Read Batak Dairi Johanes 19 Bible Online

Johanes 19 - Batak Dairi bible

Johanes 19

¹Nai iarahken si Latus mo Jesus, idokken mo asa iligasi kalak idi ia.

²Idandani soridadu nisidi mo dori mahan bulang-bulang, nai ibaing kalak i mo bulang-bulang dori i mi babontakal Jesus. Enggo kessa i, isellukken kalak i mo tabaSa jubah meharbu.

³Merrohen mo kalak i mendahi Jesus ninganNa idokken, “Njuah-njuah mo bamu alè raja kalak Jahudi!” Enggo kessa idokken bagidi mèter iparapi kalak i mo Jesus.

⁴Nai mi ruar nola mo si Latus sikali nai, nina mo taba jelma nterrem i, “Tengen kènè mo kuarahken Ia mi ruar, asa ibettoh kènè oda lot dapet aku salahNa.”

⁵Karuar mo Jesus ninganna memakè bulang-bulang dori i janah memakè jubah meharbu. Idokken si Latus mo taba kalak idi, “Tengen kènè mo kalakna!”

⁶Idah imam-imam ekuten dekket perjaga-perjaga idi kessa mo Jesus, isurakken kalak i mo, “Persilangken, Persilangken mo Ia!” Nai idokken si Latus mo, “Embah kènè mo Ia janah persilangken kènè, ai kadè poda lot dapet aku salahNa.”

⁷Ialoi kalak Jahudi mo, “Mengèkutken hukum nami, kennah merrutang kessah ngo Ia, ai idokken ngo diriNa Anak Dèbata.”

⁸Idengkoh si Latus kessa mo nidokken kalak idi i, makin mbiar mo ia.

⁹Ibengketti nola mo kantorna, janah ikusoi mo Jesus, “Idikè nai ngo Kono?” Tapi sip sambing ngo Jesus, oda ialoi barang kadè pè ikusoken.

¹⁰Nai idokken si Latus mo mbangsa, “Oda uè Kono menga- loi aku? Èngèt mo, merkuasa ngo aku paluahken Kono, janah merkuasa ma ngo aku mempersilangken Kono!”

¹¹Nai ialoi Jesus mo, “Ukum oda Iberrèken Dèbata kuasa i bamu, kadè poda lot kuasamu bangKu. Kerna naidi, belgahen ngo dosa sipesakatken Aku, dari pada kono.”

¹²Idengkoh si Latus kessa mo rana Jesus idi, makin itulusi mo dalan lako paluahken Jesus. Tapi muat nggangna mo isurak-surakken kalak Jahudi, “Mula ipaluah Kono Ia, oda dengan Kèsar i Kono. Ai barang isè mendokken dirina raja, musuh Kèsar i ngo ia!”

¹³Idengkoh si Latus kessa mo kata-kata idi, iarahken mo Jesus mi ruar. Kundul mo ia mi kundulen perhukumen mergerar Karosi Batu. (Kata Heber gerarna Gabata.)

¹⁴Tikanna idi kira-kira naing pukul sipuluh dua, ari perkebbasen mi Ari Raya Paskah. Idokken si Latus mo taba kalak idi, “Ènda ngo raja ndènè!”

¹⁵Nai isurakken kalak i mo, “Bunuh mo Ia! Bunuh! Persilangken mo Ia!” Nai nina si Latus mo, “Ipido kènè ngo kennah kupersilangken raja ndènè?” Ialoi imam-imam ekuten mo, “Oda lot raja nami laènken Kèsar i!”

¹⁶Nai ipessoh si Latus mo Jesus taba kalak i, asa ipersilangken. Iarahken kalak i mo Jesus, laus i sidi nai.

¹⁷Nai karuar mo Jesus, janah Ia sendiri ngo memersan kayu persilangNa i, lako laus mi bekkas mergerar “Bekkas Pertulanen”. (Ukum i kata Heber igerari ngo Golgota.)

¹⁸Isidi mo Ia ilabangken kalak i mi kayu persilang. Rebbak dekketSa lot dèng ma ngo dua kalak nai sidèbanna Ipersilangken; sada kalak kan kambirangna janah sada kalak nai kan kamuhunna. Ukum Jesus i tengah-tengah ngo.

¹⁹I babo silang Jesus idi, isuratken si Latus ngo sada surat bagèen katana, “Jesus kalak Nazaret Raja Kalak Jahudi.”

²⁰Mèduk ngo kalak Jahudi menjaka surat i, ai oda ndaoh bekkas Jesus ipersilangken idi i kuta nai. Isuratken ngo kata i, i kata Heber, kata Latin dekket kata Junani.

²¹Nai idokken imam-imam ekuten kalak Jahudi mo taba si Latus, “Ulang surat Raja kalak Jahudi, ‘tapi suratken mo: Idokken kalak ènda, Aku ngo Raja kalak Jahudi.’ ”

²²Tapi ialoi si Latus mo, “Sienggo tersurat idi, tersurat mo!”

