Read Batak Dairi Johanes 5 Bible Online

Johanes 5 - Batak Dairi bible

Johanes 5

¹Enggo kessa i, lot mo pèsta kalak Jahudi, nai laus mo Jesus mi Jerusalem.

²I Jerusalem, i gembar Pèntu Biri-biri, lot sada bendar i sidi mergerar Betesda kum i kata Heber. I sikuliling bendar i, lot ngo lima sapo-sapo.

³Mèduk ngo simersakit mergalèen i èmpèr-èmpèr i; dèba pètung, dèba kèpang, dèba itempuk sigading [Karinana kalak i dak mèma-mèma pergoncang bendar i.

⁴Ai susur ngo sipata malaèkat Tuhan menggoncang laè bendar i. Barang isè simersakit i perlebbè masuk mi laè goncang i, kennah malum ngo, barang kadè pè sakitna.]

⁵Lot ma mo isidi sada kalak daholi enggo tellupuluh ualuh tahun dekkahna mersakit.

⁶Idah Jesus mo ia galè isidi, janah ibettoh Jesus ngo enggo bagidi dekkahna ia mersakit janah gampar isidi, gabè nina Jesus mo mbangsa, “Naing malum kono?”

⁷Ialoi simersakit i mo, “Ialè tuan, oda lot kadè-kadèngku isèn, lako mendokong aku mi bagasen laè i, tikan goncang. I dèng kebbas aku lako masuk mi bendar i, enggo mo ilebbèi dèba aku.”

⁸Nai idokken Jesus mo mbangsa, “Kèkè mo ko, balun mo bellagenmu, merdalan mo ko!”

⁹Nai mènter malum mo iakap, iembah mo bellagenna, janah merdalan mo ia. Masa ngo i tikan ari Sabat.

¹⁰Kerna naidi, nina perkuasa kalak Jahudm mo taba kalak sirembaru malum i, “Ari Sabat ngo ari èn. Oda ndorok kono merembah bellagenmu i, ai mengellausi hatoren agama ngo i.”

¹¹Tapi ialoi mo, “Kalak sipemalumken aku i ngo mendokken taba aku, ‘Embah mo bellagenmi, merdalan mo kono.’ ”

¹²“Isè mendokken taba kono merembah bellagenmu janah merdalan?” nina kalak i mengkuso.

¹³Tapi oda ngo ibettoh barang isè kalakna. Kerna mèduk ngo jelma isidi janah Jesus pè enggo galip mi tengah-tengah jelma nterrem i, lako mennadingken bekkas i.

¹⁴Enggo kessa bagidi, pejumpa nola mo Jesus dekketsa ipas Bages Dèbata, nai nina Jesus mo tabasa, “Bagèndari enggo malum kono, jadi mermanat mo kono, ulang nè- ngè empet merdosa, asa ulang sempa nola termposiin.”

¹⁵Laus mo ia magahken taba kalak perkuasa kalak Jahudi mendokken, Jesus ngo pemalumkensa.

¹⁶Kemmulihkenna idi, gabè ncian mo atè kalak i midah Jesus, kerna Ipemalum sakit tupung ari Sabat.

¹⁷Tapi nina Jesus mo taba kalak i, “Dak mengula ngo BapangKu; jadi Aku pè kennah mengula ngo.”

¹⁸Kumarnaken rana Jesus i, makin itulusi penguasa-penguasa kalak Jahudi mo dalan lako memmunuh Jesus. Ibaing kalak i pè bagidi, oda ngo pellin Ilausi hatoren agama terrèngèt ari Sabat idi sambing, tapi dekket ngo kumarna idokken Jesus BapaNa nina Dèbata; merlapaten ngo idi, Ipesobok diriNa dosken Dèbata.

¹⁹Gabè nina Jesus mo mengaloi kalak i, “Èngèt kènè mo sikudokken èn; Oda lot ndorok kadè iulaken Anak idi ukum ipas roka-rokana nai sendiri; tapi pellin niidahna Iulaken BapaNa I ngo ibahanken. Ai barang kadè iulaken Bapa i, idi ma ngo iulaken Anak idi.

²⁰Kumarna soh mo ngkellengna atè Bapa i midah Anakna i. Jadi ipettarar ngo karina taba anakna i sagumanNa sinibahankenNa. Lebbih dèng tupèh, ai ipettarar ngo taba Anakna i ulaan terhejiin, asa gabè lengang kènè karina.

²¹Bagè bapa pegelluhken kalak singgo matè, janah memerrèken taba kalak i kenggelluhen; bagidi ma ngo bang Anak idi pè memerrèken kenggelluhen taba barang isè kalak naing berrènkenNa dok atèna.

