Read Batak Dairi Johanes 20 Bible Online

Johanes 20 - Batak Dairi bible

Johanes 20

¹Njengkas kalohoon ari Minggunkenna idi, taridah bukbuk bettekken dèng, laus ngo si Maria Magdalena mi pendèban i. Soh kessa ia mi sidi, idah mo enggo mbuka kuburen i.

²Nai lojang mo ia mendahi si Simon Petrus dekket sisiin kekellengen atè Jesus, nina mo taba kalak i, “Enggo ibuat dèba Tuhan i i pendèban nai, oda kubettoh barang mikè ibaing!”

³Nai berkat mo si Petrus dekket sisiin sada kalak nai mendahi kuburen i.

⁴Rebbak lojang ngo kalak i duana, tapi lebbèen ngo soh mi kuburen i sisiin sisada kalak nai asa si Petrus.

⁵Itengen kessa mo mi bagasen kuburen i, idah mo kaèn kapan i isidi, tapi oda pella ibengketti kuburen i mi bagasen.

⁶Soh ma mo si Petrus, mèter ibengketti mo mi bagasen kuburen idi, idah ma mo kaèn kapan i mergamparen,

⁷tapi ukum kaèn pemalut takal Jesus, oda rebbak gampar dekket kaèn sidèbankenna i; jaè ngo bekkasna gampar, janah merserpih.

⁸Nai ibengketti sisiin sisada nai ma mo kuburen i, imo sisiin perlebbè soh mi kuburen i. Idah ma mo karinana i, gabè percaya mo ia. (

⁹Tapi soh mi katikana idi pè, laju dèng ngo oda iarti kalak i sitersurat ibas Bibèl, simendokken kennah balik nggelluh ngo ia i kemmatèen nai.)

¹⁰Nai balik mo sisiin sidua kalak i mi kuta.

¹¹Ukum si Maria dak tong ngo ia i gembar kuburen i janah tangis. Ninganna ia tangis idi, itengen mo mi bagasen pendèban idi,

¹²nai lot mo idah dua kalak malaèkat merpakèen mbulan. Sada kundul kan julu meddem, sada kalak nai kan tellagahen.

¹³Nai nina malaèkat-malaèkat i mo mbangsa, “Kasa tangis kono nangè?” Nai ialoi si Maria mo, “Ibuat simemmuat ngo Tuhanki, oda kubettoh tah mikè Ibaing!”

¹⁴Enggo kessa idokken si Maria bagidi, tumulih mo ia mi podi gabè idah mo Jesus cènder isidi, tapi oda ngo itandai, Jesus ngo keppèken i.

¹⁵Idokken Jesus mo tabasa, “Kasa tangis kono nangè? Isè itulusi kono?” Idokdok si Maria ngo penjaga pekken i ia, gabè nina mo mbangsa, “Mula kono ngo mengompatSa isènda nai, bagahken mo bangku idikè ia ibaing kono, asa kualengi.”

¹⁶Idokken Jesus mo tabasa, “Maria!” Nai itengen si Maria mo Jesus gabè nina mo i kata Heber: “Rabuni!” (Mendok, alè Guru.)

¹⁷“Ulang dèng jamah Aku,” nina Jesus, “Kerna madèng laus Aku mendahi Bapa. Laus mo kono mendahi anggingKu, bagahken mo taba kalak i: Laus mo Aku mendahi BapangKu janah Bapa ndènè, mendahi DèbatangKu janah Dèbata ndènè.”

¹⁸Nai laus mo si Maria Magdalena memagahken i taba sisiin Jesus magahken enggo idah ia Tuhan i, janah Tuhan i ngo mendokken i karina tabasa.

¹⁹Enggo kessa gellap ari, i ari Minggu i dèng ma, merpulung mo sisiin Jesus i sada bages. Enggo mo igerruki pèntu bages i karina, kumarna mbiar ngo kalak i midah penguasa-penguasa Jahudi. Sintempu mèter roh mo Jesus janah cènder i tengah-tengah kalak i ninganna mendokken, “Damè mo bai ndènè!”

²⁰Enggo kessa idokken bagidi, Ipacidah mo tanganNa dekket rusuk silaona taba kalak i. Idah kalak i kessa mo Tuhan i, sondel mo sampang atè kalak i.

²¹Nai iolihi Jesus nola mo mendokken sikali nai, “Damè mo bai ndènè. Tosè bagè ipasulak Bapa Aku, bagidi ma mo kènè Kupasulak.”

²²Idokken kessa bagidi, Isempulken mo kessahNa bai kalak i ninganna idokken, “Jalo kènè mo Tendi Dèbata.

²³Mula isasa kènè dosa barang isè, enggo mo sasa i; janah mula ipehot kènè dosa barang isè, hot mo dosana i.”

²⁴Ukum si Tomas sada kalak ipas sisiin Jesus sisipuluh dua kalak idi nai, oda kin ngo rebbak dekket sisiin sidèbankenna i, tikan roh i Jesus.

²⁵Nai isukutken sisiin i mo tabasa, “Enggo kuidah kami Tuhan i!” Tapi ialoi si Tomas mo kalak i, “Ukum oda kuidah pengellabangen i tanganNa i, janah ukum mak kucucukken jari-jaringku mi ugahna i, dekket mi rusuk silaoNa i, oda percaya dèng aku.”

²⁶Nai saminggu nai nola ma, merpulung mo sisiin Jesus i bages i, dekket mo si Tomas isidi. Karinana pèntu enggo igerruki. Tapi mèter roh mo Jesus cender i tengah-tengah kalak i mendokken, “Damè mo bai ndènè!”

²⁷Nai idokken Jesus mo taba si Tomas, “Baing mo jari-jarimu misèn, janah tengen mo tanganKu. Doroken mo tanganmu janah cucukken mo mi rusuk silaongKu, ulang ragu kono. Percaya mo kono!”

²⁸Nai mèter idokken si Tomas mo mbang Jesus, “Tuhanku janah Dèbatangku!”

²⁹Idokken Jesus mo tabasa, “Kumarna idah kono ngo Aku asa percaya kono? Sayurntua ngo sipercaya bangku, tukasi pè oda idah Aku!”

³⁰Matcam dèng ngo nemmu bagèna tanda-tanda sidèban ibaing Jesus, i hadeppen sisinNa i, tapi oda pella nisuratken idi ibas bukku èn.

³¹Karinana sinisuratken isènda, ukum nitèmbakna imo asa percaya kènè, Jesus ngo Raja Sipaluah niperbagah-bagah Dèbata, imo Anak Dèbata, janah merkitè-kitè percaya bana, gabè terrolih kenggelluhen mo kènè.