Read Batak Dairi Johanes 4 Bible Online

Johanes 4 - Batak Dairi bible

Johanes 4

¹Idengkoh kalak Parisè mo buèen dèng ngo iperridi Jesus asa iperridi si Johanes. (

²Tukasi pè oda ngo dekket Jesus perridiken, tapi pellin sisinNa idi sambing ngo kessa.)

³Nai ibettoh Jesus kessa mo i, laus mo ia i Judèa nai balik mi Galilea.

⁴Tikan perdalanenna idi, kennah memellus arap Samaria ngo Ia.

⁵Nai soh mo Jesus mi sada kuta i Samaria i mergarrar Sikhar, imo ndessing mi tanoh niberrèken si Jakob arnia taba anakna si Josep.

⁶Lot ngo isidi sada tellaga si Jakob. Kumarna ledjana iakap Jesus merdalan i, kundul mo Ia i biding tellaga i. Kira-kira cèger ari mo i,

⁷tapi ukum sisiin Jesus enggo laus mi kuta lako menokor bekkel. Nai roh mo sada kalak daberru Samaria mi tellaga i naing menaku laè. Idokken Jesus mo tabasa, “Dikè mo Kuènum dèba laè i?”

⁸

⁹Ialoi daberru Samaria i mo, “Kasa mengi- do mènum kono kalak Jahudi taba aku kalak Samaria?” (Ai oda mersaor kalak Jahudi dekket kalak Samaria).

¹⁰Nai ialoi Jesus mo, “Ukum ibettoh kono ngo pemerrèken Dèbata janah itandai kono isè mengido laè bamu i, tentu uè ngo ko mido laè ènumen baNa nai; nai gabè Iberrèken mo bamu laè sipegelluhken.”

¹¹“Tuan,” nina daberru i, “salang taku-taku oda lot bamu, janah mbages kalohon ngo tellaga èn. I dikè nai mo dapet Kono laè sipegelluhken i?

¹²Ai belgahen ngo kono dok atèmu asa empung nami si Jakob simemerrèken tellaga èn bai nami. Ia sendiri pè mennaku janah mengènum laè i tellaga èn nai; bagidi ma ngo dukak-dukak bak pinakanna pè?”

¹³“Dak muasen ngo karina jelma simengènum laè i tellaga èn nai,” nina Jesus,

¹⁴“tapi simengènum laè sinaing berrènkenKu idi, oda nèngè muasen ia soh mi amman summendah. Janah dèng ma, ukum laè siberrènkenKu idi, gabè laè mul ngo i, ibagasen dirina, janah dak menjarir mi ruar, janah memerrèken bana nggelluh situhunna!”

¹⁵Nina daberru i mo, “Tuan, berrè mo bangku laè sibagidi asa ulang muasen nè aku; janah oda perlu nè roh aku mengaleng laè mi sèn.”

¹⁶“Laus mo kono lebbè mengaleng sinibalèmu, nai molih nola mo kono misèn,” nina Jesus.

¹⁷Ialoi daberru i mo, “Oda lot sinibalèng- ku.” Tuhu ngo nidokkenmi, oda lot sinibalèmu,

¹⁸“tapi enggo lima kalak sinibalèmu. Anak laki denganmu sibagèndari i pè oda ngo sinibalèmu.”

¹⁹Nina daberru idi mo taba Jesus, “Bagèndari enggo kubettoh nabi ngo Kono.

²⁰Idokken empung nami i delleng èn ngo kusembah kami Dèbata, tapi bangsa ndènè mendokken pellin i Jerusalem ngo kessa bekkas menembah Dèbata.”

²¹Nina Jesus mo, “Percaya mo kono. Roh mo tikkina, oda nè i delleng èn barang i Jerusalem bekkas menembah Dèbata.

²²Isembah kènè kalak Samaria ngo siso nitandaan ndènè. Tapi ukum kami kalak Jahudi kusembah kami ngo Ia sikutandai kami, ai bai bangsa Jahudi nai ngo roh kelluahen i.

²³Tapi dapet nè mo tikkina janah enggo roh tupèh, merkitè Tendi Dèbata, isembah karina jelma mo Bapa i. Merpe- nguèi tuhu-tuhu mo kalak i bagè nipergeddo atè Bapa.

²⁴Tendi ngo Dèbata, janah pellin merkitè kuasa Tendi Dèbata ngo kalak ndorok menembah Dèbata Bapa, bagè situhunna ia lot.”

²⁵Nina daberru idi mo mbang Jesus, “Kubettoh ngo naing roh nè mo Raja Sipaluahken i (sinigerarenna Kristus). Mula roh kessa Ia ibagahken mo karinana banta.”

²⁶Nina Jesus mo, “Aku ngo i, simengeranai bagèndari dekket kono.”

²⁷Tikan bagidi roh mo sisiin Jesus. Lengang ngo kalak i mengidah Jesus mengeranai dekket sada kalak daberru. Tapi isè poda lot mendokken taba daberru i, “Kadè perlu bamu nangè?” barang taba Jesus, “Kasa mengeranai Kono dekket daberru i?”

