Read Batak Dairi Johanes 14 Bible Online

Johanes 14 - Batak Dairi bible

Johanes 14

¹“Ulang pella bonek atè ndènè,” nina Jesus taba kalak i. “Percaya mo kènè taba Dèbata, janah percaya ma mo kènè taba Aku.

²Lumbang ngo bekkas i Bages Bapa. Laus pè aku mi sidi lako menghantari bekkas ndènè ngo. Oda pella kubagahken idi taba kènè, ukum oda ngo tuhu bagidi.

³Enggo kessa laus Aku menghantari bekkas bai ndènè, roh nola ngo Aku mengalengi kènè; asa barang i dikè Aku merbekkas, i sidi ma mo kènè merrian.

⁴Ibettoh kènè ngo dalan mi bekkas sinaing dahinKu idi.”

⁵Gabè idokken si Tomas mo mbang Jesus, “Tuhan, oda ngo kubettoh kami barang dempak dikè kono laus, bakunè mo kami memettoh dalan laus mi sidi?”

⁶Ialoi Jesus mo, “Aku ngo dalan lako menandai Dèbata, dekket dalan asa terolih kenggelluhen. Sada poda ndorok soh mendahi Bapa, ukum mak merkitè-kitè Aku.

⁷Mula itandai kènè Aku, itandai kènè ma mo BapangKu. Mulai bagèndari nai, enggo mo itandai kènè Ia, janah enggo mengidah Ia.”

⁸Nai idokken si Pilipus mo taba Jesus, “Tuhan, tuduhken bai nami Bapa i, asa puas ukur nami.”

⁹Tapi ialoi Jesus mo, “Enggo mo bagi dekkahna Aku rebbak dekket kènè, laju dèng ngo keppè oda itandai kono Aku alè Pilipus? Barang isè mengidah Aku, me- ngidah Bapa i ngo Ia. Kasa idokken kono dèng, ‘Tuduhken Bapa i bai nami?’

¹⁰Oda ngo percaya kono alè Pilipus, sada ngo Aku dekket Bapa, janah sada ngo Bapa dekket Aku? Karina siKudokken taba kono i, oda ngo tubuh ibas ukur-ukurKu nai i. Bapa nibagasen Aku i ngo mendokken i karinana.

¹¹Percaya mo kènè, sada ngo Aku dekket Bapa, janah sada ngo Bapa dekket Aku. Mula oda terbaing kènè mengkettoki idi, ah, mak nèngè! Percaya mo kènè taba Aku, Kumarnaken sienggo Kuhanaken i.

¹²Situhunna ngo siKudokken èn: Barang isè tuhu-tuhu percaya taba Aku, bakinenna ngo bagè sienggo Kubakin i — oda pellin bagi sambing tupèh — tapi buèen i sidi nai pè ndorok ngo ibaing, kumarna laus ngo Aku mendahi Bapa.

¹³Asa barang kadè sambing ipido kènè merkitè-kitè gerarKu, Kuberrèken ngo i bai ndènè, asa mermulia Bapa merkitè-kitè Anak i.

¹⁴Pido kènè mo barang kadè merkitè-kitè gerarKu; Kuberrèken ngo i bai ndènè.”

¹⁵“Mula ngkelleng atè ndènè midah Aku, ulaken kènè mo pati-patinKu.

¹⁶Kupido mo bai Bapa, asa Iberrèken bai ndènè sada Pengu- rupi sidèban, simerian rebbak dekket kènè soh mi amman sumendah.

¹⁷Tendi Dèbata ngo Ia sipetararken kebennaren tersèngèt Dèbata. Oda terjalo dunia èn Tendi Perbadia I, kerna oda idah dunia èn bak oda itandai dunia èn ia. Tapi itandai kènè ngo ia, kerna merrian rebbak dekket kènè ngo Ia, janah mersada dekket kènè mo Ia.

¹⁸Oda Kutadingken kènè mak merinang bak mak merbapa. Balik nola ngo Aku mendahi kènè.

¹⁹Sigejap nai ngo, oda idahen dunia èn nèngè Aku. Tapi idah kènè nola mo Aku. Janah kumarna nggelluh ngo Aku, kènè pè nggelluh ngo.

²⁰Enggo kessa dapet arina, bettohen ndènè mo, sada ngo Aku dekket Bapa i, janah kènè sada ngo dekket Aku, janah Aku pè sada ma ngo dekket kènè.

²¹Barang isè menjalo janah mengulaken katangKu, ia ngo simerkelleng atè midah Aku. Ngkelleng mo atè BapangKu midah simengkekelengi Aku. Aku pè ngkelleng mo atèngKu midahsa, janah kupetandaken diringKu bana.”

²²Mengkuso mo si Judas (oda si Judas Iskariot) taba Jesus, “Tuhan, kasa taba kami ipetandaken kono diriMu, keppè oda taba dunia èn?”

²³Ialoi Jesus mo, “Barang isè ngkelleng atèna midah Aku, iuèi mo peddahKu. Ngkelleng mo atè BapangKu midahsa. Nai roh mo Bapa rebbak dekket Aku mendahisa, janah merrian mo kami rebbak dekketsa.

²⁴Barang isè oda mengkekelengi Aku, itulak ngo peddahKu. Oda ngo bangku nai peddah nidengkoh ndènè i, tapi peddah Bapa sipasulakken Aku i ngo.

²⁵Kubagahken i karina taba kènè, sinderrang rebbak dèng Aku dekket kènè.

²⁶Tapi Tendi Dèbata i, pengurupi sinipasulak Bapa merkitè gerarku, ia mo mengajarken taba kènè tersèngèt mi sagumama dekket pessè- ngètken taba kènè tersèngèt karinana sienggo Kugabahken idi bai ndènè.

²⁷Damè ngo Kutadingken bai ndènè, imo damè silot bangku Kuberrèken bai ndènè. Oda ngo bagè niberrèken dunia èn ukum damè siKuberrèken i. Ulang kènè bulisah janah ulang mbiar.

²⁸Enggo idengkoh kènè siKudokken i, ‘Laus mo Aku, tapi roh nola ngo Aku mendahi kènè’. Mula tuhu ngkelleng atè ndènè midah Aku, kennah lolo ngo kènè mula laus Aku mendahi Bapa, ai belgahen ngo Bapa i asa Aku.

²⁹Kubagahken kin i bagèndari taba kènè sinderrang madèng masa i karina, asa enggo kessa masa, gabè percaya mo kènè.

³⁰Oda pella mbuè nèngè sinaing dokkenkenKu taba kènè, kerna enggo katikana roh penguasa dunia èn. Tapi oda ngo merkuasa ia bangKu.

³¹Tapi kennah masa ngo i karina asa ibettoh dunia èn, ngkelleng ngo atèngKu midah Bapa, janah kuulaken karinana sinidokken Bapa i taba Aku. Ita kènè mo, laus mo kita isèn nai.”