Read Batak Dairi Johanes 17 Bible Online

Johanes 17 - Batak Dairi bible

Johanes 17

¹Enggo kessa idokken Jesus bagidi, itarè mo mi langit ninganna idokken, “Ialè Pa enggo dapet tikkina ba- gèndari pesangap mo anakMu, asa ipe- sangap anakMu i Kono.

²Tosè bagè Kono enggo merrèken kuasa taba Anak idi tersèngèt karina jelma singgelluh, asa Iberrèken Anak I kenggelluhen siam- man sumendah taba karina jelma sini- berrèkenMu i bana.

³Èn ngo kenggelluhen situhunna janah siamman sumendah i, asa itandai kalak i, Kono ngo kessa Dèbata situhunna, dekket menandai Jesus Kristus Raja Sipaluah sini utusMu i alè Pa.

⁴Enggo Kupesangap Ko alè Pa i babo tanoh èn merkitè enggo pul Kubakin karina bahaan nidokkenMu idi mahan bahanKu.

⁵Kumarna naidi alè Pa, persangapi mo Aku bagèndari merkitè kemmuliaan sienggo Kurasai rebbak dekket Kono idi kin sinderrang makdèng ihanaken Kono dunia èn.

⁶Enggo kupetarar gerarMu alè Pa taba jelma niberrèkenMu bangKu i dunia èn. Ko ngo sidasa kalak idi, janah enggo ipesakat Kono kalak i taba Aku. Enggo mo iuèi kalak i peddahMu i alè Pa.

⁷Bagèndari ibettoh kalak i ngo enggo, karinana niberrèkenMu bangKu, Kono ngo sidasa i.

⁸Karina rana sinidokkenMu taba Aku, enggo Kupessoh taba kalak i, janah enggo mo ijalo kalak idi. Enggo ngo ntangkas ibettoh kalak idi, berkat bamu nai ngo Aku, janah percaya ngo kalak i, Kono ngo pasulakken Aku.

⁹Kalak i ngo Kusodipken, oda ngo dunia èn, tapi kalak i sienggo nipesakatmu bangKu idi ngo Kusodipken, ai Kono ngo sidasa kalak i.

¹⁰Karina milikKu, milik Bapa ngo i, janah karina milik Bapa, milikKu ngo i, janah mersangap ngo Aku i tengah-tengah kalak idi.

¹¹Naing roh ngo Aku bagèndari mendahi Kono alè Pa. Oda i dunia èn nèngè Aku, tapi ukum kalak idi dak i dunia èn ngo tong. Ialè Bapa Simbadia, permakani mo kalak idi ibagasen gerarMu, imo kuasaMu sienggo niberrèkenMu bangKu — asa sada kalak idi bagè kita sisada i.

¹²Sidekkah rebbak dèng Aku dekket kalak i, Kupermakan ngo kalak idi ibagasen gerarMu — imo merkitè kuasaMu niberrèkenMu bangKu. Enggo kujaga kalak i siniberrèkenMu bangku i, janah sada kalak poda lot mbalang kubakin, laènken sisada kalak sienggo nitentukenmu lako mago i, asa merkitè bagidi saut bagè sitersurat ibas Bibèl.

¹³Bagèndari roh mo Aku mendahi Kono alè Pa. Kudokken karinana i taba Kono, sinderrang i dunia èn dèng Aku; asa dom sampang atèngKu ibagasen kalak i.

¹⁴Enggo Kupesakat karina peddahMu i taba kalak i, janah ikosomi dunia èn ngo kalak i, kumarna oda milik dunia èn kalak i, tosè bagè Aku oda milik dunia èn.

¹⁵Oda ngo Kupidoken asa iabin Kono kalak idi i dunia èn nai tapi Kupidoken asa ilegenni Kono kalak idi ibas si jahat i nai.

¹⁶Tosè bagè Aku oda i dunia èn nai, bagi ma ngo bang kalak idi pè oda i dunia èn nai.

¹⁷Perbadia mo kalak idi i bagasen kebennarenMu, ai kataMu ngo kebennaren.

¹⁸Tosè bagè niutusMu Aku mi dunia èn, bagi ma ngo Kupasulak kalak i mi dunia èn,

¹⁹janah mahan tebbus kalak idi Kuberrèken ngo diringKu taba Kono alè Pa, asa tuhu-tuhu kalak idi bagè nipilih baMu.

²⁰Oda ngo pellin bai kalak i sambing Aku mersodip, tapi dekket ngo taba kalak sipercaya bangKu, kemmulihken sukuten kalak idi,

²¹asa gabè sisada kalak i karina, tosè bagè Kono ibagasen Aku, janah Aku ibagasen Kono, janah kalak idi sada ibagasen kita, asa percaya dunia èn, Kono ngo mengutus Aku.

²²Enggo Kupersangapi kalak i merkitè kesangapen niberrèkenMu bangKu, asa merkitè bagidi, gabè sada kalak i,

²³tosè bagè kono pè sada dekket Aku, asa tuhu-tuhu kalak i sada, nai kemmulihkenna idi, gabè satdar dunia èn, Kono ngo alè Pa mengutus Aku, janah ngkelleng ngo atèMu midah kalak i, bagè ngkelleng atèMu midah Aku.

²⁴Ialè Pa, enggo ipesakat kono kalak i bangKu. Bagèndari pè, ipergeddo atèngKu, barang idikè pè Aku, dak rebbak nemmu kalak i dekket Aku, asa idah kalak i kemmulianKu; imo kemmuliaan niberrèkenMu bangKu, kumarna ikekelengi Kono ngo Aku, madèngkin pè ihanaken Kono dunia èn.

²⁵Alè Pa, Kono ngo sintèger i. Oda ngo itandai dunia èn Kono, tapi ukum Aku kutandai ngo Kono, janah ibettoh kalak èn ngo, Kono ngo mengutus Aku.

²⁶Enggo Kupetandaken Kono alè Pa taba kalak i, janah dak bagidi ngo Kubaing, asa ndorok irasaken kalak i, ngkelleng ngo atèmu midah Aku.”