²⁸Nai laus mo daberru i isidi nai lojang mi kuta janah mendokken taba pengisi kuta i,

²⁹“Ita kènè sidahi kalak simengeranaken bangku karina ulah-ulahki. Tah mada ngo Ia Raja Sipaluahken i?”

³⁰Nai merlausen mo pengisi kuta i mendahi Jesus.

³¹Sinderrang bagidi, idokken sisiin i mo taba Jesus, “Mangan mo lebbèken Guru i,” nina kalak i.

³²Tapi ialoi Jesus mo, “Lot ngo pangaan bangKu siso nibettoh ndènè.”

³³Gabè mersidokenken mo sisiin i samahSa, “Mada ngo ndia lot menaruhken pangaan baNa?”

³⁴Nai idokken Jesus mo, “Pangaan ngo bangKu menguèi lemmo atè sipasulakken Aku, janah mengulaken ulaan niberrèkenNa mahan ulankenKu.

³⁵Otang idokken kènè ngo, ‘Empat bulan nai mo mosim perraniin?’ Tapi Kudokken mo taba kènè: Seppè mo tengen kènè! Enggo mo ntua buahna, lako perraniin!

³⁶Enggo ijalo kalak simerrani i upahna; enggo ipepulung hasilna imo kenggelluhen amman sumendah. Rebbak mersampang atè mo simardang dekket simerrani.

³⁷Asa tuhu ngo nidokken perumpamaan èn, ‘Sisada èn ngo mennuan, tapi sisada adoi ngo merrani!’

³⁸Kupasulak ngo kè merrani juma siso niula ndènè; sidèban ngo mengula i sidi; tapi kènè ngo menjalo laba ipas ndiula kalak idi nai.”

³⁹Mèduk ngo kalak Samaria pengisi kuta i gabè percaya taba Jesus kumarna pendokken daberru i, “Ibagahken ngo bangku karinana ulah-ulahku idi.”

⁴⁰Asa pejumpa kessa mo kalak Samaria i dekket Jesus, iendik-endik kalak i mo Jesus, asa isidi lebbè merrian Jesus i. Jadi merrian i sidi mo Jesus dua ari dekkahna.

⁴¹Jadi buèen ngo kalak percaya taba Jesus kumarna peddahNa sendiri taba kalak i.

⁴²Ai nina kalak i ngo taba daberru i, “Bagèndari enggo percaya kami, oda kumarna pellin nidokkenmu i sambing taba kami, tapi kumarna enggo kudengkoh kami sendiri peddahna; janah enggo kubettoh kami, tuhu ngo ia Sipaluah dunia èn.”

⁴³Enggo kessa dua ari dekkahna Jesus i kuta Sikhar, berkat mo ia laus mi Galilea.

⁴⁴Enggo kin ngo idokken Jesus, “Oda ngo mersangap nabi i kutana.”

⁴⁵Soh kessa mo Ia mi Galilea, lolo kalohoon ngo kalak nisidi menjalo Jesus, ai sinderrang i Jerusalem kalak i merari Raya Paskah, idah kalak i ngo karinana nibaing Jesus i sidi.

⁴⁶Nai balik mo Jesus mi kuta Kana si ni Galilea, imo kuta bekkasna pennah memmaing laè kembali anggur. Jadi lot mo i Kapernaum sada kalak pugabè istana, mersakit ngo dukakna.

⁴⁷Idengkoh kessa mo enggo roh Jesus mi Galilea i Juda nai, idapetken mo Jesus, ièlèk-èlèk mo Jesus, asa roh mi Kapernaum lako pemalumken dukakna sienggo patè-patèen i.

⁴⁸Nai idokken Jesus mo tabasa, “Mula oda idah kènè tanda kellengangen, oda ngo percaya kènè.”

⁴⁹Gabè nina pugabè istana i mo taba Jesus, “Tuhan, narih pedor mo roh, sinderrang madèng matè dukakku idi.”

⁵⁰“Molih mo kono,” nina Jesus. “Nggelluh mo dukakmu i!” Percaya ngo ia mi sinidokken Jesus i, nai laus mo ia.

⁵¹I tengah ndalan dèng ia lako balik mi bagesna, roh mo naposona mendahisa mendokken, “Nggelluh ngo dukamu idi!”

⁵²Jadi ikusoi mo kalak i, pukul piga malum iakap dukakna i. Nai ibagahken kalak i mo, “Bari kira-kira tengah ari pukul sada enggo laus singgara i.”

⁵³Gabè ièngèt mo tupung bagidi ma ngo kettikana idokken Jesus tabasa, “Nggelluh mo dukakmu i.” Gabè percaya mo ia bak karina sisimpangansa taba Jesus.

⁵⁴Idi mo kellengangen pedua kaliken ihanaken Jesus i Galilea, kessa nai roh Ia i Juda nai.