Read Batak Dairi Johanes 18 Bible Online

Johanes 18 - Batak Dairi bible

Johanes 18

¹Enggo kessa pul isodipken Jesus bagidi, laus mo Ia rebbak dekket sisinNa mi suberrang Laè Kidron. Lot ngo isidi pekken. Misidi mo Jesus rebbak dekket sisinNa.

²Ukum si Judas penelbuh idi, ibettoh ngo i bekkas i, ai nggati ngo Jesus mi sidi pulung dekket sisinNa.

³Nai laus mo si Judas mi bekkas i menguluken sada nuhnuhen tenterra Rom bak perjaga Bages Dèbata, ipasulak imam-imam ekuten bak kalak Parisè. Lengkap ngo kalak i merembah senjata, suluh bak obor.

⁴Ibettoh Jesus ngo karina sinaing masa baNa. Nai Idapetken mo kalak i ninganna idokken, “Isè ngo tulusen ndènè?”

⁵Ialoi kalak i mo, “Jesus kalak Nazaret i ngo.” “Aku ngo I,” nina Jesus taba kalak i. Isidi ma ngo si Judas penelbuh i cènder rebbak dekket kalak i.

⁶Sinderrang idokken Jesus taba kalak i, “Aku ngo I,” mèter sondar mo karina kalak i mi podi, janah mertonggalingen mi tanoh.

⁷Nai idokken Jesus mo mengolihi, “Isè ngo tulusen ndènè?” “Jesus kalak Nazaret i ngo,” nina kalak i mengaloi.

⁸“Enggo Kudokken taba kènè Aku ngo I,” nina Jesus. “Asa mula Aku ngo sinitulusen ndènè, belli kènè mo kalak èn laus.” (

⁹Merkitè katana bagidi, saut mo nidokkenna i bagèen, “Alè Pa, isè poda lot mago Kubaing ibas sienggo nipessohMu mbang Aku i nai.”)

¹⁰Nai mènter isintak si Petrus mo pedangna, ai tupung kin ngo ia merpeddang, itampul mo sada kalak naposo imam huntuun, sanga nggettap copingna kamuhun. Si Malkus ngo gerar naposo imam huntuun i.

¹¹Nai idokken Jesus mo taba si Petrus, “Sembungken pedangmi! Otang kennah ngo Kuènum caban kinidersa niberrèken Bapa bangKu?”

¹²Nai mènter itangkup soridadu bak ekutenna dekket perjaga-perjaga kalak Jahudi mo Jesus, janah ilanggu.

¹³Iiring kalak i mo Jesus perlebbè mendahi si Hanas, simatua si Kayafas. Si Kayafas ngo imam huntuun tahun naidi.

¹⁴Ia ngo simendokken taba perkuasa Jahudi, lotiin ngo matè sada kalak megkepkep jelma nterrem, dari pada karinana nola tumpat bangsa i.

¹⁵Ukum si Simon Petrus dekket sisiin sisada kalak nai, dak ièkut-èkut ngo Jesus i podi nai. Mersitandaan ngo sisiin sisada kalak i dekket imam huntuun i; jadi dekket ngo ia mbengket rebbak dekket Jesus mi kasèan bages imam huntuun i,

¹⁶tapi ukum si Pe- trus i ruar ngo ia memèma, i pèntu. Balik mo mi ruar sisiin sisada kalak i, simersitandan dekket imam huntuun i. Mengerranai mo ia dekket naposo daberru penjaga pèntu, nai iarahken mo si Petrus mbengket mi bagasen.

¹⁷Nai nina daberru simenjaga pèntu i mo mbang si Petrus, “Èi, otang kono pè sada kalak ipas sisiin kalak adoi nai ngo?” Ialoi si Petrus mo, “Oda!”

¹⁸Kumarna enggo mbergoh kalohoon tikanna idi, gabè ilakati naposo dekket perjaga-perjaga Bages Dèbata mo api, nai cingko mo kalak i cidudu i gembar api i. Si Petrus pè dekket ma mo cènder i sidi cidudu.

¹⁹Nai ikusoi imam huntuun imo Jesus tersèngèt sisinNa bak tersèngèt peddahNa i.

²⁰Ialoi Jesus mo, “Dakdak ngo Aku mengajari jelma nterrem i bages perguruun dekket i Bages Dèbata bekkas kalak Jahudi mertumpu. Oda Aku mboni-mboni mengerana.

