Read Batak Dairi Johanes 3 Bible Online

Johanes 3 - Batak Dairi bible

Johanes 3

¹Lot mo sada kalak Parisè mergerar si Nikodemus. Sada kalak terpandang ngo ia i agama Jahudi.

²I sada berngin, roh mo ia mendahi Jesus, mendokken, “Guru, kubettoh kami ngo Ko roh bai Dèbata nai. Ai isè poda ndorok memmaing tanda kellengangen bagè nibaingmu i, kum mak Dèbata denganna.”

³Ialoi Jesus mo, “Èngèt mo; isè poda ndorok mbengket mi Kerajaen Dèbata, ukum mak mengolihi tubuh ia.”

⁴“Bakunè ngo ndorok mengolihi tubuh jelma, mula enggo mbelgah?” nina si Nikodemus taba Jesus. “Ai ndorok kin mo ia mbengket nola balik mi kurungen manik, asa itubuhken nola?”

⁵Ialoi Jesus mo, “Situhunna ngo sikudokken èn, mula oda kalak itubuhken ipas laè dekket Tendi Dèbata nai, oda ndorok mbengket ia mi Kerajaen Dèbata.

⁶Secara perdagingen itubuhken ngo jelma bai partuana nai, tapi secara pertendiin itubuhken Tendi Dèbata.

⁷Ulang kono lengang mula Kudokken kennah itubuhken ngo kènè me- ngolihi.

⁸Menempul ngo angin barang mikè lemmo atèna; sidengkoh ngo sorana, tapi oda nibettoh idikè nai janah laus mikè ia. Bagi ngo jelma sienggo itubuhken Tendi Dèbata.”

⁹“Bakunè ndorok terjadi bagi?” nina si Nikodemus mengkusoi.

¹⁰Ialoi Jesus mo, “Kono guru i tengah-tengah kalak Israel, oda ibettoh kono i?

¹¹Kudokken mo taba kono; kuranaken kami ngo sikubettoh kami, kuindangken kami ngo sikuidah kami, tapi oda tok kènè mi sikuindangken kami i.

¹²Salang terrèngèt dunia èn Kusukutken bamu, oda percaya kono bangku, makinsa nola mo mula Kusukutken terrèngèt sorga?

¹³Isè poda nung dèng laus mi sorga, tapi ukum i sorga nai enggo lot roh mi dunia èn, imo Anak Jelma.

¹⁴Bagè pemmaing si Musa pedatesken nipè tembaga ipas sada tongket kayu i kellongoon, bagi ngo kennah ipedates Anak Jelma,

¹⁵asa nggelluh karina sipercaya baNa.”

¹⁶Ai bagèen ngo ngkelleng atè Dèbata midah dunia èn, Iberrèken ngo AnakNa Sada-sada i, asa ulang mago gennep sipercaya bai Anak idi, tapi asa kenggelluhen siamman sumendah bana.

¹⁷Ai ipasulak Dèbata AnakNa mi dunia èn, oda ngo lako menghukum dunia èn, tapi lako paluahken dunia èn ngo.

¹⁸Barang isè percaya taba anak idi, oda ngo kenna hukum, tapi siso percaya taba Anakna Sada-sada i, kenna hukum ngo.

¹⁹Bagèen ngo hukumna i: Enggo roh penendang i mi dunia èn, tapi lemmoon ngo atè jelma i midah sigellap daripada midah sinterrang i, ai jahat ngo pengelako kalak i.

²⁰Barang isè maing jahat, nceggo ngo atèna midah sinterrang i, asa mboni pengelakona sijahat i;

²¹Tapi barang isè merpengelako mendè, idapetken ngo penendang i, asa ntarar karinana pemmaingna rembang mi sinipergeddo Dèbata.

²²Enggo kessa i, laus mo Jesus rebbak dekket sisinNa mi nagerri Juda. Isidi mo kalak i merrian barang piga-piga ari dekkahna ninganna perridiken jelma.

²³Tapi si Johanes pè peridiken ngo i Ainon, njolmit mi Salim, ai mbuè ngo isidi laè; nai merrohen mo nterrem jelma mi sidi asa iperridi,

²⁴ai madèng ngo ikurungken si Johanes tikanna i.

²⁵Mersoal mo tikanna i sisiin si Johanes dekket sada kalak Jahudi tersèngèt hatoren perpangiren i agama kalak Jahudi.

²⁶Laus mo kalak i mendahi si Johanes, nina mo, “O Guru, ièngèt kono dèng ma ngo kalak siroh mendahi Guru i, tikan i kèparen Laè Jordan, imo nituduhkenmu bai nami tikala i? Bagèndari perridiken ngo ia, janah mèduk ngo kalak roh mendahiSa!”

²⁷Nai ialoi si Johanes mo, “Oda ndorok jelma memmaingken barang kadè, ukum mak iberrèken Dèbata bana.

²⁸Otang enggo ngo idengkoh kènè kudokken, ‘Oda ngo aku Raja Sipaluah niperbagag-bagah Dèbata. Pellin solo-solona ngo kessa aku, ipasulak roh lebbèen asa Ia.’

²⁹Kèla ngo sidasa daberru mula enggo jejap kalak i. Asa ukum anak-anak kèla pellin mendengani sambing ngo kessa i janah mendengkoh-ndengkohi, nai sampang mo atèna mula idengkoh sora kèla i. Bagidi ma ngo bang aku pè. Dom ngo sampang atèngku bagèndari.

³⁰Ia ngo makin mbelgah, tapi ukum aku makin kèdèkna ngo.”

³¹Barang isè roh i babo nai, ia ngo mengan- tusi karina jelma. Ukum siroh i dunia èn nai imo kalak sini dunia èn, janah mengeranaken tersèngèt dunia. Ia siroh i sorga idi nai ngo mengatasi karinana!

³²Iranaken ngo kadè siniidah dekket sinidengkohNa, tapi sada kalak poda percaya mi sini ranakenNa idi.

³³Barang isè percaya mi si ni ranakenNa idi, ituhu-tuhui kalak i ngo kebennaren Dèbata.

³⁴Barang isè iutus Dèbata, isukutken ngo Dèbata, ai iberrèken Dèbata ngo Tendina baNa.

³⁵Ikekelengi Bapa i ngo AnakNa janah enggo isohken sagumanna mi bagasen kuasaNa.

³⁶Barang isè percaya taba kalak idi, terolih nggelluh soh mi amman-sumendah ngo ia; tapi barang isè oda percaya taba Anak idi, oda irasai kalak sibagidi nggelluh situhunna. Ihukum Dèbata ngo ia soh sidekkah-dekkahna.