²³Enggo kessa ipersilangken soridadu i Jesus, ibuat kalak i mo olesNa, ibagi empat mo i, gennep terolih sada bagian. Ibuat kalak idi ma mo jubahNa. Ukum jubahNa i, oda ngo merpenjarumen — itennun sambing ngo i terruh nai mi babo.

²⁴Nina soridadu i mo samahsa, “Ulang mo sigettap-gettap jubah i. Mertendung mo kita barang bai isè i.” Masa pè bagidi, asa saut ngo nidokken Bibèl bagèen: “Ipella-pella kalak idi ngo olesKu. Mertendung ngo kalak i tersèngèt jubahKu.” Janah tuhuna bagi ngo ibaing soridadu i.

²⁵I gembar kayu persilang Jesus i, cènder ngo inangNa, nangudaNa, si Maria sinibages si Kleopas dekket si Maria Magdalena.

²⁶Tikan idah Jesus kessa enggo isidi inangNa dekket sisiin kekellengen atèNa, nina mo taba inangNa i, “Nangè, tengen mo, idi mo anakmi.”

²⁷Nai nina Jesus mo mbang sisinNa i, “Tengen mo: Idi ngo inangmi.” Mulai isidi nai mo iarahken sisinNa i inang Jesus merrian mi bagesna.

²⁸Enggo kessa bagidi, ibettoh Jesus mo enggo pul karinana, asa saut bagè sitersurat ibas Bibèl, Idokken Jesus mo, “Muas Aku.”

²⁹Lot mo isidi sada mangkuk dom anggur macem. Isernepken kalak idi mo lumut mi bagasen anggur macem i, nai idudurken kalak idi mo lumut i arap sada biski mi bibir Jesus.

³⁰Enggo kessa iènum Jesus anggur macem i, nina mo, “Enggo merujung!” Nai ipetungkuk mo takalna lako mennohken tendina, nai mpostep mo kessahNa.

³¹Oda uè perkuasa kalak Jahudi dak tong kenna gantung bangkè kalak sienggo ipersilangken i ipas kayu silang tupung ari Sabat, kerna ari mbellen ngo ari Sabat i, kerna tikan ipersilangken i Jesus tupung ngo Ari Sinderrang madèng Sabat. Nai ipidoken kalak Jahudi mo taba si Latus asa ipenggelli nèhè kalak sitersilang i, janah ipesampur bangkèna i kayu silang i nai.

³²Laus mo soridadu i memenggelli lebbèen nèhè sidua kalak sirebbak ipersilangken rebbak dekket Jesus.

³³Tapi soh kessa mo kalak idi mendahi Jesus, idah kalak I mo enggo matè keppè Jesus. Jadi oda nèngè pella ipenggel kalak i nèhèNa.

³⁴Tapi ipantem sada kalak soridadu mo merkitè kujurna terruh rusuk silao Jesus; nai tiris mo laè merdengan daroh i ugah Jesus i nai.

³⁵Kalak simengidah i sendiri ngo mennukutken i, asa percaya kènè, janah tuhu ngo nidokkenna i, ai ibettoh ngo mennukutken situhunna ngo ia.

³⁶Masa pè karina idi asa dapet ngo nidokken sitersurat ibas Bibèl, “Sada poda tulanna ipenggel.”

³⁷Lot dèng ma ngo tersurat ibas Bibèl bagèen, “Itengen kalak simemantemsa i ngo Ia.”

³⁸Enggo kessa bagidi, roh mo si Josep kalak Arimatea mi hadeppen si Latus lako mengido bangkè Jesus. (Ukum si Josep ènda percaya ngo taba Jesus, tapi kumarna mbiar ia midah penguasa kalak Jahudi, oda ntarar ia percaya). Nai ipaduè si Latus mo ipesampur si Josep bangkè Jesus.

³⁹Si Nikodemus pè, imo siroh mendahi Jesus berngin-berngin, rebbakken ngo ia dekket si Josep. Iembah si Nikodemus ngo minak mur mersaor minak gaharu — kira-kira tellupuluh kilo buèna.

⁴⁰Duana ngo kalak i pelliasken bangkè Jesus, ibaluti mo dekket kaèn kapan rebbak dekket minak baungkus i, rembang mi adat mengkubur kalak Jahudi.

⁴¹I bekkas Jesus ipersilangken i, lot ngo sada pekken. Lot ngo sada kuburen rembaru i pekken i, makdèng nung terpakkè lako mengkubur simatè.

⁴²Kumarna ndessing ngo pendèban i, janah kumarna enggo naing dapet tikkina ari Sabat, gabè mi kuburen i mo ikuburken kalak idi bangkè Jesus.