Read Batak Dairi Johanes 16 Bible Online

Johanes 16 - Batak Dairi bible

Johanes 16

¹Kubagahken kin i lebbèen taba kènè, asa ulang gabè murak ukur ndènè.

²Iliplip kalak i mo kènè i bages perguruun nai. Janah dapet nèngè mo tikkina, mengulaken lemmo atè Dèbata ngo ia dok atèna mula ibunuh kalak idi kènè.

³Ibaing kalak i bai ndènè bagidi, kumarna oda itandai kalak i dèng BapangKu, janah Aku pè makdèng ma ngo itandai.

⁴Tapi bagèndari Kubagahken idi taba kènè, asa mula masa i luas, èngèt kènè mo, enggo Kubagahken kin taba kènè.” “Oda nung dèng Kubagahken idi i mulana nai taba kènè, kumarna rebbak dèng Aku dekket kènè.

⁵Tapi ukum bagèndari laus nè mo Aku mendahi simengutus Aku; tukasi pè bagidi, sada kalak poda kènè mengkuso, dempak dikè Aku laus.

⁶Bagèndari balikna nola ngo tupèh, ai gabè bonek nola ngo atè ndènè, kumarna Kubagahken idi taba kènè.

⁷Tapi situhunna ngo siKudokken èn bai ndènè: Laba ndènè ngo mula laus Aku; ai ukum oda laus Aku, oda roh pengondiin i mendahi kènè. Tapi mula laus Aku, pasulakenKu mo Ia mendahi kènè.

⁸Janah roh kessa Ia, Iajari mo dunia èn tersèngèt pengantusiin lapaten dosa, kebennaren dekket hukum;

⁹ukum tersèngèt dosa, imo kumarna oda percaya kalak i bangKu;

¹⁰ukum tersèngèt kebennaren, imo kumarna laus Aku mendahi Bapa, janah oda idah kènè nèngè Aku;

¹¹ukum tersèngèt hukum, imo enggo ihukum penguasa dunia enda!

¹²Macam dèng ngo nemmu bagèna sinaing Kubagahken bai ndènè, tapi ukum bagèndari oda dèng terjalo kènè i.

¹³Tapi mula enggo kessa roh Tendi i, imo Ia sipetandaken kebennaren tersèngèt Dèbata, itegu-tegu mo kènè lako menandai karina kebennaren. Oda ngo mengerrana Ia ibas diriNa sendiri nai, tapi iranaken ngo sinidengkohNa, janah bagahenkenna ma ngo taba kènè sinaing masa i podi ari.

¹⁴Ipessangap ngo Aku, ai bagahenkenNa ngo taba kènè kadè sinijaloNa bangKu nai.

¹⁵Karinana silot bai Bapa, milikNa ngo I. Kumarna naidi ngo asa Kudokken; bagahenken Tendi i ngo bai ndènè, kadè nijaloNa bangKu nai.”

¹⁶“Sigejap nai ngo kessa, oda idahen ndènè nèngè Aku, tapi sigejap nai nola ma, idahen ndènè nola ma mo Aku.”

¹⁷Mendengkoh idi, gabè mersikusoon mo dèba sisiin idi samahsa, “Kadè ngo lapaten sinidokkenna banta i; sigejap nai ngo kessa, oda idahen ndènè nèngè Aku, tapi sigejap nai nola ma, idahen ndènè nola mo Aku? Bagidi mo dekket nidokkenna: ‘Laus mo aku mendahi Bapa?’

¹⁸Dak ngo ikusoken kalak i: Kadè lapaten ‘sigejap nai’? Oda siantusi tah kadè ranana!”

¹⁹Ibettoh Jesus mo naing ikusoi kalak idi Ia, jadi Idokken mo taba kalak i, “Kasa mersikusoon kènè samah-samah kènè terrèngèt siKudokken: Sigejap nai ngo, oda idahen ndènè nèngè Aku, tapi sigejap nai nola ma, idahen ndènè nola mo Aku?

²⁰Ntangkas mo kubagahken taba kènè; tangis mo kènè janah derru-derru, tapi lolo mo dunia èn. Bonek ngo kènè, tapi gabè mobah mo bonek atè ndènè i gabè sampang atè.

²¹Susah janah bonek ngo atè daberru lako menubuhken dukakna. Tapi enggo kessa tubuh dukakna i, gabè oda nèngè ngo ièngèt kinimpiahna i, ai mersampang atè mo ia kerna enggo itubuhken sada anak mbara mi dunia èn.

²²Bagidi ma ngo bang kènè pè. Bagèndari bonek ngo kènè, tapi rebbak nola mo Aku dekket kènè, nai gabè sampang mo atè ndènè; janah isè poda ndorok mengerampasi sampang atè ndènè i bai ndènè nai.

²³Dapet kessa mo ari i, oda pella mengkusoken barang kadè nengè kènè taba Aku. Kudokken mo bai ndènè: Barang kadè pè ipido kènè bai Bapa nai, iberrè ngo i bai ndènè merkitè-kitè gerarKu.

²⁴Soh bagèndari oda nung dèng kènè mengido barang kadè merkitè gerarKu. Pengido kènè mo, asa menjalo kènè, janah asa dom sampang atè ndènè.”

²⁵“Karinana ènda Kuranaken bai ndènè merkitè-kitè codiin. Tapi roh nè mo tikkina, oda nèngè merkitè codiin Aku mengerrana taba kènè. Ntompel mo kuranaken bai ndènè tersèngèt Bapa.

²⁶Tikan dapet ari i, mersodip mo kènè merkitè gerarKu mendahi Bapa lako bai ndènè,

²⁷ai ngkelleng ngo atè Bapa midah kènè, kumarna ngkelleng atè ndènè midah Aku.

²⁸Bai Bapa nai ngo asalKu roh mi dunia èn. Tapi laus mo Aku menadingken dunia èn, lako balik mendahi Bapa.”

²⁹Nai nina sisiin i mo taba Jesus, “Bagèndari dèng ngo asa ntompel iranaken kono bai nami, oda nèngè merkitè codiin.

³⁰Bagèndari enggo kubettoh kami, ibettoh kono ngo karinana, janah oda pella mengkuso nèngè kalak i mendahi kono. Kerna naidi, percaya ngo kami bai Dèbata nai ngo rohmu.”

³¹Nai nina Jesus mo taba kalak i, “Bagèndari otang enggo percaya kènè?

³²Èngèt kènè mo! Roh mo tikkina enggo mo roh i tupèh, isamburiahken mo kènè. Laus mo kènè balik mi bages ndènè gennep janah itadingken kènè mo sadaKu. Tapi oda ngo sadaKu tupèh, ai Bapa i ngo denganKu.

³³Karina i Kubagahken taba kènè, asa dom sampang atè ndènè, kumarna nggelluh kènè ibagasen Aku. Mpersuk mo iakap kènè ibakin dunia èn. Tapi tahanken kènè mo i sigejap, ai enggo kutaluken dunia èn!”