²¹Kasa Aku ikusoi kono? Kalak idi sienggo mendengkoh peddahKu i mo kusoi, ai enggo ntangkas ibettoh kalak i siKupeddahken idi.”

²²Enggo kessa idokken Jesus bagidi, mèter iparap sada kalak perjaga ni sidi mo Jesus ninganNa idokken, “Kasa bagidi pengaloiMu taba imam huntuun i?”

²³Nai ialoi Jesus mo ia, “Mula salah siKudokken i, bagahken salahna. Tapi mula tuhu ngo siKudokken i, kasa iparap kono Aku?”

²⁴Nai ipasulak si Hanas mo mengiring Jesus mendahi si Kayafas imam huntuun i, tapi tong dèng ngo terlanggu.

²⁵Ukum si Simon Petrus, tong dèng ngo cènder i sidi cidudu. Nai nina jelma nisidi mo mbangsa, “Otang kono pè sada kalak ipas sisinna i nai ma ngo?” Tapi iperso si Petrus ngo, nina mo, “Oda!”

²⁶Nai nina sada kalak ipas naposo imam huntuun i idi nai mo, imo sincelket si nitampul si Petrus copingna i, “Kuidah ngo kono i pekken Getsemane i, rebbak dekket- Sa!”

²⁷Nai idokken si Petrus mo, “Oda,” — janah tupung ibas katika i mèter takuak mo manuk.

²⁸Nai itaruhken kalak i mo Jesus njengkas kalohoon i bages si Kayafas nai mi bages gubèrnur si Latus. Ukum kalak Jahudi i sendiri, oda ngo masuk mi bages i, asa ulang tersubang kalak i lako mangan pangaan Paskah i.

²⁹Kerna naidi gabè karuar mo si Latus mendapetken kalak i, ikusoi mo kalak i, “Kadè pana pengaduun ndènè tersèngèt kalak ènda?”

³⁰Ialoi kalak i mo, “Oda kutaruhken kami Ia mendahi Gubèrnur i ukum oda lot salahNa.”

³¹Nai nina si Latus mo taba kalak idi, “Embah kènè mo Ia, janah hukum kènè Ia rembang mi agama ndènè!” Tapi ialoi kalak Jahudi imo, “Mengèkutken agama nami irarang ngo kami menghukum matè barang isè pè.” (

³²Masa pè i, asa saut ngo nidokken Jesus tersèngèt bakunè cara permatèna.)

³³Nai balik mo si Latus mi bagesna, janah iarahken mo Jesus, nai ikusoi mo Jesus, “Raja ngo Kono?”

³⁴Ialoi Jesus mo, “Turah i ukurmu nai ngo kuso-kusomu i, barang tah sidèban ngo mendokken i taba Kono?”

³⁵Ialoi si Latus mo, “Kalak Jahudi ngo aku idah kono? Bangsamu dekket imam-imam ekuten ngo pesakatken Kono taba Aku. Kadè pana ibahanken Kono?”

³⁶Nina Jesus mo, “Ukum kerajanKu idi, oda ngo bagè kerajaen dunia èn. Ukum i dunia èn nai kin ngo kerajanKu idi, tentu mengalo mo nemmu orangKu asa ulang ipesakat Aku mendahi kalak Jahudi. Tapi oda ngo i dunia èn nai kerajanKu i!”

³⁷Nai mengkuso mo si Latus, “Mula bagidi, tuhu ngo Kono Raja?” Ialoi Jesus mo, “Bagè nidokkenmu i ngo, Raja ngo aku. Asa tubuh aku janah roh mi dunia èn, pellin sada ngo kessa tujunku; imo lako mengkesaksiken tersèngèt kebennaren. Barang isè roh i sibennar idi nai, ijalo ngo peddahKu.”

³⁸Nai ikusoi si Latus nola mo Jesus, “Kadè ngo kebennaren i?” Enggo kessa idokken si Latus bagidi, mi ruar mo ia mendahi kalak Jahudi, nina mo taba kalak i, “Kadè poda lot dapet aku salahNa.

³⁹Tapi bagè kecemmalen ndènè, dak kupaluah ngo sada kalak siterkurung tupung Ari Raya Paskah. Uè ngo kènè asa kupaluah raja kalak Jahudi bai ndènè?”

⁴⁰Ialoi kalak i mo ninganna isurakken, “Oda! Ulang paluah Ia! Si Barabas mo paluah lotiin!” (Ukum si Barabas i, pennamun ngo.)