Read Batak Dairi Johanes 13 Bible Online

Johanes 13 - Batak Dairi bible

Johanes 13

¹Sidari nai asa dung Ari Raya Paskah i, enggo ibettoh Jesus dapet mo tikkina, Itadingken mo dunia èn lako balik mendahi BapaNa. Enggo mo Ikekellengi karina sitersoh baNa i dunia èn, janah soh mi puncana dak ikekelengi ngo kalak idi.

²Tupung mo mangan Jesus bak sisinNa cibonna i. Ukum atè si Judas Iskariot, enggo mo ibengketti sibolis, janah enggo mo iniatken lako menelbuh Jesus.

³Ibettoh Jesus ngo nemmu enggo ipesakat Bapana tabaSa kuasa. Ibettoh ma ngo bai Dèbata nai ngo rohna Ia, janah kennah balik mi Dèbata.

⁴Kerna naidi cènder mo Ia, italkasi mo jubahNa, nai iabitken mo bèsahen mi abakNa.

⁵Nai iarirken mo laè mi sambung, Iborih mo nèhè sisinNa i, janah ilap dekket bèsahen niabitkenNa i.

⁶Soh kessa mo Ia taba si Simon Petrus, mèter idokken si Simon Petrus mo, “Tuhan, mèter patut mo kono memmorih nèhèngku?”

⁷Ialoi Jesus mo, “Ukum bagèndari oda ngo iantusi kono dèng siKubakin èn, luas pè asa iarti kono i.”

⁸“Ulang mo alè Tuhan,” nina si Petrus taba Jesus. “Barang bakunè pè, ulang mo gabè Tuhan i nola morih nèhèngku!” Tapi nina Jesus mo mbangsa, “Mula oda Kuborih nènèmu, oda lot perdemuunmu dekket Aku.”

⁹Ialoi si Simon Petrus mo, “Mula bagidi ngo Tuhan, ulang mo pellin nèhèngku sambing iborih kono, tapi dekket mo bak takalku!”

¹⁰“Ukum kalak sienggo merridi, enggo mo mpanting i karina. Oda perlu nèngè ia kennah iborih, pellin nèhèna nai ngo kessa perlu iborih asa mpanting. Enggo mo mpanting kènè, tapi oda ngo karinana kènè,” nina Jesus. (

¹¹Ai enggo ngo ibettoh Jesus isè naing menelbuhSa. Kerna naidi ngo asa idokken, “Enggo ngo mpanting kènè, tapi oda karinana.”)

¹²Enggo kessa pul iborih Jesus nèhè kalak idi, Ipakkè nola mo jubahNa kin, nai kundul mo ia. Nai idokken mo taba kalak I, “Iantusi kènè ngo kadè lapaten siKubaing ndai bai ndènè?

¹³Idokken kènè ngo Aku Guru janah Tuhan, tuhu ngo i; ai Guru janah Tuhan ngo Aku.

¹⁴Mula Aku ngo Tuhan janah Guru ndènè memmorih nèhè ndènè, kènèpè patut ngo mersiborihen nèhè.

¹⁵Kubaingken codiin idi bai ndènè, asa samah-samah kènè pè mencodi bagè sienggo Kubaingken i taba kènè.

¹⁶Èngèt kènè mo èn: Oda ngo belgahen hamba asa tuanna; janah oda ngo belgahen pasulaken dari pada sipasulakken.

¹⁷Enggo ibettoh kènè i bagèndari; mula ibaingken kènè bagidi, tuhu-tuhu mo kènè mersampang atè.

¹⁸Karina siKudokken èn taba kènè, oda ngo bai ndènè karinana i, ai Kubettoh ngo barang isè siKupilih. Tapi barang kadè sitersurat ibas Bibèl, kennah saut ngo i karinana, janah èn mo sitersurat i sidi, ‘Kalak sirebbak mangan dekket Aku ngo mengalo Aku.’

