Read Batak Dairi Johanes 12 Bible Online

Johanes 12 - Batak Dairi bible

Johanes 12

¹Ennem ari nai asa dapet Pèsta Paskah, laus mo Jesus mi Betania. I kuta i ngo merrian si Lazarus sienggo nung matè gabè ipegelluh Jesus nola.

²Ijamu kalak i mo Ia i sidi. Si Marta pè dekket ngo merkebbas. Rebbak kundul ngo si Lazarus dekket Jesus mangan.

³Nai roh mo si Maria merembah minak narwatsu kira-kira sitengah litèr. Maharga kalohoon ngo minak i, nai iarirken mo minak i mi nèhè Jesus. Nai ilapui mo nèhè Jesus dekket bukna. Gabè baungkus mo bages i kumarnaken minak i.

⁴Sada ipas sisiin i nai imo si Judas Iskariot simenelbuh Jesus mendokken —

⁵“Kasa oda idèa minak i merharga tellu ratus riar, asa iberrèken tokorna i mengurupi kalak sincor?”

⁶Idokken si Judas pè bagidi, oda ngo kalak sincor nisarihkenna, tapi kerna pennangko ngo ia. Nggati ngo ibuat kèpèng i bagut-bagut nijèmakna idi nai, ai ia ngo memennep bagut-bagut i.

⁷Tapi nina Jesus mo, “Belli mo ibaing bagidi, ai dosken solo-solo mi ari permatèngKu i ngo nibaingna i.

⁸Dakdak ngo lot sincor i tengah-tengah ndènè.”

⁹Nterrem ngo kalak Jahudi mendengkoh, i Betania ngo Jesus, gabè laus mo kalak idi mi sidi, oda pellin kumarna Jesus, tapi dekket ngo naing mengidah si Lazarus sienggo nipegelluh Jesus i simatè nai.

¹⁰Kumarnana idi ngo asa naing ibunuh imam-imam ekuten si Lazarus i;

¹¹ai kemulihkensa ngo, enggo mèduk kalak Jahudi percaya taba Jesus.

¹²Sibarembenkenna nola, idengkoh jelma nterrem sienggo soh mi Jerusalem lako merpèsta Paskah idi mo enggo i tengah ndalan Jesus lako mi Jerusalem.

¹³Nai ibuati kalak i mo ranting bak bulung kayu, nai laus mo kalak i mennimbak-nimbak Jesus ninganna mengoang-ngoangken: “Hosianna, Poji mo Dèbata! Nipasu-pasu mo Ia siroh merkitè-kitè gerar Tuhan i, Ipasu-pasu mo Raja kalak Israel!”

¹⁴Nderrangna idi, enggo mo dapet Jesus sada kalodè bajar dèng, janah enggo mo kundul ia i babo kalodè i. Nai dapet mo bagè sitersurat ibas Bibèl:

¹⁵“Ulang kono mbiar alè berru Sion! Tengen mo Rajami memmasang sada anak kalodè!”

¹⁶Sinderrangna idi oda iarti sisiin Jesus dèng karinana i. Tapi enggo kessa ipesa- ngap Jesus, merkitè kemmematèNa, gabè ièngèt kalak i mo kadè sinibaing ndèba ta- baSa enggo tersurat ibas Bibèl tersèngèt diriNa.

¹⁷Jelma silot rebbak dekket Jesus tikanna ipegelluh si Lazarus i simatè nai idi pè, dak ngo mennukutken pemmaing Jesus bai jelma nterrem i.

¹⁸Kumarnana idi ngo asa merlausen kalak idi mendahi Jesus, kemmulihken tanda kellengangen nihanaken Jesus i.

¹⁹Gabè nina Parisè mo samah-samahsa, “Oda lot nè kadè ndorok terbaing kita. Tengen mo, suberri dunia ngo mengèkutkensa!”

²⁰Kalak si roh merpèsta mi Jerusalem i, lot ngo dèba kalak Junani.

²¹Idahi kalak i mo si Pilipus, nina mo mbangsa, “Tuan sèkel ngo kami naing pejumpa dekket Jesus.” (Si Pilipus imo asalna i Betsaida sini Galilea nai.)

²²Nai idahi si Pilipus mo si Andreas, ibagahken mo i tabasa. Jadi rebbak laus mo kalak i sidua magahken i mendahi Jesus.

²³Nai nina Jesus mo taba kalak i, “Enggo dapet tikkina, Anak Jelma i ipesangap.

²⁴Èngèt kènè mo mendè: Oda ganda pagè i ukum mak itanem mi tanoh i janah matè. Tapi enggo kessa matè ia, gabè mbuè mo buahna.

²⁵Barang isè mengkellini kessahna, kemmagoon kessah mo ia. Tapi barang isè menelkangken kessahna i dunia èn, ia ngo sipegelluhkensa soh mi kenggelluhen siamman-sumendah.

