Read Batak Dairi Johanes 2 Bible Online

Johanes 2 - Batak Dairi bible

Johanes 2

¹Enggo kessa dua ari, lot mo merbayo i kuta Kana sini Galilea. I sidi ma ngo dekket inang Jesus.

²Jesus pe dekket sisinNa dekket ngo idilo merbayo i.

³Nai tupung mo kerri karina anggur sukut i, nai idokken inang Jesus mo taba Jesus, “Enggo kerri anggur sukut i.”

⁴Ialoi Jesus mo, “Nangè, ulang pasulak Aku; ai makdèng dapet tikkingku lako mem- maing barang kadè.”

⁵Nai idokken inangna i mo taba perkebbas nisidi, “Barang kadè idokken Jesus taba kènè, bahan kènè mo.”

⁶Lot mo isidi hantar ennem goci siat-siat ualuhpuluh soh mi serratus sellup laè mahan pemmorih nèhè, mengèkutken hatoren agama kalak Jahudi.

⁷Idokken Jesus mo taba perkebbas i, “Domi kènè mo goci i dekket laè.” Nai idomi kalak i mo laè mi goci i.

⁸Idokken Jesus mo nola taba kalak idi, “Taku mo cituk laè ni goci i, embahken mo taba induk perkebbas.” Iembah kalak i mo laè nitakuna i taba induk pèsta i,

⁹iakapi mo laè i, keppè enggo mobah gabè anggur. (Oda ngo ibettoh barang i dikè nai rohna anggur i, ai pellin perkebbas i ngo kessa bettoh-bettohen). Nai idiloi induk perkebbas i mo kèla i,

¹⁰nina mo mbangsa, “Biasana anggur simerrasana ngo lebbè ihidangken dèba, tapi mula enggo karina tamuè mengènum mbuè anggur, baru pè asa ihidangken nola anggur biasa. Keppèken kono isimpan kono dèng ngo anggur simerrasana, janah bagèndari dèng ngo asa ihidangken kono!”

¹¹Idi mo tanda kellengangen perlebbè ihanaken Jesus, i kuta Kana sini nagerri Galilea. Merkitè tanda kellengangen i, ipacidah Jesus ngo kemulianNa. Nai percaya mo sisinNa i tabaSa.

¹²Enggo kessa i, laus mo Jesus bak inangNa rebbak dekket sisinNa i mi Kapernaum, janah i sidi mo kalak i merian barang piga-piga ari.

¹³Tikan enggo ndessing Ari Raya Paskah kalak Jahudi, laus mo Jesus mi Jerusalem.

¹⁴Idapet Jesus mo jelma merdèa lembu, biri-biri dekket ndarapati i Bages Dèbata i Jerusalem; bagidi ma dekket simenukari kèpèng merkundulen isidi.

¹⁵Nai ipelias Jesus mo ligas-ligas ipas tinali nai, ijalang mo karina pinakan-pinakan idi i Bages Dèbata nai, biri-biri bak lembu pè. Ipengongkitken mo mèja penukaren kèpèng, merhamburen mo kèpèng kalak idi.

¹⁶Idokken mo taba kalak simerdèa ndarapati, “Embah karina ndrapatimi. Ulang baing kènè gabè bekkas pertiga-tigaan Bages BapangKu!”

¹⁷Nai ièngèt sisinNa i mo ayat Bibèl èn, “Mergollah-gollah ngo bagè api menutung ukum kelleng atèngKu midah Bagesmu alè Pa!”

¹⁸Ialo penguasa-penguasa kalak Jahudi mo Jesus merkitè kata-kata mpingas, nina mo, “Tuduhken bai nami tanda kellengangen mahan bukti, lot kuasamu memmaing bagidi!”

¹⁹Ialoi Jesus mo, “Rumpakken kènè mo Bages ni Dèbata èn, nai Kupajek nola mo i mengolihi ibagasen tellu ari.”

²⁰“Empatpuluh tahun mo dekkahna pelliasken Bages Dèbata èn, keppèken ipellias kono nimu ibagasen tellu ari sambing?” nina kalak i.

²¹Tapi dagingna sendiri ngo sinidokken Jesus Bages Dèbata.

²²Asa balik nggelluh kessa Jesus i kemmatèen nai ièngèt sisinNa i mo nidokken Jesus idi kin. Gabè percaya mo kalak idi mi sitersurat ibas Bibèl, dekket mi kata sinidokken Jesus.

²³Nderrang i Jerusalem Jesus mer Ari Raya Paskah, nterrem ngo kalak percaya bana kumarNa tanda kellengangen sinipehanaNa.

²⁴Tapi ukum Jesus oda tok midah kalak i, kumarna itandai ngo karina jelma.

²⁵Oda pella perlu ibagahken dèba keterrangen baNa, ai ibettoh ngo kadè siturah ibagasen pusuh perratèen jelma.