²²Isè poda ihukum Bapa i. Kerna karina kuasa lako menghukum enggo isohken taba AnakNa i.

²³Ibakin Bapa i pè bagidi, asa karina kalak menghormati Anak idi, tosè bagè penghormatina taba Bapa i. Barang isè oda pesangapken Anak i, codi ngo oda pesangapken Bapa sipasulakken Anak idi.

²⁴Kubagahken mo bai ndènè: Barang isè mengeradum-radumi katangKu, janah percaya taba sipasulakken Aku, baNa ngo kenggelluhen siamman sumendah, janah oda ngo ihukum ia. Enggo maluah ia ipas hukumen kemmatèen idi nai.

²⁵Percaya mo kènè taba Aku — ‘Roh mo tikkina, enggo mo soh idi bagèndari — simatè idi pè mendengkoh sora Anak Dèbata ngo, janah nggelluh ngo simendengkoh sora Dèbata.

²⁶Bagè Bapa i sendiri benna kenggelluhen, bagidi ma ngo Anak i pè ibaing gabè benna kenggelluhen.

²⁷Enggo iberrèken Ia hak taba AnakNa lako mendabuh hukum kerna Anak Jelma ngo ia.’

²⁸Ulang pella kènè lengang mendengkoh èn: Roh mo tikkina, karina kalak sienggo matè i pendèban idi mendengkoh soraNa,

²⁹gabè karuar i pendèban idi nai. Kalak sime- ngulaken mendè, ipekèkè ngo lako menjalo kenggelluhen. Tapi kalak simengulaken jahat ipekèkè ngo lako menjalo hukum.”

³⁰“Kadè poda terbahan aku ukum ibas kedirinKu nai sambing. Kudabuh pè hukum rembang mi kuasa sikujalo bai Dèbata nai ngo. Kerna naidi sènteng ngo penghukumKu i, ai oda ngo mengèkutken ukurKu sendiri nai sikubakin i, tapi mengèkutken lemmo atè Bapa sipasulakken Aku i ngo.

³¹Mula Aku mengindangken tersèngèt diringku, oda tuhu sikuindangken i.

³²Tapi lot ngo sidèbaan mengindangken, janah Kubettoh ngo, tuhu ngo siniindangkenna i.

³³Enggo ipasulak kènè utusen ndènè mendahi si Johanes, janah situhunna ngo i indangken si Johanes tersèngèt Aku.

³⁴Kuruapken pè karina i, oda ngo kumarna perlu bangku pengindangken jelma, tapi asa maluah ngo kènè.

³⁵Codi mi togok lakat janah merbendella ngo si Johanes, tapi pellin sigejap sambing ngo kènè sennang menjalo cuhaya togok idi.

³⁶Tapi belgahen ngo kesaksiinKu daripada kesaksiin si Johanes. Ulaan sinidokken Bapa imo siKuulaken bagèndari, i ngo mengindangken Aku sinipasulak Bapa i.

³⁷Janah Bapa simengutus Aku i pè enggo mengindangken Aku. Oda nung dèng idengkoh kènè sora Bapa, barang pè mengidah abèNa.

³⁸Ai oda ngo iradum-radumi kènè kataNa, kerna oda percaya kènè taba Aku siniutusNa.

³⁹Iguruken kènè pè Bibèl, kumarna dok atè ndènè merkitè i dapet kènè kenggelluhen amman-sumendah. Bibèl idi sendiri pè ipeterrang ngo tersèngèt Aku.

⁴⁰Tapi laju ngo oda uè kènè roh mendahi Aku, asa dapet kènè nemmuken kenggelluhen soh mi amman-sumendah i.

⁴¹Oda perlu bangku pemoji jelma.

⁴²Kutandai ngo kènè. Kubettoh ngo oda ngkelleng atè ndènè midah Dèbata.

⁴³Roh Aku merkitè-kitè gerar BapangKu, tapi oda ijalo kènè Aku. Tapi mula roh kalak merkitè kuasana sendiri, ijalo kènè ngo ia.

⁴⁴Bakunè mo terbakin kènè percaya, mula itulusi kènè ngo pemmojiin samah-samah kènè, janah oda merrusaha kènè, asa ipoji Dèbata Sintèmbul i kènè.

⁴⁵Ulang mo dok atè ndènè Kusalahken kènè i hadeppen Bapangku. Si Musa siniharapken ndènè i ngo menalahken kènè.

⁴⁶Ukum tuhu ngo percaya kènè taba si Musa, tentu percaya ma ngo kènè taba Aku, kerna ia pè isuratken ngo tersèngèt Aku.

⁴⁷Tapi mula oda ikettoki kènè nisuratken si Musa, bakunè mo pengkettoki ndènè mi siKuruapken èn?”