Read Batak Dairi Johanes 15 Bible Online

Johanes 15 - Batak Dairi bible

Johanes 15

¹Nina Jesus dèng ma, “Aku ngo batang anggur situhunna, Bapa ngo sidasa pekken i.

²Karina dahanKu siso merbuah igettap ngo; tapi karina dahan simerbuah, itunasi ngo janah ipebersih asa makin ratraten buahna.

³Enggo mpanting kènè kumarna peddah siKupeddahken i bai ndènè.

⁴Tettap mo kènè ibagasen Aku, asa Aku pè tettap ibagasen kènè. Oda ndorok merbuah dahan i ukum ibas kedirinna nai. Tapi ndorok merbuah ngo ia, mula nggelluh ia ipas batang idi. Bagidi ma ngo bang kènè pè, lebbè nggelluh ibagasen Aku ngo kènè, asa ndorok merbuah kènè.

⁵Aku ngo batang anggur i, janah kènè ngo dahan-dahanna. Barang isè nggelluh ibagasen Aku, janah Aku ibagasensa, ia ngo merbuahken mbuè; ai ukum mak merkitè-kitèken Aku, oda lot terbahan kènè barang kadè pè.

⁶Barang isè oda nggelluh ia ibagasen Aku, igettap ngo ia janah ipatakken, nai gabè ngkerrah-kerring mo ia janah ipinumpukken mo asa itutungi mi api.

⁷Mula nggelluh kènè ibagasen Aku janah dak iulaken kènè peddahKu, ndorok mo kènè mengido barang kadè sambing taba Bapa, nai iberrèken mo sinipido ndènè i.

⁸Mula ratraten buah ndènè mersampang atè mo BapangKu, imo tandana tuhu-tuhu kènè sisinKu.

⁹Kukekelengi ngo kènè bagè Bapa mengkekelengi Aku. Hot mo kènè ibagasen kelleng atèngKu i.

¹⁰Mula iuèi kènè katangKu, nggelluh ibagasen Aku mo kènè, codi bagè Aku nggelluh ibagasen ngkelleng atè BapangKu, kerna kuuèi kataNa.”

¹¹“Karinana Kubagahken i taba kènè, asa irasaken kènè sampang atèngKu, janah asa dom sampang atè ndènè.

¹²Èn mo peddahKu: Kennah mersikekelengen kènè, codi bagè Aku mengkekelengi kènè.

¹³Barang isè mengkekelengi denganna, kennah uè ia matè mengkepkep denganna i.

¹⁴Mula iulaken kènè siKudokken, denganKu janah supan-sulanKu mo kènè.

¹⁵Oda nèngè Kugerari kènè kandu, ai oda ibettoh kandu barang kadè ibahan tuanna. Kugerari mo kènè supan-supanKu, kerna karina siKudengkoh bai Bapa nai, enggo mo Kubagahken taba kènè.

¹⁶Oda ngo kènè memilih Aku. Aku ngo milih kènè, janah mennuruh kènè, asa laus kènè merbuah — asa ratraten buah ndènè, janah asa hot buah ndènè i. Nai iberrèken Bapa mo bai ndènè barang kadè sambing ipido kènè merkitè-kitè Aku.

¹⁷Èn mo peddahKu: Kennah mersikekelengen kènè.”

¹⁸“Mula ncego atè dunia èn midah kènè, èngèt kènè mo, enggo lebbèen kin Aku ikecegoken.

¹⁹Ukum dunia èn kin sidasa kènè, ngkelleng ngo atè dunia èn midah kènè, janah gabè supan-supanna ngo kènè. Tapi enggo Kupilih kènè i dunia èn nai, jadi oda nèngè milik dunia èn kènè. Kumarnakenna i ngo asa ceggo atè dunia èn midah kènè.

²⁰Èngèt kènè mo sienggo Kudokken idi taba kènè, ‘Oda ngo belgahen kandu daripada tuanna.’ Salang Aku enggo idersa kalak idi, makinsa nola mo kènè mak idersa. Mula iuèi kalak i peddahKu, iuèi ma ngo bang peddah ndènè pè.

²¹Iulaken kalak i ngo karinana i taba kènè, kumarnaken sisinKu kènè; janah kumarna oda itandai kalak idi Ia simengutus Aku.

²²Ukum oda kin roh Aku, janah mula oda kin sanga kupeddahken karinana i taba kalak idi, oda ngo merdosa kalak i.

²³Barang isè merceggo atè midah Aku, ceggo ma mo atèna midah Bapa.

²⁴Ukum oda dèng kin nung Kuhanaken i tengah-tengah kalak i siso nung ihanaken barang isè pè, oda ngo merdosa kalak idi. Tapi bagèndari enggo mo idah kalak i kadè siKuhanaken, tapi ncego ngo atè kalak i midah Aku, bang midah BapangKu pè.

²⁵Masa pè karinana i, asa dapet ngo bagè sitersurat ibas Bukku Patiin kalak i, ‘Ikecegoken kalak i ngo Aku, oda lot sebabna.’

²⁶Pasulakenku mo taba kènè Pengurupi siroh bai Bapa i nai. Ia ngo Tendi sipetandaken kebennaren terrèngèt Dèbata. Roh kessa Ia, Isaksiken ngo terrèngèt Aku.

²⁷Tapi kènè pè kennah ngo mennaksiken Aku, ai imulana nai ngo kènè enggo rebbak dekket Aku.