¹⁹Kubagahken i bai ndènè bagèndari, sinderrang madèng masa, asa enggo kessa masa idi, gabè percaya mo kènè, Aku ngo i sinidokkenna AKU LOT.

²⁰Situhunna ngo siKudokken èn: Barang isè menjalo pasulakenKu, Aku ngo nijalona i. Janah barang isè menjalo Aku, Dèbata sipasulakken Aku i ngo nijalona.”

²¹Idokken Jesus kessa mo bagidi, gabè mellui kalohoon mo atèna. Nai idokken mo, “Situhunna ngo siKudokken ènda; sada kalak bai ndènè nai ngo menelbuh Aku.”

²²Mersitengennen mo sisinNa i samahsa ninganna ibagasen perasaan oda mertentu. Oda ibettoh kalak idi, isè nimaksud Jesus i.

²³Kundul ngo sisiin kekellengen atè Jesus i gembarna.

²⁴Nai ia mo ikilap si Simon Petrus, asa ikusoken taba Jesus, tah siapaina nimaksud Jesus i.

²⁵Nai ijolmiti mo Jesus, ikuso mo, “Isè ngo i Tuhan?”

²⁶Ialoi Jesus mo, “Barang bai isè Kuberrèken roti siKusernepken èn, idi mo ia kalakna.” Nai ibuat Jesus mo sada roti, isernepken mo mi bagasen caban; iberrèken mo roti i taba si Judas Iskariot.

²⁷Ijalo si Judas kessa mo roti i, mèter mbengket mo Sibolis mi bagasen dirina. Idokken Jesus mo tabasa, “Ndor mo bahan sinaing bahankenmu i!”

²⁸Isè poda kalak i simangan i mengantusi, kasa idokken Jesus bagidi taba si Judas.

²⁹Lot ngo dèba merdokatè, ipasulak Jesus si Judas lako mennokor siperlu mi pèsta idi, barang tah ipasulak Jesus ia mennaruhken kèpèng giam cituk taba kalak sincor, ai ia ngo mencèkèp bagut-bagut kalak idi.

³⁰Enggo kessa ijalo si Judas roti i, mèter laus mo ia mi ruar, tapi enggo mo berngin tikanna i.

³¹Enggo kessa laus si Judas i, idokken Jesus mo, “Bagèndari mo mersangap Anak Jelma i. Janah merkitè-kitè Ia, mersangap ma mo Dèbata.

³²Mula mersangap Dèbata merkitè-kitè Ia, Ia pè ipesangap Dèbata ma mo. Ndor nèngè mo i, ibakin Dèbata.

³³Kènè dukak-dukakKu, oda ndekkah nèngè rebbak Aku dekket kènè, itulusi kènè mo Aku, tapi bagè sienggo Kudokken taba kalak Jahudi, bagidi ma ngo Kudokken taba kènè: Oda terdahi kènè mi bekkas sidahinKu i.

³⁴Jalo kènè mo pati-patiin rembaru bangKu nai: Kennah mersikekelengen ngo kènè samah kènè. Bagè Aku mengkekelengi kènè, bagidi ma mo kènè kennah mersikekelengen.

³⁵Mula mersikekelengen kènè, samah kènè, karina mo kalak bettohen magahken sisinKu kènè.”

³⁶Ikusoken si Petrus mo, “Tuhan, naing laus mikè ko pana?” Nina Jesus mengaloi, “Naing laus ngo Aku mi sada bekkas, tapi oda terbaing kono mengèkutken Aku mi bekkas i. Tapi ukum luas, ièkutken kono mo Aku mi sidi.”

³⁷“O Tuhan, kasa oda ndorok kuèkutken kono bagèndari? Ai kebbas ngo aku lako matè pè, mengèkutken kono!” nina si Petrus.

³⁸Ialoi Jesus mo, “Tuhu-tuhu ngo matè pè uè ngo ko lako megèkutken Aku? Kubagahken mo bamu: Sinderrang madèng takuak manuk berngin èn, enggo mo tellu kali iperso kono Aku, oda itandai kono nimu Aku!”