²⁶Barang isè naing mengkebasi Aku, kennah ièkutken ngo Aku, asa rebbak ia dekket Aku, barang i dikè pè Aku. Ai kalak simengèkutken Aku, gabè mersangap ngo ia ibaing Bapa.”

²⁷“Mellui kalohoon ngo atèngKu, kadè mo ndia Kudokken? Kennah mo ndia Kudokken: Ialè Pa, ulang mo padiat Aku menggongken kinidersa ènda? Tapi tupèh kumarna lako menggongken kinidersa èn ngo Aku asa roh.

²⁸Ialè Pa, pessangap mo gerarMu!” Nai terdengkoh mo sora i sorga nai, “Enggo mo Kupesangap, janah pessangapenKu nola dèng ngo!”

²⁹Idengkoh jelma nterrem ni sidi ngo sora i, gabè nina kalak i mo, “Renggur ngo i.” Lot ma ngo dèba mendokken, “Ah,oda! Malaèkat ngo mengeranai dekketSa!”

³⁰Nai nina Jesus mo taba kalak idi, “Ukum sora siterdengkoh i, oda ngo lako bangKu i asa terdengkoh, tapi lako bai ndènè ngo.

³¹Enggo dapet tikkina ihukum dunia èn, janah bagèndari mo italuken perkuasa dunia èn.

³²Luas Enggo kessa ipedates Aku gabè kuabin mo karina jelma taba Aku.”

³³Idokken pè bagidi, magahken bakunè carana Ia ipersilangken.

³⁴Nai nina jelma nterrem i mo tabaSa, “Mengèkutken Bukku Pati-patiin nami, nggelluh ngo Raja Sipaluah siniperbagah-bagah i soh mi amman-sumendah. Kasa gabè idokken Kono, kennah ipedates ngo Anak Jelma idi i tanoh èn? Isè ngo Anak Jelma i?”

³⁵Ialoi Jesus mo, “Sigejap nai ngo i tengah-tengah ndènè penendang i, merdalan mo kènè sidekkah nterrang dèng, asa ulang isangkemmi sigellap i kènè. Ai barang isè merdalan tikan gellap, oda ibettoh barang dempak dikè temburenna.

³⁶Kepercayai kènè mo penendang i, asa gabè dukak-dukak kecihuren i kènè.” Enggo kessa idokken Jesus bagidi, laus mo Ia i sidi nai, janah oda uè ia ntarar terridah bai kalak i.

³⁷Tukasi pè enggo matcam bagèna tanda kellengangen ihanaken Jesus, ipetengen-tengen kalak idi, tapi laju ngo oda percaya kalak i bana.

³⁸Asa merkitè bagidi, saut mo nidokken Nabi Jesaya: “Ialè Tuhan, isè mo percaya mi sukuten nami? Taba isè ngo ipacidah kuasa Tuhan i?”

³⁹Kumarna naidi ngo asa oda terbaing kalak i percaya, ai nina si Jesaya dèng ma ngo:

⁴⁰“Enggo kupepètung mata kalak i, janah enggo kupepihir ukur kalak idi; asa ulang merpendidah mata kalak i, janah asa ulang merpengantusi pikiren kalak i; asa ulang balik kalak i mendahi Aku, nai Kupemmalum mo kalak idi.”

⁴¹Idokken si Jesaya pè bagidi terrèngèt Jesus, kumarna enggo idah kemmuliaan Jesus i.

⁴²Tapi tukasi pè bagidi, mèduk ngo pe- ngulu-pengulu kalak Jahudi percaya taba Jesus, tapi oda pang kalak i mengaku i sintarar, asa ulang iliplip kalak idi, ipas agama nai, ai mbiar ngo kalak i midah penguasa- penguasa kalak Jahudi.

⁴³Ai lotiin ngo kalak i ipoji jelma daripada terrolih pemmojiin bai Dèbata nai.

⁴⁴Nai ipegang Jesus mo sorana, “Barang isè percaya taba Aku, oda ngo pellin taba Aku ia percaya, tapi dekket ngo Ia percaya taba sipasulakken Aku.

⁴⁵Janah barang isè mengidah Aku, mengidah sipasulakken Aku ngo Ia.

⁴⁶Roh Aku mi dunia èn, tosè bagè penendang, asa karina sipercaya taba Aku ulang merrian ibagasen sigellap.

⁴⁷Barang isè mendengkohken peddahKu tapi oda iulaken — oda ngo Aku menghukumsa. Ai roh Aku oda ngo lako menghukum dunia èn, tapi lako paluahkensa ngo.

⁴⁸Ai barang isè menulak Aku janah oda menguèi katangKu, enggo lot simenghukumsa, imo kata sienggo Kuruapken i;

⁴⁹oda ngo ibas atè-atèngKu nai, tapi Bapa simengutus Aku ingo mendokken kadè sipatut dokkenkenKu.

⁵⁰Janah kenggelluhen ngo kataNa i. Asa, karinana siKuruapken i, tosè ngo i mi sinidokken Bapa mahan ruapenkenKu.”