Read Batak Dairi Johanes 21 Bible Online

Johanes 21 - Batak Dairi bible

Johanes 21

¹Enggo kessa i ipacidah Jesus nola ma mo dirina sikali nai i biding Tao Tiberias. Bagèen ngo cara Jesus pacidahken dirina i:

²Tikan sidari merpulung mo si Simon Petrus dekket si Tomas sinigerarenna ma si Leppa; si Natanael anak kuta Kana si ni Galilea, dukak-dukak si Zebedeus dekket dua kalak nai sisiin Jesus sidèban.

³Nai nina si Simon Petrus taba denganna i, “Laus aku lebbè menjala ikan.” “Kami pè dekket ma mo,” nina kalak i ma tabasa. Kebbas mo kalak i karina, janah ibengketti mo bungki lako berkat. Tapi suntuk bernginna idi kadè poda giam dapet kalak i.

⁴Enggo kessa mendok mbincar mataniari, roh mo Jesus cènder i biding tao i; tapi oda itandai kalak i, Jesus ngo keppè i.

⁵Idokken Jesus mo taba kalak i, “Lot ngo ikan ndènè alè pa?” “Oda lot,” nina kalak i mengaloi.

⁶Nai nina Jesus mo taba kalak i, “Sampakken kènè mo jala ndènè i mi kamuhun bungki i, asa kennaan kènè.” Mènter isam- pakken kalak idi mo jalana i, nai gabè mak ter- ruah kalak i nèngè jalana i kumarna mbuè ikan ibagasen jalana i.

⁷Nai nina sisiin kekellengen atè Jesus mo mbang si Petrus, “Tuhan i ngo i,” nai mèter iselluk si Petrus mo geddana (oda kin ngo ipakkè geddana), mèter mangkat mo ia mi laè i.

⁸Sisiin sidèbankenna i pè merbungki mo mi darat ninganna mengeruah jala sienggo dom ikan i, ai oda nèngè ndaoh kalak idi i darat nai, kira-kira seratus mèter nai ngo kessa.

⁹Susur kessa mo kalak idi i bungki idi nai, idah kalak i mo enggo lot rara api i sidi janah ipanggang ikan i babona, bagidi ma dekket roti pè.

¹⁰Idokken Jesus mo taba kalak i, “Embahken kènè mo misèn dèba ikan sidapet kènè ndai.”

¹¹Laus mo si Simon Petrus mi bungki, iruah mo jala i mi darat. Dom ngo ikan mbelgah-mbelgah i ibagasen bungki i, buèna seratus limapuluh tellu ngkabuah. Tukasi pè bagidi buè ikan idi, oda pella meribak jala i.

¹²Nai nina Jesus mo taba kalak i, “Roh mo kènè mangan.” Isè poda lot sisiin i mengkusoken, “Isè ngo kono?” Ai ibettoh kalak i ngo, Tuhan i ngo Ia.

¹³Nai ijolmiti Jesus mo kalak i, ibuat mo roti i, ipemberrèken mo taba kalak i. Ikan i pè bagi ma ngo ibaing.

¹⁴Èn mo petellu kaliken ipacidah Jesus dirina taba sisinNa, kessa nai balik nggelluh Ia i kemmatèen nai.

¹⁵Enggo kessa salpun mangan kalak i, idokken Jesus mo taba si Simon Petrus, “O Simon, anak si Jona, nggkellengen ngo atèmu midah Aku asa kalak ènda?” “Uè, Tuhan, ibettoh kono ngo ngkelleng atèngku bamu,” nina si Petrus mengaloi. Nai idokken Jesus mo tabasa, “Permakani mo biri-biringKu.”

¹⁶Pedua kaliken ikusoken Jesus mo bana, “O Simon anak si Jona, ngkelleng ngo atèmu midah Aku?” Ialoi si Somon Petrus mo, “Uè Tuhan, ibettoh kono ngo ngkelleng atèngku bamu.” Nai idokken Jesus mo tabasa, “Permakani mo biri-biringKu.”

¹⁷Nai ikusoi Jesus nola dèng ma mo ia petellu kaliken, “O Simon anak si Jona, ngkelleng ngo atèmu midah Aku?” Gabè marsak mo si Petrus kumarna sanga tellu kali ikusoi Jesus ia. Nai ialoi si Pe- trus mo, “Tuhan, Tuhan, ibettoh kono ngo karinana: Ibettoh kono ma ngo ngkelleng atèngku bamu.” Nai idokken Jesus mo taba si Petrus, “Permakani mo biri-biringKu.

¹⁸Ntangkas mo Kudokken bamu; tikan poso dèng kono, kono ngo mengkokosi dirimu, janah lemmomu ngo barang dempak dikè kono laus. Tapi tua-tua kessa kono luas, idoroken kono mo tanganmu mpak sidèban, janah sidèban i mo mengèkèti kono, nai iembah mo kono mi bekkas siso nikellemmokenmu.”

¹⁹(Merkitè kata i, ibagahken Jesus ngo bakunè permatè si Petrus lako pesangapken Dèbata.) Enggo kessa bagidi, idokken Jesus dèng ma mo taba si Petrus, “Èkutken mo Aku!”

²⁰Tikan tumulih si Petrus, idah mo i podina sisiin kekellengen atè Jesus. (Ia ngo sisiin kundul ndessing i gembar Jesus tikan mangan janah mengkuso taba Jesus, “Tuhan isè ngo naing menelbuh Kono?”)

²¹Idah si Petrus kessa mo sisiin i, ikusoi si Petrus mo Jesus, “Tuhan, bakunè ngo ia luas?”

²²Ialoi Jesus mo, “Mula pè Kupergeddo asa nggelluh ia soh mi pekirohKu luas, oda pella sarihenkenmu idi. Èkutken sambing mo Aku!”

²³Kemulihkenna idi, gabè sar mo berritana, bai samah-samah sisiin Jesus i, oda matè sisiin idi. Keppèken oda ngo lot idokken Jesus, oda matè sisiin i. Ukum nidokken Jesus imo: “Mula pè Kupergeddo asa tettap ia nggelluh soh mi ari pekkirohKu luas, asa oda pella sarihenkenmu idi!”

²⁴Sisiin idi ngo mengindangken tersèngèt karina simasa èn. Ia ma ngo simenuratken janah sibettoh ngo, bennar ngo sinidokkenna i.

²⁵Matcam dèng ngo nemmu bagèna sinibaing Jesus. Ukum isuratken karinana i, dokatèngku oda siat suberri dunia èn mahan bekkas bukku si nisurat idi.