, asa rebbak matè kita dekketSa!”

¹⁷Tikan soh Jesus mi sidi, enggo mo empat ari dekkahna si Lazarus idi itanem.

¹⁸Daoh Betania i Jerusalem nai kira-kira tellu batu (dua pal).

¹⁹Toko ngo mèdukna roh kalak i Jerusalem nai lako mengapoi si Maria dekket si Marta, kemulihken permatè turangna si Lazarus i.

²⁰Ibettoh si Marta kessa mo enggo roh Jesus, mèter karuar mo ia menimbaki Jesus. Tapi ukum si Maria tading ngo i bages.

²¹Nina si Marta mo taba Jesus, “Tuhan ukum isèn kin kono, oda matè turangki.

²²Tapi tukasi pè bagidi kubettoh ngo, bagèndari pè iberrèken Dèbata ngo bamu barang kadè sambing pè ipido kono.”

²³“Nggelluh ngo mengolihi turangmu i,” nina Jesus taba si Marta.

²⁴Ialoi si Marta mo, “Kubettoh ngo balik nggelluh si Lazarus i segen, tikan karinana kalak simatè ipegelluh tupung Ari Kiamat.”

²⁵“Aku ngo memerrèken kenggelluhen dekket pekèkèken kalak simatè; barang isè percaya taba Aku, nggelluh ngo ia tukasi pè enggo matè,” nina Jesus taba si Marta.

²⁶“Kalak singgelluh janah percaya taba Aku, oda ngo matè ia soh mi amman-sumendah. Percaya ngo kono isi?”

²⁷“Uè Tuhan, percaya ngo aku. Kono ngo Mesias, Anak Dèbata, Raja Sipaluah roh mi dunia èn.”

²⁸Enggo kessa idokken si Marta ranana idi, laus mo ia mengaleng si Maria anggina i, ikosikken mo mbangsa, “Enggo roh Guru i, Ikusoken ngo tersèngèt kono.”

²⁹Mendengkoh i, mèter cènder mo si Maria, sagal-sugul mo ia mendahi Jesus.

³⁰Oda dèng ngo soh tikanna i Jesus mi rumah. Tong dèng ngo Ia i bekkas simbak dekket si Marta i.

³¹Idah kalak Jahudi siroh mengapoi silot i bages i mo kèkè si Maria janah rada-rudu mi ruar; gabè ièkutken kalak i mo ia, ai idok kalak i laus mi kuburen ia lako tangis.

³²Soh kessa si Maria janah idah kessa Jesus ninganna idokken, “Tuhan, ukum isèn kin Kono, oda ngo matè turangki!”

³³Idah Jesus kessa mo tangis si Maria bak kalak Jahudi siroh rebbak dekket si Maria i, mellui kalohon mo atè Jesus.

³⁴Ikusoi Jesus mo kalak i, “Idikè ngo ia ikuburken kènè?” Nai nina kalak i mo, “Roh mo kono me- ngidah, Tuhan!”

³⁵Nai tangis mo Jesus.

³⁶Gabè nina kalak Jahudi mo, “Tengen mo ngkelleng atèna taba si Lazarus i!”

³⁷Tapi lot ma ngo dèba mendokken, “Kalak sipètung gabè merpendidah ngo ibaing, oda ngo ndia tersondatsa, asa ulang matè si Lazarus i?”

³⁸Ibagasen bonek kalohoon, idahi Jesus mo kuburen i. Bagè liang ngo kuburen i, itutup dekket batu mbellen kalohoon.

³⁹“Pesisi kènè mo batu i,” nina Jesus. Tapi ialoi si Marta mo, “Tuhan, enggo empat ari ia itanem, tentu enggo mbau i!”

⁴⁰Idokken Jesus mo taba si Marta, “Otang enggo Kudokken bamu: Mula percaya kono, idah kono ngo kemmuliaan Dèbata!”

⁴¹Nai ipesisi kalak i mo batu tutupna i. Itarè Jesus mo mi langit ninganna idokken, “Ialè Pa, kudokken mellias atè bamu, kerna idengkohken Ko pengidonKu.

⁴²Kubettoh ngo dak idengkohken Kono ngo pengidonKu, tapi Kudokken i, kumarna jelma nterrem silot i sèn ngo; asa percaya kalak idi, Kono ngo pasulakken Aku.”

⁴³Enggo kessa i idokken Jesus bagidi, nggang mo idiloken, “O Lazarus, karuar mo kono!”

⁴⁴Nai mèter karuar mo tuhu si Lazarus sienggo matè i kin. Merbalut dèng ngo tangan bak nèhèna dekket kaèn kapan, janah abèna pè mertutup dèng ma ngo tong. “Osari kènè mo kaèn kapanna i,” nina Jesus taba jelma nisidi, “asa merdalan ia.”

⁴⁵Mèduk ngo kalak Jahudi siroh mengapoi si Maria i gabè percaya taba Jesus, enggo kessa idah kalak i simasa i.

⁴⁶Tapi lot ma ngo dèba bai kalak i nai mendahi Parisè lako magahken sinibaing Jesus i.

⁴⁷Kumarna naidi, runggu mo kalak Parisè dekket imam-imam ekuten bagidi ma pè dekket runggu mbellen, nina mo, “Bakunè mo sibakin? Ai toko ngo buèna tanda kelle- ngangen ibaing kalak èn!

⁴⁸Mula siebelli bagidi, gabè percaya mo kalak karina baNa. Ujungna roh nola mo kalak Rom lako menaban Bages Dèbata dekket bangsanta pè!”

⁴⁹Nai mongkam mo sada kalak bai kalak i nai; imo si Kayafas, imam huntuun tahunna i, nina mo, “Kadè poda pana pemettoh ndènè.

⁵⁰Oda ngo satdar kènè, lotiin ngo matè sada kalak mengkepkep bangsanta, daripada karinana nola bangsanta tumpat?”

⁵¹Idokken si Kayafas pè bagidi, oda ngo ipas ukurna nai sendiri i. Tapi kumarna imam huntuun ngo ia, tahunna idi, merralaten ngo ia, kennah matè ngo Jesus mengkepkep bangsa Jahudi.

⁵²Oda pellin mengkepkep bangsa Jahudi sambing, tapi dekket ngo lako pepulungken bak peddemmuken dukak-dukak Dèbata simersèrak i.

⁵³Mulai i sidi nai mo mertaki pengulu-pengulu Jahudi lako memmunuh Jesus.

⁵⁴Kumarna naidi, oda nèngè uè Jesus ntarar merdalan i Juda. Itadingken mo Juda, gabè laus mo ia mi kuta Efraim, i gembar padang gurun. I sidi mo Ia merrian rebbak dekket sisinNa.

⁵⁵Enggo mo ndessing tikanna i Ari Raya Pèsta Paskah kalak Jahudi. Enggo mo nterrem kalak idi i suberri kuta nai laus mi Jerusalem, lako pepantingken dirina imo menguras, sinderrang makdèng dapet pèsta i.

⁵⁶Sinderrang ibagasen Bages Dèbata kalak i, itulusi kalak i ngo Jesus. Mersikusoon mo kalak i samahsa, “Bakunè ngo dok atèmu? Roh ma ngo ndia Ia mi pèsta èn?”

⁵⁷Ninganna bagidi enggo iperèntahken imam-imam ekuten dekket kalak Parisè mendokken; barang isè bettoh-bettohen idikè Jesus, kennah ibagahken, asa itangkup Ia.